Дур-Дури астæуккаг скъолай азгъунсти  фарсбæл байгон кодтонцæ мемориалон фæйнæг Сагкати Олегæн – е ’фсæддон  ихæстæ рæстуодæй æнхæст кæнгæй, е бæгъатæрæй фæммард æй сæрмагонд æфсæддон операций рæстæг.

Аци гъуддаг исаразуни фæдбæл хъæппæрес равдистонцæ скъолай ахургæнгутæ æма ахурдзаутæ. Фæрæзнитæ æрæмбурд кæнуни гъуддаги архайдтонцæ еугурæй дæр.

Мадзалмæ хунд æрцудæнцæ Олеги бийнонтæ, хеуонтæ, тугъдон æмбæлттæ æма райони администраций разамунд.

Олег райгурдæй æма ирæзтæй Дур-Дури гъæуи. Ами каст фæцæй 2-аг астæуккаг скъола, уой фæсте юридикон ахурадæ райста Цæгат Иристони Хетæгкати Къостай номбæл паддзахадон университети юридикон факультети. Ахур фæууни фæсте ба ист æрцудæй æфсæддон службæмæ. Æрдзæй бæзæрхуг, иуонггин, физикон æгъдауæй æнхæст лæхъуæни раййивтонцæ уæлдæфон-десантон æфсæдти рæнгъитæмæ. Служби фæсте Мæскумæ рандæй хуæздæр куст иссеруни нисани хæццæ, цæмæй æ бийнонтæн агъаз кодтайдæ. 2022 анзи ба имæ æфсæддон комиссариатæй повесткæ æрбарвистонцæ. Олег æрвист æрцудæй раззаг рæнгъити рæнгъон тохæгæй.

Хуæрзæрæги ба ин лæвæрд æрцудæй кæстæр лейтенанти цин. Æхе бæгъатæр, æдæрсгæ тугъдонæй ке равдиста, уой туххæй ин лæвæрд æрцудæй цалдæр паддзахадон хуæрзеуæги: «Жукови номбæл» майдан, «Тугъди бæгъатæр архайæг»-и II-аг къæпхæни майдан, «Сæрмагонд æфсæддон операций архайæг»-и майдан. Æ рамæлæти фæсте ба ма ин исаккаг кодтонцæ «Лæгдзийнади» орден.

Сагкати Олег бæгъатæрæй фæммард æй, Херсони облæсти æ тугъдон ихæс æнхæстгæнгæй. Берети фæййервæзун кодта мæлæтæй, уомæн æма алкæддæр цудæй разæй лæгæмпурсти. Адтæй Райгурæн бæсти æцæг патриот. «Игон æма хæларзæрдæ æмбал. Æхе еугуремæндæр уарзун кодта – уæхæнæй æй бадардтонцæ сæ зæрдитæбæл е ’мкъласонтæ æма ахургæнгутæ. Уомæ гæсгæ сæ бафæндадтæй Олеги ном исцитгин кæнун», – загъта скъолай директори хуæдæййевæг Дзотти Виктория.

Уæхæн номерæн фæйнæг ма аци скъолай 2024 анзи игонгонд æрцудæй Мариати Ермакæн дæр – е дæр бæгъатæрæй фæммард æй сæрмагонд æфсæддон операций рæстæг.