Уæхæн æй нæ Фидибæсти дзиллон хабархæссæг фæрæзнити агъазиаудæр ихæс. Æма уой æнхæст кæнунæн нæмæ ци фæрæзнитæ æма равгитæ ес, уонæй куд æнтæстгиндæрæй пайда гæнæн ес? Уобæл цудæй дзубанди, 13-14 ноябри Дзæуæгигъæуи ци æртиккаг Æхсæндуйнеуон медиафорум «ПРО Кавказ» арæзт æрцудæй, уоми. Арæзт ба æрцудæй Цæгат Иристони Сæргълæууæг Сергей Меняйлой хъæппæресæй æртиккаг хатт.

Мадзали исаразгутæ æма архайгутæн зæрдиагæй райарфæ кодта Уæрæсей Президенти Æнхæстбаргин минæвар Цæгат-Кавказаг федералон зилди Юрий Чайка.  Æ арфи финстæги уотæ баханхæ кодта:

– Цæгат Иристони иуазæгуарзон зæнхæбæл æрæмбурд æнцæ æфсæддон уацхæсгутæ, пресс-службити разамонгутæ, блогертæ. Форуми сæйрагдæр цæбæл цæудзæнæй дзубанди, еци фарста хумæтæги не ’рцудæй æвзурст – геополитикон уавæри æййивддзийнæдтæ ’нцæ медиакъабази трансформаций рæуагæ. Нæ нихмæ алли фудракæндтитæ аразæг æдзæстуарзон паддзахæдтæ  архайунцæ дзиллон хабархæссæг фæрæзнити фæрци махбæл цъифкалæн кæнун Цæгат Кавкази, еумæ райсгæй, æнæгъæнæ Уæрæсей информацион итигъдадæй исаразтонцæ тугъди тæлмæ. Форум «ПРО Кавказ»-и куст зингæ агъаз уодзæнæй, абониккон цардарæзти уавæртæмæ гæсгæ аци къабази размæ ци сагъæссагдæр фарстатæ лæуунцæ, уонæбæл рæстмæ райаразунбæл архайунæн.

Царди ци аллихузон æййивддзийнæдтæ цæуй, уони уавæрти бундоронæй æййивд цæуй дзиллон хабархæссæг фæрæзнити архайд дæр. Сæрмагонд æфсæддон операций фæуун цæйбæрцæбæл хæстæгдæр кæнæн, уоййасæбæл лæмбунæгдæр цæстæ гъæуама дарæн нæ медбæсти, Кавкази уавæрмæ, зæгъгæ, адтæй форуми иуазæг, игъустгонд æфсæддон журналист Александр Сладковæн æ радзубандий сæйраг гъуди:

– Кавкази фæзуат хъаурæгин æй уодискондæй, æ рæстзæрдæдзийнадæй æма хуæрзæгъдаудзийнадæй. Кавказмæ уарзон цæстæй кæсунæн устур агъаз æй аци медиафорум. Æнæуинондзийнадæ махæн нæ над нæй… Форуми дууæ боней медæгæ равгæ нæййес нисантæ æма фарстатæбæл лæмбунæг æрдзубанди кæнунæн, фал уæддæр хуарз æй, æгайтима ма сæбæл ке дзубанди кæнæн æма еумæйагæй нæ идарддæри архайди нисантæ ке бæлвурд кæнæн, е.

Медиаитигъдади ци фарстатæ æвзуруй, уони вазуггин æма ахсгиагбæл нимайуй мадзали архайæг, Уæрæсей адæмон артист, кинорежиссер æма телеуинунади амонæг Михаил Пореченков.   Æ гъудимæ гæсгæ си берæ ес тæссаг фæззелæнтæ:

–  Æз аййевадон къабази минæвар дæн, æма ами дæр берæ ес, тæссаг сагъæсти нæ ка æфтауй, уæхæн  фарстатæ. Фæндуй мæ, цæмæй нæуæг фæлтæр тундзонцæ нæ доги хъайтарти фæнзунмæ.  Уони хъайтартæ рæстæг æхуæдæг искодта, уони бæлвурд кæнун гъæуй, уони туххæй дзорун гъæуй, цæмæй нæуæг фæлтæр зона, нæ паддзахади исонибон зæрдæмæдзæугæ ке æма цæй фæрци уодзæнæй, уой. Сæ гъомбæлади ба медиакъабазæй берæ аразгæ ’й, уомæн æма сæ царди фулдæр хай уой хæццæ баст æй.

Фиццаг федералон телеканали амонæг Александр Смол фиццаг хатт нæ архайуй аци мадзали. Уомæ гæсгæ ба, раздæри рæстæгути хæццæ рабаргæй, Дзæуæгигъæуи агъазиау æййивддзийнæдтæ ке цæуй, уобæл æ бон æй æргомæй зæгъун.

Форуми архайгутæн «ТАСС Кавказ»-и регионалон информацион центри генералон директор Андрей Кондрашови арфи финстæг бакастæй æ директор Низами Гаджибалаев.

Медиафорум байгон кæнуни мадзали рæстæг нæ республики Сæргълæууæг Сергей Меняйло баханхæ кодта:

– Æртæ анзей размæ махæй беретæ æнхæст нæ лæдæрдтæнцæ, информацион тугъд рагæй ке цæуй нæ нихмæ, гъулæггагæн, уомæ фагæ гъосдард не ’рцудæй æма фæммулди бунати изадан. Еци тугъд нур дæр ма цæуй, медиаитигъдадæ си идзаг кæнуй, е ба адæми гъудикæнуйнадæбæл зæран æрдæмæ æнæзингæ нæй. Мах æй нæхе рæстдзийнадæ хæссæг æрмæгæй ку нæ идзаг кæнæн, уæд еци ихæс сæхемæ райсдзæнæнцæ æндæртæ, нæ нихмæ знаггадæ аразгутæ. Мах ан нæ бæсти патриоттæ, уарзæн нæ агъазиау бæстæ, уæдта уарзæн æма сæрустур ан нæ минкъий райгурæн зæнхæй. Нæ абони истори финсунцæ адæм, мах дæр сæ хæццæ, уотемæй. Абони тугъд цæуй нæ зундирахаст æма гъудикæнуйнадæбæл. Уобæл æй сæ тох сæрмагонд тугъдон операций архайгутæн.

Форуми фиццаг бон арæзт æрцудæнцæ пресс-конференци, уæдта пленарон æмбурд. Архайдтонцæ си нæ республики разамонæг Сергей Меняйло æма уæрæсейаг медиай зундгонд архайгутæ Игорь Прокопенко, Владимир Соловьев, Сергей Кузовников æма Дмитрий Щугорев.

Форуми кусти дуккаг бон дæр арæзт æрцудæй берæ аллихузон мадзæлттæ. Уонæн сæ сæйрагдæр иссæй нæ республики Сæргълæууæг Сергей Меняйлой фембæлд дзиллон хабархæссæг фæрæзнити минæвæртти хæццæ æма син лæмбунæг дзуæппитæ равардта сæ фарстатæн. Еугур еци хабæртти туххæй бæлвурддæрæй финсдзинан нæ газети хæстæгдæр номертæй еуеми.