Рагæй æй зундгонд: нез не ’руадзун æ исдзæбæх кæнунæй æй æнцондæр. Аци загъд, ке зæгъун æй гъæуй, хауй грипп æма карз вирусон хуæцгæ незтæмæ (ОРВИ). Сæ профилактики мадзæлттæ ’нцæ аллихузон.

Сæйун неке фæндуй, уавæр уæлдай тæссагдæр исуй, нез фæстеугутæ ку расайуй, уæд. Уой лæдæргæй æма гъуддаг уой уæнгæ не ’руадзунбæл архайгæй, адæм сæ гъос хъæбæрдæр дарунцæ незтæ профилактики мадзæлттæмæ.

Грипп æма ОРВИ-йæй багъæуай кæнунæн ес цалдæр хузи, æма си тæккæ хуæздæр багъæуай кæндзæнæй вакцинаци. Прививкæ искæнуни фæсте адæймагæн гриппæй тæссаг нæбал уодзæнæй, уæлдайдæр, алли анз æй ку кæна, уæд. Иннетæй уæлдай вакцинаци искæнун, фиццагидæр, гъæуй, эпидемий рæстæг сæйун æгириддæр кæмæн не ’нгъезуй, уæхæн адæми.

Грипп æма ОРВИ-йæй фæссæйгæ унæй уæлдай тæссагдæр æй, æхсæз анзей уæнгæ кæбæл цæуй, уæхæн сувæллæнттæн, æ кари ка бацудæй, 60 анземæй уæлæмæ кæбæл цæуй, уæхæн адæмæн, ести нез кæмæ ес æма си еудадзугдæр æхе ка дзæбæх кæнуй, е ’нæнездзийнадæ лæмæгъ кæмæн æй, уæхæн адæмæн, медицинон косгутæн, скъоладзаутæн, студенттæн, æфсæддонтæн. Уæлдай багъæуай кæнуйнагдæр фгриппæй æнцæ æнгъæлдзау силгоймæгтæ.

Грипп бацæфсуй, сæйгæ адæймагæн салам дæтгæй, æ къох ку райсæн, уотемæй: сæйгæ нæ фарсмæ ку æрæхснирса кенæ ку хуфа, уæд; гриппæй тæссаг æй хе гигиени домæнтæбæл устурзæрдæ ка ’й, уомæн дæр.

Нези инфекци ци адæймагмæ бахъæрта, уомæй æ алливарс адæмæн тæссаг æй æ фæссæйгæ уни фиццаг æртæ-цуппар боней дæргъи. Минкъий сувæллæнттæй ба нез бацæфсунæй тæссаг фæууй сæ фæссæйгæ уни фиццаг авд-дæс бони.

Вирустæбæл хъæбæр ахедуй алфамбулай æрдзæ. Адæймаги бауæри ку нæ уонцæ, уæд берæ нæ цæрунцæ (дууæ сахаттемæй аст сахаттей уæнгæ). Гриппи вирусæн æ марæг æй бæрзонд тæвдæ (75-100 градуси), уæдта ма бактерити нихмæ бауæргъæдтæ (спъирт, щелочь) кæми ес, уæхæн медицинон фæрæзнитæ.

Берæ незтæн фæззиннунцæ цъумур къохти бæлахæй. Эпидемий рæстæги къохтæ æхснун гъæуй ахиддæр, уæлдайдæр, сæйгæн æ къох райсуни фæсте, къохæн æнæ есгæ ку нæ уа, уæд. Ма ’вналетæ къохтæй уæ цæсгонмæ, уæ фий кенæ уæ билтæмæ.

Уæхуæдтæ кæд нæ арæхсетæ, уæд уин дохтир байамонæд, фий донæй æхснун куд гъæуй, уой. Хумæтæг дони бæсти цæхгун дон ку уа, уæдта никки хуæздæр (дони еу литрбæл никкæнун гъæуй еу цайцумæн уедуги дзаг цæнхæ). Фиййи ниттадзун ке гъæуй, сæрмагонд уæхæн цæхгун фæрæзнитæ цæттæй уæйæ кæнунцæ аптекити дæр.

Эпидемий рæстæги цæсгонбæл дарун гъæуй маскæ, уой хæццæ ’й гъæуама дара æнæнез адæймаг нæ, фал сæйгæ æхуæдæг.

Вирустæ уарзунцæ, гъар кæми уа, æма ругæ кæми ес, уæхæн рауæн, уомæ гæсгæ цæрæн бунат ахиддæр гъæуй уомæлæфснайд кæнун æма къæрæзгитæ ахиддæр игон кæнун.

Еугур уони æнхæст кæнун æй æнцон, æма, кæд хумæтæг æнцæ, уæддæр уæ эпидемий рæстæг гриппæй багъæуай кæндзæнæнцæ.

Хуæцгæ незтæй уæхе гъæуай кæнетæ æма æнæнез уотæ.

Медицинон профилактики республикон центр