Нæ дзурддзæугæдæр лæгтæй еу, номдзуд финсæг æма æхсæнадон архайæг Малити Гадой фурт Геуæргий райгурдбæл рæхги æнхæст кæнуй нæудæс æма æхсæзинсæй анзи (зæронд нимадмæ гæсгæ райгурдæй 1886 анзи 23 октябри, æ уæлзæнхон цардæй ба рахецæн æй 1942 анзи 31 майи). Æма нæхецæн ихæсбæл нимайæн æ рохс ном ин æримисун. Малити Геуæргий цардвæндаги æма литературон исфæлдистади туххæй ци æрмæгутæ финст æрцудæй, уонæй равзурстан Цæгат Иристони адæмон финсæг Даурати Дамири финст уац. Мухур дæр æй кæнæн дигоронау, уомæн æма Малити Геуæрги ин цæйбæрцæбæл бæрзонд цитгийнаг æй, уотæ зæрдтагон цæстиварди имæ ’й нæ дигорон æвзаг дæр, еудадзуг дзурдæй дæр æма бæлвурд гъуддагæй архайуй æ сæрбæл, æй нæ газет «Дигорæ»-йи еузæрдиуон фарсхуæцæг.

МАЛИТИ Геуæрги

*  *  *

Тæходуй, æна,

Маргъ ку фестинæ,

Мæ унгæг къумæй

Фæццæйтæхинæ.

А дуйнетæбæл

Æрцæйзелинæ,

Кæми ци дессаг, –

Уой басгаринæ…

Тæходуй, æна,

Ацæмæзау дин

Æз ку фестинæ

Дессаг фæндургин:

Хъазбеги цъонгмæ

Исцæйцæуинæ,

Дессагон зартæ

Æрцæйцæгъдинæ…

Уæд еугур дуйне

Æримбурд уидæ,

Мæ цæгъдтæлтæмæ

Æригъосидæ.

Кæми ци седзæр,

Кæми ци мæгур, –

Бауарзионцæ

Мæ дессаг фæндур…

И фарни тунæ

Æрфелауидæ, –

Уарзондзийнадæ

Æрфедар уидæ.

Уæд алли адæм,

Уæд алли бæстæ

Æркалионцæ

Сæ тохæн гæрзтæ.

Фал ку не ’ууæндун

Æз, мæгур кизгай,

Ку нæ рохс кæнуй,

Мæ кизгон зæрдæ.

И дуйней сæргъи

И тугъдон мегътæ

Æрцæйдарунцæ

Сæ тогин тегътæ.

 1934, Мостиздæх