Зундгонд куд æй, уотемæй аци анз Уæрæсей нимад цæуй Фидибæстæ гъæуайгæнæги Анзбæл. Куд нисангонд цæуй, уотемæй уой фæдбæл анзи дæргъи арæзт æрцæудзæнæй берæ аллихузон мадзæлттæ. Зæгъæн, æрæги Ирæфи райони райдæдта дзиллон-гъæуайкæнуйнадон æма тугъдон-патриотон кусти мæйон.

Уой байгон кæнуни фæдбæл цитгин мадзал арæзт æрцудæй Чиколай 2-аг астæуккаг скъолай бундорбæл, архайдтонцæ ма си æхсæнадон змæлд «Юнармия»-йи æма æндæр еугæндти минæвæрттæ. Аци гъуддаг бацæттæ кæнуни фæдбæл кусти сæхе разæнгардæй бавдистонцæ еци скъолай кадетон къласи ахурдзаутæ дæр.

Мадзал игон кæнгæй, Ирæфи райони бунæттон администраций фæсевæди ’хсæн гъомбæладон кусти æма спорти хайади сæргълæууæг Бесолти Алан æ радзубандий уотæ баханхæ кодта:

– Махæн зæрдæбæл гъæуй уой дарун, æма нæ истори уотид нимæдзтæ æма цаутæй ке нæй. Е арæзт цудæй, цæуй æма идарддæр дæр цæудзæнæй нæ адæми берæ фæлтæрти хъазауатон архайди æскъуæлхтдзийнæдтæй. Æма нæ ихæс æй, цæмæй уой лæдæронцæ нæ фæсевæд, цитгийнаг син уа фидтæлти кадæ æма намус, уони хузæн æновуд уонцæ Райгурæн бæстæбæл, цæттæ уонцæ æ сæрбæлтау уодуæлдаййæй архайунмæ.

Мадзали архайгутæ æма иуазгутæ бабæрæг кодтонцæ, Устур Фидибæстон тугъди Чиколай дзиллæй Райгурæн бæсти сæрбæлтау æ цард ка иснивонд кодта, еци æдзард тугъдонти номерæн Чиколай бæрæгастæу ци мемориалон циртдзæвæн ес, еу усмæ æнæдзоргæй ралæугæй син æримистонцæ сæ рохс нæмттæ. Æнæгъæнæ мæйи дæргъи Ирæфи райони еугур скъолати дæр арæзт цæудзæнæнцæ аллихузон акцитæ, кълæсти сахæттæ, зонадон уроктæ æма равдиститæ. Ахурдзаутæн фадуат уодзæнæй спортивон еристи, æркæстити æма музейтæмæ экскурсити архайунæн.

Сæйрагдæр нисантæй ма еу æй сувæллæнтти ниййергутæ æма æхсæнади хæццæ куст. Е арæзт уодзæнæй, æфсæддон гъомбæладон кустæн ци устур нисан ес нæ царди, уой син балæдæрун кæнунмæ.

Уогæ, куд нисангонд цæуй, уотемæй мæйони рæстæг гъæуама айдагъ скъолати æнхæстгонд ма цæуа куст, фал си ниййергутæ дæр разæнгардæй архайуонцæ. Еци гъуддаг ба сæхемæ райсунæй ихæсгин æнцæ ниййергути æмбурдтæ. Уоми нисангонд æрцæуонцæ фæсевæди ’хсæн гъомбæладон кусти идарддæри исаразуйнæгтæ. Уой дæр зæгъун гъæуй, æма айдагъ аци мæйони архайунæй ма евгъуйа еци куст, гъæуй исаразун, цæмæй е не ’хсæнадон цардæн исуа æ аллибони фæткæ.

Нæ уацхæссæг