Нæ республики 24 феврали курдиæттæ есун райдайдзæнæнцæ, «Сæ цæсгæнттæмæ син бакæсетæ», зæгъгæ, аллианзон мадзали архайунæн.  Аци мадзал æй номерæн, æма æ нисанеуæг æй, цæмæй нæ Цитгин Уæлахези бæрæгбон бæрæг кæнуни рæстæг нæ республики еугур рауæнти дæр рекламæгæнæн æма æндæр игъосунгæнæн фæрæзнитæбæл æвæрд æрцæуонцæ Устур Фидибæстон тугъди хъазауатонти къартæ.

Цæгат Иристони аци гъуддаг иссæй еугурадæмон фæткæвæрди хузæн. Нур фæндзæймаг хатт арæзт цæудзæнæй. Бæгъатæрти туххæй бæрæггæнæнтæ бадæттæн уодзæнæй аци анз 17 мартъий уæнгæ. Раздæр, 2021-2024 æнзти дæргъи ветерантæй ке къартæ  æвæрд æрцудæнцæ рекламæгæнæн фæйнæгутæбæл, уони туххæй нæуæгæй бæрæггæнæнтæ дæттун нæбал гъæуй, етæ уотемæй дæр нæуæгæй æвæрд æрцæудзæнæнцæ еци фæйнæгутæбæл.

Курдиæттæ бадæттун æнгъезуй берæфункционалон центртæмæ.

Фæстереки райони: Доватори номбæл проспект, 8 хæдзарæ. Тел: +7(800) 444-62-15;

Цæгат-Нигулæн райони: Цоколай-фурти номбæл гъæунгæ, 5-аг хæдзарæ. Тел. +7(800) 444-62-15;

Промышленнон райони: Мичурини номбæл гъæунгæ, 67-аг хæдзарæ, тел. +7(800) 444-62-15.

Уæ зæрдæбæл уин лæуун кæнæн: курдиæттæ æнхæстгонд цæунцæ лæвар.

Къартæ рекламæгæнæн фæйнæгутæбæл æвæрд уодзæнæнцæ Уæлахези бæрæгбон бæрæггæнæн бæнтти, гъома, 1 майæй ба 10 майи уæнгæ.

«УÆЛАХЕЗИ ГÆДИБÆЛАСÆ»

Цæгат Иристон архайдзæнæй «Уæлахези гæдибæласæ» («Тополь Победы»), зæгъгæ, еугуруæрæсеуон мадзали. Е арæзт цæуй Устур Фидибæстон тугъди фæуунбæл 80 анзи ке ’нхæст кæнуй, уой  фæдбæл.

Арæзт ба цæуй национ проект «Экологон дзæбæхдзийнадæ»-йи фæлгæти  æма си архайдзæнæнцæ, куд Уæрæсей Федераций еугур рауæнти, уотæ  Цæгат-Кавкази æма Хонсар федералон округти регионтæ, уæдта Донецки, Лугански Адæмон республикитæ, Запорожьей æма Херсони облæсттæ.

Нæ республики æрдзæ гъæуайкæнуйнади министрадæ фæндæ бахаста «Уæлахези гæдибæласæ», зæгъгæ, акций рæстæг  мах республики дæр талатæ ниссадзун. Еци талатæ ласт æрцæудзæнæнцæ Волгогради облæстæй. Талатæ уодзæнæнцæ, Сталингради тугъдæн æвдесæн ка ’дтæй, уæхæн 100-анздзуд гæдибæласæй.

Уомæй уæлдай ма арæзт æрцæудзæнæнцæ аллихузон патриотон мадзæлттæ, уæдта базелдзæнæнцæ, нуриуæнгæ Уæлахези гæдибæлæстæ сагъд кæми æрцудæнцæ, еци рауæнтæмæ.