Республикæ Цæгат Иристон-Аланий Æнæнездзийнадæ гъæуайкæнуйнади министрадæ, Цæгат Иристони паддзахадон медицинон академи æма клиникæ «Мега»-йи хъæппæресæй нæ республики нур æртиккаг хатт арæзт цæуй, Цæгат Иристони медицини ирæзтмæ зингæ æвæрæн ка бахаста æма нуриккон медицини зингæдæр æнтæстдзийнæдтæ ке къохи бафтудæй, еци дохтирти ’хсæн профессионалон конкурс «Мегадоктор».

Мадзали архайдтонцæ Республикæ Цæгат Иристон-Аланий Республикон клиникон сæйгæдони сæйраг дохтир Лагкути Мæхæмæт, клиникæ «Мега»-йи хайади сæргълæууæг Гаглойти Альбинæ æма Сувæллæнтти республикон клиникон сæйгæдони урологий хайади сæргълæууæг, аци конкурси евгъуд анзи уæлахездзау Асхаб-Хож-Шидаев. Гаглойти Альбинæ аци еристи туххæй дзоргæй уой баханхæ кодта, æма нæуæг конкурси ихæстæ хъæбæр вазуггин ке ’нцæ нæ республики медицини къабазæ раззагдæр æвмæзадæмæ ракæнунæн:

– Фиццаг анз конкурси архайунмæ кæд æстдæс æма инсæй курдиади райстан, уæд дуккаг анз ба адтæнцæ никки фулдæр. Еци ампъез профессион æмæхсæнадæн фæлварæни хузæн адтæй, нур ба иссæй традицион. Преми райсуни конкурси нисантæ æнæййивдæй байзадæнцæ, нæ республики медицини ирæзтбæл зæрдиагæй архайгæй ке къохи бафтудæй æнтæстдзийнæдтæ, еци хуæздæр æма æнтæстгиндæр дохтиртæ, наукон медицини косгутæ исбæрæг кæнун æма сæ сæрмагонд премийæй исхуарзæнхæ кæнун.

Асхаб-Хож-Шидаев ба æ радзубандий уотæ загъта:

– Мæ дæсниади æз архайун клиникон кусти æмвæзадæ бæрзонддæр къæпхæнмæ исесунбæл. Айдагъ операцитæ кæнунæй нæй дохтири дæсниадæ. Гъæуй хебæл еудадзуг косун, нæуæг мадзæлттæ агорун сæйги дзæбæх кæнунæн.

Лагкути Мæхæмæт ба радзурдта компани «Мега»-йи архайди фæдбæл:

– Фарæ конкурси архайгути кустити фæткæ карз адтæй. Лæдæрæн æй – еристæ ’нцæ агъазиау мадзал. Клиникæ «Мега» кæд хецæн адæймаги къохи æй, уæддæр хецæн адæймæгути клиникитæй уæхæн ихæстæ «Мега»-йæй уæлдай неке исаразта. Хуарз дохтирти куст æма æнтæстдзийнæдтæ гъæуама бæрæггонд цæуонцæ æма син аргъ дæр кæнæн.

Профессион конкурс арæзт æй мæнæ ауæхæн номинацитæй: Цæгат Иристони фæзуати фиццаг операци искæнун, диагностикæ æма незтæ дзæбæх кæнунæн нæуæг гæнæнтæ мадзал кæнун æма наукон публикаци бацæттæ кæнун.