Нæуæг анзи хуæдразмæ Уæрæсей Президент Владимир Путини разамундæй арæзт æрцудæй адæмихæттити ’хсæн рахастдзийнæдти Совети æмбурд. Æма уоми æ радзубандий нæ бæсти разамонæг куд баханхæ кодта, уотемæй Уæрæсей алкæддæр бæрзонд æвæрди адтæй æма  абони дæр æй æхсæнадон æма адæмон еудзийнадæ, нимад цудæй æма цæуй нæ тæккæ устурдæр хæзнабæл, нæ еумæйаг цардарæзти сæйрагдæр бундорбæл. Еци æмбурди Владимир Путин хуарзбæл банимадта 2026 анз, куд Уæрæсей адæмихæттити еудзийнади анз, уотæ иснисан кæнуни фæндæ.

Уой фæдбæл дзоргæй, цæмæй никки ахедгæдæрæй пайдагонд цæуонцæ, ци  берæ гæнæнтæ æма равгитæ нæмæ ес нæ бæсти цæрæг адæмти ’хсæн рахастдзийнæдтæ зæрдæмæдзæугæдæр æма гъомусгиндæр кæнунæн, уонæй æнхæстæй пайдагонд цæуа. Цард цард æй, алцидæр си æрцæуй, æма национ кенæ конфессионалон рахастдзийнæдти цидæр къуæхцитæ ку фæззинна, уæд æвæстеуатæй еуварсгонд куд цæуонцæ, нæлæдæрундзийнадæ куд нæ иситинг уа.

– Федар нихкъуæрд гъæуама лæвæрд цæуа, адæмти ’хсæн дехдзийнæдтæ  исæвзурун кæнунбæл кадæриддæр архайуй, уонæн. Еци цардихалгутæ сæхуæдтæ бадунцæ фæсарæнти, материалон фæрæзнитæй ефтонггонд цæунцæ уони сæрмагонд службитæй, уони ардудæй архайунцæ æма сæ нисан еу æй: «Нæ бæсти цæрæг адæмихæттити ’хсæн кæрæдзей лæдæрундзийнадæ æма бастдзийнадæ æрлæмæгъ кæнун. Уой туххæй ба пайда кæнунцæ еугур мадзæлттæй дæр. Еци кусти сæ зæрдæ дарунцæ нихмæлæууæг къуæрттæбæл, – баханхæ ма кодта В.В. Путин.

Фæсарæнти арæзт цæунцæ Уæрæсей нихмæ архайæг  аллихузон нæуæг æма нæуæг организацитæ, центртæ,  кæцитæн сæ архайди нисан æй информацион цардихалæн куст.

Сæдæгай æнзти дæргъи знаггадæгæнгутæ аллихузон мадзæлттæй тухтæнцæ нæ нихмæ æма син нæ бантæстæй Уæрæсе ниссæттун, фал уæддæр сæ куст ба нæ уадзунцæ.

Еци гъуддагæн æнæ хинцæн нæййес. Гъæуама сæ нихмæ лæууæн никки гъæддухдæрæй, цидæриддæр ихалæн миутæ аразунцæ, уонæн гъæуама аккаг нихкъуæрддæттæн мадзæлттæ арæзт цæуа.

Æмбурди дзубанди ци берæ фарстати фæдбæл цудæй, етæ, федарæй ни æруагæс кæнуй, никки æнтæстгиндæрæй æнхæстгонд цæудзæнæнцæ аци анз, Уæрæсей цæрæг адæмихæттити еудзийнади Анзи дæргъи. Мах дæр нæ газети мухур кæндзинан уой фæдбæл æрмæгутæ. Уонæй еу – Устур Фидибæстон тугъди карздæр рæстæги Цæгат Кавказ еугур адæмихæттити минæвæртти антифашистон митинги туххæй – кæсетæ абониккон номери. Кæддæр ма ’й мухур кодтан, фал уин æй нæуæгæй æрлæуун кæнуйнаг ан уæ зæрдæбæл, уомæн æма е ирд æвдесæн æй, нæ адæмтæ сæ еудзийнади фæрци цæйбæрцæбæл тухгин æнцæ, комкоммæ уой фæрци ниддæрæн кодтонцæ  æнæгъæнæ Европæ басæттæг фашистон Германи.