Æзинæ кадгин уавæри игонгонд æрцудæй хуæнхон-рекреацион комплекс «Мамисон».

Куд зонæн, уотемæй аци курорти арæзтадæбæл архайд цудæй фæстаг цалдæр анзей дæргъи. Берæ къæхкъуæрæнти сæрти рахезгæй, курорти резиденттæ æнтæстгинæй рахецæн кодтонцæ фиццаг къæпхæни объекти арæзтадæ.

Уой фæдбæл Мамисони коми æзинæ ци цитгин мадзал арæзт æрцудæй, уордæмæ хъæбæр берæ дзиллæ æрæмбурд æй. Уонæн зæрдиаг салам загътонцæ Цæгат Иристони Сæргълæууæг Сергей Меняйло æма Уæрæсей экономикон ирæзти министр Максим Решетников.

– Ке зæгъун æй гъæуй, «Мамисон»-и арæзтади ма берæ гъуддæгутæ банхæст кæнун гъæуй, – баханхæ кодта æ радзубандий Максим Решетников. Фал бал нуриуæнгæ ами фæлладуадзæг адæмæн фæззиндтæй берæвæрсуг зæрдæзæгъгæ фадуæттæ. Римæхстаг нæй, курорти арæзтади берæ аллихузон къулумпитæ ке адтæй, е дæр. Фал федералон корпораци «Кавказ. РФ». Цæгат Иристони разамунд æма курорти арæзтадæбæл иннæ ведомствитæ æма подрядчикти зæрдиаг архайди фæрци абони æвдесæн ан федæни агъазиау курорти фиццаг объекттæ косунгъон искæнуни гъуддагæн. Нифс мæмæ ес, айдагъ Цæгат Иристон нæ, фал еугур Кавкази дæр «Мамисон» агъазиаудæр æма цæмæдесагдæр курорттæй еу ке исуодзæнæй, уомæй.

Федералон министри хæццæ æмгъуди адтæй Сергей Меняйло дæр. Куд баханхæ кодта, уотемæй «Мамисон»-и проектбæл дзубанди цудæй финддæс анземæй фулдæр:

– Берæ зиндзийнæдтæ исæвзурдæй курорти арæзтади. Беретæ дузæрдуг кодтонцæ, уæхæн агъазиау фæлладуадзæн тæлмæ исаразуни гъомус нæмæ ке разиндзæнæй, уобæл. Фал абони нæ еугур дæр æвдесæн ан уæхæн вазуггин нисан нæ къохи къæпхæнгай ке æфтуйуй, уомæн.

Бæрæгбони архайгутæн адтæй равгæ нæуæг курорти фадуæттæ фæууинун æма си испайда кæнунæн. Зæгъæн, нуриуæнгæ косун райдæдтонцæ, сæ дæргъæ дæс километремæй фулдæр кæмæн æй, еци лыжитæбæл бурæн нæдтæ.Уой хæццæ, курорти байгон æнцæ, фæлладуадзæг адæми 2950 метри бæрзæндæмæ цубур æмгъудмæ ка исхъæртун кæна, еци дууæ канатон нади. Уомæй уæлдай, курорти байгон кодтонцæ экологион гъæуи бæстихæйттæ, ресторан, хуæрæндонæ, лыжитæбæл бурæн ефтонггæрзтæ рæстæгмæ райсæн кæми ес, уæхæн пункттæ, хуæдтолгитæн æрлæууæн æма уотæ идарддæр.

Уой хæццæ, куст цæудзæнæй «Мамисон»-и дуккаг къæпхæни объектти арæзтадæбæл. Куд нисангонд цæуй, уотемæй 2030 анзи уæнгæ курорти гъæуама косонцæ лыжитæбæл бурæн трасситæ æртæ æма дууинсæй километри æма фондз канатон нади. «Мамисон»-и фусунуати уæдмæ фæззиндзæнæй æртæ мин бунатемæй фулдæр, курорти ка коса, еци адæми нимæдзæ ба 2,6 мин адæймагей уæнгæ исхъæртдзæнæй.  Проектмæ гæсгæ, еци æмгъудмæ алли анз «Мамисон»-и фæллад исуадзуни фадуат уодзæнæй 350 мин адæймагемæй фулдæремæн.

Еу загъдæй, «Мамисон» цардгъон кæнуй æма идарддæр никки цардгъондæр кæндзæнæй.

*  *  *

Фиццаг къари: Битарти Вячеслав нæ республики Сæргълæууæг ку адтæй, Тускъати Таймораз ба Хецауади Сæрдар, уæд дууемæй дæр хъæбæр æновудæй байархайдтонцæ, цæмæй «Мамисон» исаразунæн цидæриддæр гъудæй, еци гъуддæгутæ уæди равгитæмæ гæсгæ æнæгъæнæйдæр æнхæстгонд æрцудайуонцæ. Æма федарæй зæгъун æнгъезуй, абони аци комплекс игонгонд ке æрцудæй, е æй уони агъазиау архайди фæрци.

Дуккаг къари: «Мамисон» байгон кæнуни фæдбæл арæзт цитгин мадзали архайгутæн цæмæдесаг куд нæ адтайдæ аци комплекси ахсгиагдзийнади туххæй нæ республики разамонæг Сергей  Меняйлой радзубанди.