Аци сæрдигон тæвдæ рæстæг уæлдай «тæвдæ» æй, тагъд скъоладзау ка исуодзæнæй, еци сувæллæнтти ниййергутæн. Алкедæр си архайуй æ сабийи скъоламæ аккаг хузи бацæттæ кæнунбæл – уæледарæсæй, ахургæнæн киунугутæй æма æндæр æнæмæнгæ гъæугæ фæрæзнитæй…

Минкъий сагъæстæ не ’взуруй ниййергутæмæ, сæ кæстæрти ахурмæ кæци скъоламæ раттонцæ, уой фæдбæл дæр. Тæккæ хумæтæгдæр унаффæ – кæци микрорайони кенæ гъæууон бунати цæрис, уордæмæ хæстæгдæр ка ’й, еци скъоламæ курдиадæ бадæттун. Берети ба бафæндуй, сæ цæсти «кадгиндæрбæл» нимад ци скъола æй, уордæмæ ахурмæ раттун сæ сувæллони.

Аци гъуддаги кæронбæттæни унаффæ ка нæма рахаста, уони зæрдæбæл лæуун кæнæн, бæлвурд скъола равзарунæн син берæ рæстæг ке нæбал ес, уой.

Ахурадæ æма науки министради игъосункæнуйнагмæ гæсгæ, нуртæккæ скъолати косунцæ, фиццагкъласонти кæронбæттæн номхигъдтæ исбæлвурд кæнунбæл ка архайуй, уæхæн сæрмагонд къамистæ. Етæ косдзæнæнцæ 5 сентябри уæнгæ.

Уогæ ниййергути еу хай  рагацау батухстæнцæ æма  исбæлвурд кодтонцæ, сæ сабий кæци скъолай ахурдзау исуодзæнæй, еци фарста. Зæгъæн, Дзæуæгигъæуи ахуради управлений бæрæггæнæнтæмæ гæсгæ, абони уæнгæ фиццагкъласонти номхигъдти ес 3,2 мин биццеу æма кизгей бæрцæ (уонæй 256 æнцæ, æ ниййерæг сæрмагонд æфсæддон операций архайæг кæмæн æй, уæхæн сувæллæнттæ). Еумæ райсгæй, æнæгъæнæ республики нæуæг ахури анзи райдайæни скъолати дуарæй фиццаг хатт бахездзæнæнцæ авд мин биццеуи æма кизгемæй фулдæр.

АХУРИ НÆУÆГ АНЗ ЦÆГАТ ИРИСТОНИ РАЙДАЙДЗÆНÆЙ 4 СЕНТЯБРИ

Беслæни фиццаг скъолай æверхъау фудбæлахи ка бастъалдæй, уони номерæнæн хъонцгæнæн мадзæлттæ алли анз дæр фæццæунцæ арæзт 1-3 сентябри. Уомæ гæсгæ Цæгат Иристони ахури нæуæг анз дæр райдайуй æртæ бони фæстæдæр. Уотæ аци анз дæр – республики скъолати ахури нæуæг анзи фæдбæл мадзæлттæ арæзт цæудзæнæнцæ 4 сентябри, Рахесфарси райони ба – 5 сентябри.

Сентябри фиццаг æртæ боней дæргъи ба республики еумæйагахурадон организацити арæзт цæудзæнæнцæ номерæн мадзæлттæ, уæдта æдасдзийнади, æнгомдзийнади æма кæрæдземæн агъаз кæнуйнади фæдбæл ахурадон сахæттæ.

*  *  *

Цанæбæрæг рæстæг ма байзадæй, æма бабæй сентябри фиццаг бæнтти нæ республики скъолатæ алцæмæйдæр цæттæ уогæй, сæ дуæрттæ рæдауæй байгон кæндзæнæнцæ сæ уарзон скъоладзаутæн. Æма етæ дæр хуæрзæфснайд кълæсти æрфестæг уогæй, зæрдрохсæй рафардæг уодзæнæнцæ зонундзийнæдти бæсти бæлдтаг нæдтæбæл. Æма син мах ба зæрдиагæй зæгъæн: «Рæствæндаг уотæ, нæ кæстæртæ!..»