Нæ республики Хецауади Сæрдари хуæдæййевæг Плати Альбини разамундæй адтæй сæрмагонд республикон программæ «Иристони тугъдон намус» æнхæст кæнуни фарстати фæдбæл комитети æмбурд.

Профилон республикон министрадтæ æма ведомствити разамонгутæ, муниципалитетти бæрнон косгутæ, æндæр структурити минæвæрттæ лæмбунæг æрдзурдтонцæ программæ царди рауадзуни фарстатæбæл.

«Иристони тугъдон намус» æнхæстгонд цæудзæнæй къæпхæнгай. Программи фиццаг къæпхæн – æ архайгути регистрацибæл куст райдæдта 1 мартъий. Абони уæнгæ бал программи архайуни фæдбæл курдиæттæ балæвардтонцæ сæрмагонд æфсæддон операций 200 ветеранемæй фулдæр. Уæхæн курдиæттæ бадæттуни æмгъуд уодзæнæй аци мæйи кæронмæ.

Программи дуккаг къæпхæнбæл кандидаттæн исараздзæнæнцæ аллихузон тестæ æма æндæр фæлварæнтæ. Уони бæрæггæнæнтæмæ гæсгæ экспертон къуæрттæ иснисан кæндзæнæнцæ хуæздæрти номхигъд. Еци адæмæн программи бундорбæл сæрмагонд профессион цæттæдзийнади ахуртæ райдайдзæнæнцæ августи…

Плати Альбинæ организацион комитети еугур иуонгтæ æма муниципалитетти разамонгутæн загъта, цæмæй программи фæлгæти ци мадзæлттæ нисангонд цæуй, уони бæрзонд ахедундзийнадæ еудадзуг сæ зæрдæбæл даронцæ. «Еугур фадуæттæй дæр байархайун гъæуй, цæмæй сæрмагонд æфсæддон операций архайгутæ æма ветеранти профессион гъомус раргом уа, цæмæй хуæрзæрдæмæ исахеда æхсæнади цардбæл», – бафеппайдта Хецауади Сæрдари хуæдæййевæг.

Зундгонд куд æй, уотемæй республикон нисанмæ арæзт программæ «Иристони тугъдон намус» æ тухи бацудæй, Республикæ Цæгат Иристон-Аланий Сæргълæууæг Сергей Меняйло 2025 анзи 21 феврали ци Указ бафинста, уой бундорбæл. Æ нисан æй сæрмагонд æфсæддон операций раздæри архайгути æргом æхсæнадон кустмæ раздахун, сæ профессион гъомус син раргом кæнун, цардархайди алли къабæзтæн дæсни специалисттæ цæттæ кæнун.

Цæгат Иристони Сæргълæууæг æма Хецауади пресс-служби минæвар куд фæббæрæг кодтонцæ, уотемæй программæ æнхæстгонд цæудзæнæй Уæрæсей Президенти размæ Адæмон хæдзарадæ æма паддзахадон служби уæрæсейаг академий специалистти агъазæй.