Дохтири кустæн аргъгæнæг адæм æнцæ. Æма уони бози хæццæ ба ма ’й æхсæнадæ дæр ку цитгин кæна, уæд е ба уæлдай хуарз æй. Уомæ гæсгæ æхцæуæнбæл банимайун æнгъезуй, мæнæ ци хъæппæреси кой ракæнуйнаг ан, е дæр.

Компанити къуар «Мега», Цæгат Иристони паддзахадон медицинон академи æма нæ республики æнæнездзийнадæ гъæуайкæнуйнади министрадæ иснисан кодтонцæ, Цæгат Иристони медицини къабази райрæзти гъуддагмæ æвæрæн ка бахæсса, уони исцитгин кæнуни фæдбæл  преми «МегаДоктор». Проекти сæйраг нисан æй искурдиадæгин дохтирти исбæрæг кæнун, сæ практикон æма наукон куститæн аргъ искæнун.

Преми лæвæрд цæудзæнæй уæлахездзаутæн æртæ номинациеми: «Фиццаг хатт конд операци», «Дзæбæхгæнæн æма диагностики нæуæг хузтæй пайда кæнун» æма «Наукон публикаци». Æнæмæнгæ, нæ республики медицини райрæзтæн преми агъаз ке уодзæнæй, уой туххæй цудæй дзубанди аци гъуддаг амидингæнгутæ дзиллон хабархæссæг минæвæрттæн ци фембæлд исаразтонцæ, уоми.

Евгъуд анз конкурси архайдтонцæ 38 дохтири. Сæ кустæн аргъ кодта экспертон къуар. Уæлахездзаутæ иссæнцæ Тотиккати Заурбег – медицинон наукити доктор, Цæгат Иристони паддзахадон медицинон академий хирургий кафедри профессор, Реуазти Егор – Горæтгæрон райони сæйгæдони хирургий хайади сæргълæууæг, медицинон наукити кандидат. Хуæздæр наукон публикацибæл банимадтонцæ дохтир-эндокринолог Тебиати Инни куст. Уæлахездзаутæй уæлдай, брифинги архайдтонцæ гъæуайкæнуйнади министри фиццаг хуæдæййевæг Томайти Тамарæ, медицинон академий ректор, медицинон наукити доктор, Уæрæсей уæлдæр ахуради кадгин косæг Олег Ремизов (е адтæй къуари сæрдар).

– Æнæмæнгæ, аци аллианзон преми разæнгард кæндзæнæй нæуæг æнтæститæмæ нæ берæ искурдиадæгин дохтирти. Архайæн, цæмæй нæ специалисттæн фадуат уа сæ зонундзийнæдтæ, сæ фæлтæрддзийнадæ равдесунæн, ци нæуæгдзийнæдтæ, уæдта дзæбæх кæнуни нуриккон хузтæ æма наукон æртæститæ сæмæ ес, уонæбæл æрдзорунæн. Аллибон адæми æнæнездзийнадæбæл ка тох кæнуй, уонæн аргъ искæнæн уодзæнæй хъæбæр æхцæуæнæй, – загъта Олег Ремизов.

Аци преми нисангонд æма фиццаг хат лæвæрд æрцудæй фарæ, æма ин æ агъазиау ахедундзийнадæ нимайгæй, æнæнездзийнадæ гъæуайкæнуйнади министрадæ рахаста унаффæ 2025 анзи дæр проект æнхæстгонд куд æрцæуа.

– Хъæбæр цæмæдестæгæнгæй базонгæ ан, фарæ проекти ка архайдта, уони æнтæстдзийнæдти хæццæ. Æхцæуæн куд нæй, республики еугур медицинон æхсæнади дæр аци преми ке æрбамбурд кодта нæ еумæйаг арфиаг архайди – нæ адæми æнæнездзийнади сæрбæлтау. Нæхуæдтæ ’й уинæн уой, æма нæ фидибæстон медицинæ æ райрæзти еудадзугдæр æнтæстгин къахдзæфтæ кæнуй размæ. Уомæ гæсгæ ба, уæлдай ахсгиаг æй нæ дохтирти кустæн аккаг аргъ кæнун, хуæрзауодундзийнадæй сæ разæнгард кæнун. Уомæ гæсгæ ба архайæн проекти, цæмæй æ нæуæг, никки бæрзонддæр æмвæзадæмæ исесæн медицинон къабази уавæр æма гæнæнтæ, цæмæй си адæмæн агъазкæнуйнадæ никки хуæрзгъæдæдæр уа, – загъта нæ республики æнæнездзийнадæ гъæуайкæнуйнади министри фиццаг хуæдæййевæг Томайти Тамарæ.

Брифинги куд фегъосун кодтонцæ, уотемæй преми «МегаДоктор»-и конкурси архайуни туххæй курдиæдтæ бадæттуни равгæ уодзæнæй 17 мартъийæй ба 5 майи уæнгæ сæрмагонд сайти. Конкурси кæронбæттæн уодзæнæй 20 июни, уæдмæ исбæрæг уодзæнæнцæ уæлахезонтæ æма уони ба сæ хуæрзеугутæй исцитгин кæндзæнæнцæ 21 июни, уæд, куд зундгонд æй, уотемæй Уæрæсей бæрæггонд фæццæуй медицинон косæги Бон.

ХЕКЪИЛАТИ Маринæ