Цæгат Иристони дæс æма инсæй фиди есунцæ агъаз Уæрæсей Социалон фонди республикон хайадæй есунцæ агъаздзийнади фæрæзнитæ, сувæллонмæ 1,5 анзей кари уæнгæ ке зелунцæ, уой туххæй.

Федгæ æнцойнæуагъди барæ анз æма æрдæги уæнгæ сувæллонмæ зелуни туххæй ес айдагъ мадæн нæ, фал фидæн дæр, кенæ сабийи æндæр косæг хæстæгутæй сувæллонмæ ка зела, уомæн.

Цæгат Иристони 2025 анзи дæс æма инсæй косæг фиди есунцæ агъаз Уæрæсей Социалон фонди регионалон хайадæй. Феддони бæрцæ ’й сувæллонмæ зелуни дууæ анзей агъоммæ рæстæмбес мизди дууинсæй проценти. 2025 анзи 1 февралæй фæстæмæ сувæллонмæ зелуни тæккæ минкъийдæр агъаз æй 10103,83 соми, никки фулдæр ба – 68995,48 соми.

Кæд мадæ æнгъæлдзау æма  сувæллон райгуруни æнцойнæуагъди фæсте нисан кæна кустмæ рацæун, уæд фиди гъæуй кустдæттæгмæ дууæ курдиади бадæттун: сувæллонмæ зелуни фæдбæл аллимæйон феддон иснисан кæнуни туххæй æма æртæ анзей уæнгæ сувæллонмæ зелунæн æнцойнæуагъд райсуни туххæй.

Уой фæсте кустдæттæг Уæрæсей Социалон фонди Цæгат Иристон-Аланий хайадæмæ куддæр фегъосун кæна, уотæ дæс косгæ боней дæргъи нисангонд æма фист æрцæудзæнæй анз æма æрдæги сувæллонмæ зелуни аллимæйон феддон. Иннæ мæйтæн феддон фист цæудзæнæй мæйи 8-аг нимæдзæй фæстæдæр нæ.

Агъаз фист цæуй фиццаг, дуккаг, æртиккаг æма уотæ идарддæр сувæллони райгурдмæ нæ кæсгæй. Кæд фидæ анз æма æрдæг сувæллæнттæй дууемæ кенæ фулдæремæ зелуй, уæд алли сувæллонæн дæр феддон нисангонд цæуй хецæнæй, фал еумæйаг хигъди бæрцæ гъæуама фулдæр ма уа ниййерæги рæстæмбес мизди 100 процентемæй, уæдта феддони дууæ тæккæ минкъийдæр бæрцæй дæр минкъийдæр гъæуама ма уа.

Рæстæмбес мизд нимайгæй, фидæ сувæллонмæ зелуни туххæй æнцойнæуагъди ци рæстæг адтæй, еци къæлиндарон æнзтæ баййевæн ес уой размæ æнзтæй, кæд уой феддони бæрцæ фæффулдæрæн агъаз кæна, уæд. Уой туххæй дæр курдиадæ бадæттун гъæуй кустдæттæгмæ.

Фарæй фæстæмæ анз æма æрдæганздзуд сувæллонмæ зелуни  агъазтæ федуни фæткæ æййивд æрцудæй. Нур ниййергутæн еци-еу рæстæг сæ бон æй феддонтæ кустæй есун дæр, æнæгъæнæ бон косонцæ, идæрддзæфмæ архайуонцæ æви бони æрдæг косонцæ. Е хауй, ниййерæг æ сувæллонмæ зелгæй, æнцойнæуагъди рæстæги дуккаг кустмæ ку бацæуа, уæддæр.

– Кæд фидæ косуй цалдæр кустдæттæгемæ, уæд сувæллонмæ зелуни туххæй аллимæйон феддон нисангонд цæуй айдагъдæр еу организаций. Кæд сувæллони фидæ индивидуалон амалгъон æй, уæд ин барæ ес агъази тæккæ минкъийдæр бæрцæ есунæн, æцæг кæд раздæри анзæн бархеуон фæдзæхстади феддонтæ бафиста, уæд, фæббæрæг кодта Уæрæсей Социалон фонди Цæгат Иристони  хайади разамонæг Милдзихти Аслан.

Ниййергутæй еу сувæллонмæ ци рæстæг зела, уой фæдзæхстадон фæллойни æмгъуд нимад цæуй кусти кенæ æндæр архайди  уни хæццæ æмхузон. Алли анзæн дæр нимад цæунцæ пенсион коэффициенттæ.

Кæд фиццаг сувæллонмæ зилд цæуй, уæд анзи æнцойнæуагъдæн ниййергутæй еуемæн нимад цæуй 1,8 коэффициенти, дуккагæн – 3,6, æртиккагæн æма цуппæрæймагæн – 5,4. Кæд æнцойнæуагъд анзæй минкъийдæр, кенæ фулдæр æй, уæд фæллойни æмгъуд æма пенсион коэффициенттæ нимад цæунцæ æцæг æмгъудмæ гæсгæ.

Еугонд контанкт-центр: 8-800-100-00-01.

Уæрæсей Социалон фонди Цæгат Иристони хайади кусти фæткæ: авдисæрæй цуппæрæнмæ 9 сахаттемæй – 18 сахаттей уæнгæ, майрæнбони ба 9-16.45 сахаттемæ.

Уæрæсей Социалон фонди Цæгат Иристон-Аланий хайади пресс-службæ