Берæ пособити бæрцæбæл ахедæг сувæллонæн фæццæрунæн гъæугæ тæккæ минкъийдæр хæрзти бæрцæ аци анзи райдайæнæй фæстæмæ Цæгат Иристони æй 15 481 соми.

Архайæг закъонæвæрунадæ куд амонуй, уотемæй Уæрæсей алли региони дæр сувæллæнттæн, кенæ косунгъон гъомбæл адæмæн ке æвæрунцæ, сувæллæнтти къуар пособий бæрцæ бæлвурд кæнунцæ фæццæрунæн гъæугæ тæккæ минкъийдæр еци хæрзти бæрцæмæ гæсгæ. Фæццæрунæн гъæугæ тæккæ минкъийдæр хæрзти бæрцæ ку фæффулдæр кодтонцæ, уæд бæсти Социалон фонди цæгатиристойнаг хайадæ сувæллонгин бийнонтæн гъæугæ пособити бæрцæ автоматикон уагæй нæуæгæй банимадта.

Тæккæ минкъийдæр хæрзти бæрцæбæл ку бафтудтонцæ, уæд нæ республики 17 анземæй кæстæр сувæллæнттæн гъæугæ еумæйаг пособий бæрцæ рауадæй 15 481 соми (100 проценти нимайгæй), 11 610, 75 соми (75 проценти нимайгæй) æма 7  740,5 соми (50 проценти нимайгæй). Уæ зæрдæбæл уин лæуун кæнæн: пособий æртæ амунд бæрцей еу исæвæрунцæ бийнонти æфтуйæггæгти бæрцæмæ гæсгæ: æфтуйæггæгти бæрцæ цæйбæрцæ минкъийдæр æй, уомæй фулдæр æй лæвæрд пособий бæрцæ.

Фæццæрунæн гъæугæ тæккæ минкъийдæр хæрзти бæрцæ ку фæффулдæр кодтонцæ, уæд æнгъæлдзау силгоймæгтæн æмбæлгæ еумæйаг пособий бæрцæ рауадæй 17  396 соми (100 проценти нимайгæй), 13  047 соми (75 проценти нимайгæй) æма 8  698 соми (50 проценти нимайгæй).

Уæрæсей Социалон фонди цæгатиристойнаг хайадæ алли нæуæг мæйи дæр раздæри мæйи туххæй сувæллæнтти пособитæ бафедуй. Уой хæццæ, бийнонтæ евгъуд анзи декабрæн æмбæлгæ пособитæ райстонцæ æмгъудæй раздæр – 25 декабри. Республики фæццæрунæн гъæугæ тæккæ минкъийдæр хæрзти нæуæг бæрцæ нимайгæй, аци анз январи æмбæлгæ фулдæргонд феддонтæ ниййергутæн бафтуйдзæнæнцæ феврали райдайæни.

Уомæй уæлдай, январь æма феврали бæсти Социалон фонди цæгатиристойнаг хайадæ 1,5 анземæй кæстæр сувæллонмæ зелуни фæдбæл аллимæйон пособий, уæдта сувæллони райгурди, кенæ æ гъомбæл кæнунмæ райсуни рæстæг гъæугæ еумæйаг пособий бæрцæбæл бафтаудзæнæй. Аци анз Цæгат Иристони сувæллонмæ зелуни фæдбæл аллимæйон пособий тæккæ минкъийдæр бæрцæ уодзæнæй 9  227 соми. 1,5 анземæй кæстæр сувæллонмæ зелуни фæдбæл пособий тæккæ фулдæр бæрцæ 68 995,48 сомей уæнгæ исирæздзæнæй. Æнгъæлдзаудзийнадæ æма сувæллони райгуруни фæдбæл пособий бæрцæ (140 боней дæргъи отпуски туххæй) 103  285 сомемæй исхъæртдзæнæй 794  355,8 сомемæ. Пособий бæлвурд бæрцæ аразгæ ’й мади мизди бæрцæй.

Аци анз Цæгат Иристони сувæллони райгурд æма æ гъомбæл кæнунмæ райсуни рæстæг федуйнаг пособий бæрцæ ’й 24  604,3 соми (уæ зæрдæбæл уин лæуун кæнæн, ниййергутæй еуемæн ке дæттунцæ, дзубанди цæуй уæхæн еухаттон феддонбæл). Дууæ æма уомæй фулдæр сувæллони райгурди рæстæг амунд пособи федунцæ алли сувæллонæн дæр. Ниййергутæй еу кæд косуй, дуккаг ба кæд нæ косуй, уæд пособи федунцæ косæг ниййерæгæн.

Аци феддони бæрцæ хъæртуй региони адæймагæн фæццæрунæн æмбæлгæ тæккæ минкъийдæр хæрзти бæрцæмæ, æма аци анз Цæгат Иристони амунд хæрзти бæрцæ уодзæнæй 15  481 соми.

Уæрæсей Социалон фонди еумæйаг контакт-центр: 8-800-100-00-01 (телефонæй дзорæн ес лæвар; регионалон хайади кусти фæткæ: авдисæрæй цуппæрæни уæнгæ – 9 сахаттемæй 18 сахаттей уæнгæ, майрæнбони ба – 9 сахаттемæй 16 сахатти æма 45 минутей уæнгæ).

Уæрæсей Федераций Социалон фонди цæгатиристойнаг хайади пресс-службæ