Дзæуæгигъæуи райдæдта Адæмон аййевадон промыслити æртиккаг Еугуруæрæсеуон этникон фестиваль «Рон-2025».

Архайунцæ си, цар, æргъæ, дор, цилле, нимæт, æфсæйнаг, гъæдæ æма æндæр æрдзон æрмæгæй дзаумæуттæ кæнунмæ хъæбæр дæсни ка ’й, уæхæн æнтæстгин 50 адæймаги нæ бæсти алли регионтæй. Мадзал арæзт цæуй Цæгат Иристони Национ музейи равдистити зали.

Музеймæ равдист фæууинунмæ ка ’рбацудæй, етæ æхцæуæнæй кастæнцæ, дизайнертæ æма армдæснити куститæмæ.  Хе къохтæй худ кæсгон, балхъайраг, хъумухъаг национ уæледарæси хузтæ, хизинтæ, нимæттæ, сикъатæ, авгин æма æргъæй конд дзаумæуттæмæ.

Фестивали директор Бзарти Аланæ куд радзурдта, уотемæй мадзал арæзт цæуй нæ бæсти Президенти культурон хъæппæрести фонди агъазæй.

– Нæ рагфидтæлти культурæ æма армдæснийади истори багъæуай кæнунæн уæхæн этникон фестивальтæ гъæугæ ’нцæ. Æртиккаг хатт цæуй дууæ анземæ еу хатт арæзт аци мадзал, æма архайдзинан, цæмæй аллианзон исуа, æ арæнтæ ба урухæй-урухдæр кæнонцæ. Нæ зæрди ес, этникон фестиваль айдагъ Иристони нæ, фал Уæрæсей æндæр регионти дæр аразун. Агъазиау мадзал æй евгъуди этникон мотивтæ нуриккон уæледарæси хузтæмæ бахæссун æма уотемæй нæ рагфидтæлти культурон хæзнатæ æма бунтæ багъæуай кæнунæн. Махмæ, Иристони, абони дæр ес, нимæт цæгъдун, æргъæй, стæг, гъæдæй рагон дзаумæуттæ кæнун ка зонуй, уæхæнттæ. Амудтонцæ син сæ сæ хестæртæ æма еци зонундзийнæдтæ нæ фесавдæнцæ æности тари. Ке зæгъун æй гъæуй, фестивали бæнтти алкæмæн дæр фадуат уодзæнæй «Этно-деревня»-й цилле сæрбæттæнтæ бийун, æргъæй дзаумæуттæ æма æндæр хабæрттæ кæнуни мастер-класстæ, мастер-шоу æма Нарти гъæзтити архайунæн, – загъта Бзарти Аланæ.

Ирон къæртрæзти пъолций историон хузæ фæууинæн ес абони Хæсигати Лиди кустити. Армдæсни æхуæдæг куд загъта, уотемæй, кæд абони модæ æййевгæ цæуй æма къæртрæзтæмæ дæр хæссунцæ циуавæрдæр æййивддзийнæдтæ, уæддæр сæ æхуæдæг ба кæнуй, кæддæр нæ фидтæлтæмæ куд адтæнцæ, уотæ. Лидæ аци куст кæнуй æртиндæс анзи æма ин æнтæсгæ дæр кæнуй. Сувениртæн æлхæнунцæ туристтæ ирон куклатæ æма сæ дизайн устур цæмæдеси æфтауй алкедæр.

Цæмæдесаг адтæнцæ иннæ  армдæснити куститæ дæр. Ирон хæдæнттæ, сæракæй æма царæй конд дзаумæуттæ: æхцай кисæ, паспорт æма æндæр документти æндаг агъодитæмæ адæймаг кæсунæй не ’фсастæй. Иннети ’хсæн дæр уæлдай бæрæг дардтонцæ сæ бæрзонд аййевадæй. Равдисти архайгутæй алли силгоймаги дæр фæндадтæй ирон цилле сæрбæттæн æхе усхъитæбæл æркæнун, нæлгоймæгтæбæл ба – ирон хæдонæ искæнун. Хъæбæр цæмæдесаг адтæнцæ стæгæй конд дзæбодури, фури æма стори сикъатæ. Цæхæр калдтонцæ бони рохсмæ. Адæймагæй æруагæс дæр нæ кодта, уæхæн куститæ ма нури санкцити рæстæг кæнæн ес, е. Алцæмæн дæр гъæуй æрмæг, æма сæбæл цæмæй косай, уæхæн гæрзтæ. Фал адæймагæн æ тоги ку уа армдæснийадæ, уæд цийфæндийæй дæр искæндзæнæй æ гъуддаг.

Æрмæг бацæттæ кодта ХЕКЪИЛАТИ Маринæ