Цæгат Иристони Сæргълæууæг Сергей Меняйло ин разамунд лæвардта, уотемæй æрæги арæзт æрцудæй республикон организацион комитет «Уæлахез»-и кезуй æмбурд. Дзубанди си цудæй нæ Цитгин Уæлахези 80 анзей кадæн цитгингæнæг мадзæлтти фæдбæл.

Республики разамонæг куд фегъосун кодта, уотемæй аци хатт акци «Æнæмæлгæ полк»-и рацуд  арæзт æрцæудзæнæй Сæребари фæзи (зундгонд куд æй, уотемæй фæстаг цалдæр анзи аци мадзал арæзт цудæй онлайн-фæтки бундорбæл).

Цæгат Иристони Хецауади Сæрдари хуæдæййевæг Плати Альбинæ куд фегъосун кодта, уотемæй Уæлахези 80 анзей кадæн арæзт æрцæудзæнæй сæдемæй фулдæр номерæн-рохсадон мадзали. Сæ сæйрагдæр, æнæмæнгæ, исуодзæнæй 9 Майи æфсæддон парад. Республики сæйраг сахар æма районти цæудзæнæнцæ номерæн æмбурдтæ, литературон-музыкалон концерттæ, спектакльтæ, равдиститæ… Уонæн сæ зингæ хай нерæнгæ  дæр æнхæстгонд цæуй. Зæгъæн, аци бæнтти скъолатæ æма иннæ ахургæнæндæнтти аразунцæ Лæгдзийнади уроктæ, уæдта райдæдтонцæ акцитæ «Бæгъатæри номбæл гъæунгæ», «Финстæгутæ фронтæй», хæстæгдæр бæнтти ба – «Георгий лентъæ», «Сæ цæсгæнттæмæ син бакæсæ» æма иннетæ. Скъоладзаутæ æма фæсевæд цæмæдесæй зонгæ кæнунцæ «Уæлахези поезд» æма æндæр цæугæ æма стационарон экспозицити хæццæ.

Республики æфсæддон мемориалти, уæдта тугъдонти æнсувæрон цирттити æма сæ алфамбулай рауæнти фиццаг майи уæнгæ гъæуама æнхæстгонд æрцæуонцæ фæлгонцадон куститæ.

Цæгат Иристони Сæргълæууæг æма Хецауади пресс-службæ