2025 анзи феврали дæсæймаг бонæй æхсæрдæсæймаг бони уæнгæ нæ бæсти рацæудзæнæй фарæстæймаг Еугуруæрæсеуон акци «Æхцæуæнæй лæвар кæнетæ киунугутæ». Исараздзæнæнцæ æй киунугутæ лæвар кæнуни дуйнеуон бони кадæн, кæци фæууй 14 феврали.

Уæхæн хъæппæрес исараздзæнæнцæ Уæрæсей сувæллæнтти паддзахадон  библиотекæ æма ассоциаци «Гъомбæл кæнæн киунугæкæсæги», акци рацæудзæнæй Уæрæсей Культури министрадæ, Уæрæсей киунугути Цæдес æма Киунугæуæйæгæнæг ассоциаций агъазæй.

Акций рæстæг киунугæдæнтти, киунугути тукæнтти, музейти, скъолатæ æма гимназити æмбурд кæндзæнæнцæ киунугутæ æма бæсти минкъий сахартæ æма идарддзæф цæрæнбунæтти сувæллæнтти ахурадон æма гъомбæладон косæндæнттæн, уæдта киунугæдæнттæн лæваргонд цæудзæнæнцæ.

Акци кæдæй цæуй, уæдæй абони уæнгæ – аст анзей дæргъи – еци гъæугæ мадзали архайунцæ Уæрæсей 88 региони. Еци æмгъудмæ æмбургонд æрцудæй 1 миллион æма 700 мин киунуги, кæцитæ равардтонцæ агъазгъæуагæ организацитæн. Айдагъ евгъуд 2024 анзи акций архайдтонцæ нæ бæсти 7 мини 500 киунугæдони, æма еци нимæдзæ анзæй-анзмæ кæндзæнæй фулдæрæй-фулдæр.

Хабæрттæ бæлвурддæр базонæн ес Уæрæсей Сувæллæнтти паддзахадон киунугæдони официалон сайти.