Сергей Меняло æ арфити нистауæни райдайæни уотæ зæгъуй:

– Аци, 2025 анзи медæгæ мах кæд æма берæ бавзурстан зиндзийнæдтæ дæр æма мæститæ дæр, уæддæр нæ бон æй уотæ зæгъун, æма нæ царди медæгæ фулдæр адтæй, æхцæуæн усмитæ дæр, кæцитæ нæ еугуремæй дæр байагурдтонцæ устур хъаурæ, нифс, еудзийнадæ.

Уæрæсей Президенти фæдздзурдмæ гæсгæ 2025 анз нимад æрцудæй Фидибæстæ гъæуайгæнæги æма Устур Фидибæстон тугъди Уæлахези 80 анзей Анзбæл. Нури геополитикон уавæри махæн нæ ахсгиаг ихæс æй – багъæуай кæнун æма исонибони фæлтæртæмæ цитгинæй раттун, адæмихæттити историй тæккæ æгъатирдæр æма тогæйдзагдæр тугъди хабæрттæ. Нæ берæнацион бæсти адæмихæттитæ Устур Уæлахезмæ ци устур æвæрæн бахастонцæ, уой æрниллæг кæнун ба нæ бауадзун! Устур Фидибæстон тугъди 80 анзей бæрæгбон хъæбæр цитгинæй исбæрæг кодтан Цæгат Иристони, æ кадæн арæзт æрцудæй 150 мадзали æма акций.

Æнæмæнгæ, нæ сæйрагдæр ихæсæвæрд, алкæддæр адтæй æма ’й – сæрмагонд æфсæддон операций раззаг ханхæбæл ка лæууй, уонæн агъаз кæнун. Не ’хсаргин фæсевæд сæ агъазиау лæгдзийнади фæрци хæстæгдæр кæнунцæ нæ уæлахез, æууæндун кæнунцæ Уæрæсе – устур æма æнæбасæтгæ паддзахадæ ке æй, кæци адтæй, æй æма уодзæнæй! Цалинмæ Уæрæсе æй, æ берæнацион адæм цалинмæ еузæрдиуонæй æновуд уонцæ нæ Фидибæстæбæл, не ’гъдæуттæбæл æма нæ имисуйнæг евгъуд рæстæгутæбæл, уæдмæ алкæддæр уодзинан хъаурæгин, кæцимæн дуйнеуон æмæхсæнади барæ-æнæбари дæр аргъ кæнун багъæудзæнæй. Фидибæстæ уарзун, еудзийнадæ, кæрæдзебæл хуæцун æма Фидибæстæ гъæуайгæнгутæн аргъ кæнун – е æй федар бундор, кæцибæл арæзт цудæй æма лæууй нæ паддзахадæ!

Аллибони тох цæуй сæдæ километри уоддæр тугъди ханхæй – Уæрæсей алли региони дæр. Ци зиндзийнæдтæ нин æвзаргæ рауадæй, етæ ни алкæмæй дæр байагурдтонцæ нæ еугур хъаритæ æрбамбурд кæнун, еудзийнадæ æма гъæддухдзийнадæ, цæмæй нæ размæ æвæрд ихæстæ исæнхæст кæнун нæ къохи бафтуйа. Кæронмæ ци анз фæццæуй, е бавдиста, мах бон ке æй аразун, гъомусгиндæр кæнун нæ республикæ, уой хæццæ ба нæ Фидибæстæ дæр, цийфæнди гæрæнтæ æма санкцитæ нецæмæ даргæй.

Мах идарддæр аразæн цæрæнуæттæ æма нæдтæ, цалцæг кæнæн нæ республикæн социалон æгъдауæй ахсгиагдæр объекттæ – скъолатæ, сувæллæнтти рæвдауæндæнттæ, амбулаторитæ, культури Хæдзæрттæ. Мах æнхæст кодтан нæ размæ æвæрд ихæслæвæрдтæ, кæцити сæйрагдæр нисан æй сувæллонгин бийнонти, хестæр фæлтæри, сахъат адæми, сæрмагонд æфсæддон операций архайгути царди уавæртæ фæххуæздæр æма фенцондæр кæнун. Æма еци куст, æнæмæнгæ, 2026 анзи изолдæр æнхæст кæндзинан.

Хъазар æмбæлттæ Нæуæг, 2026 анзи къæсæрбæл уин мæ зæрдæ зæгъуй федар æнæнездзийнадæ æма фæрнгун цард, нæ республикæ ба цардамондæй деденæг куд кала! Уадзæ æма нæуæг анз уа бæркадгин берæ æхцæуæн цаутæй, нæ царди алли къабæзти гъомусадæ дæр куд фæббæрзонддæр уа!

Мæ зæрдæ уин зæгъуй, цæмæй лæгъузæй ци адтæй, уони зæронд анз æ хæццæ фæххæсса, нæуæг анз ба нæбæл рæсугъдæй исæмбæлæд.

Хуцау, изæдтæ æма идаугутæ нин уæхæн арфæ ракæнæнтæ, æма нæ еудзийнадæ федарæй-федардæр куд кæна, Иристон æма нæ бæстæ фидбилизæй гъæуайгонд куд уонцæ, не ’фсæддонтæ уæлахези хæццæ сæрæгасæй сæ хæдзæрттæбæл куд исæмбæлонцæ æма алке цард дæр идарддæр нивæбæл куд рацæуа.

Нæуæг анз уин æрхæссæд нæуæг хуæрзтæ æма амæндтæ! Кæрæдзей лæдæргæй, кæрæдземæн аргъгæнгæй, кæрæдзей уарзгæй цæретæ!