Дзæуæгигъæуи кадгин уавæри игонгонд æрцудæй, сæрмагонд æфсæддон операций архайгутæн хуайраг кæми цæттæ кæндзæнæнцæ, уæхæн минкъий кустуат. Аци æхцæуæн мадзали архайдтонцæ Цæгат Иристони Сæргълæууæг Сергей Меняйло, уæдта хецауадон косгутæ.

Дзæуæгигъæуи ауæхæн минкъий фабриктæ байгон кæнуни фæдбæл хъæппæрес равдиста нæ номдзуд æмзæнхон, Советон Цæдеси Бæгъатæр,  инæлар-болкъон Мамсурати  Хаджумари бæдоли бæдолæ – Серхио Эрнандес.

Уой фæдбæл, е айразмæ сæрмагонд финстæг исæрвиста нæ республики Сæргълæууæги номбæл. Сергей Меняйло ин  æ фæндон хуарзбæл банимадта, Цæгат Иристони Хетæгкати Къостай номбæл паддзахадон университети разамунд ба радех кодта косæн фæзуат.

Нæуæг кустуатæн гъæугæ технологон ефтонггæрзтæ æхе харзæй балхæдта Серхио Эрнандес. Æма нур кустуат кадгин уавæри байгон кодтонцæ. Сергей Меняйло æрзилдæй фабрики бæстихæйттæбæл, базонгæ ’й кустуати технологон хецæндзийнæдти хæццæ.

Сæрмагонд æфсæддон операций тæлми ка архайуй, еци тугъдонтæн хуæрзадæ хуæруйнаг цæттæ кæндзæнæнцæ аци ахургæнæндони хуайраги продуктти технологий кафедри студенттæ æма иннæ специалисттæ. Фидизгъæл æма халсартæй конд хуæруйнагæй уæлдай ма си уодзæнæнцæ сор рæзæ æма æндæр адгийнæгтæ дæр.

Специалистти хатдзæгмæ гæсгæ, кустуати технологон линитæ арæзт æнцæ æнаййеп фæткæбæл. Уой фæрци, ци хуайраг си цæттæгонд цæудзæнæй, уой хуæрзгъæдæдзийнадæ уодзæнæй бæрзонд. Уой хæццæ ба ма арæзт æрцæудзæнæй  æ бунатмæ афойнадæбæл хъæртун кæнунæн еугур фадуæттæ дæр.

Цæгат Иристони Сæргълæууæг æма Хецауади пресс-службæ