Нæ рагфидтæлтæй нин байзадæй мæнæ ауæхæн загъд: «Бийнонтæ дарунæн æма хæссунæн берæ цидæртæ гъæуй!..» Æма еци гъуддаги æнтæстгинæй ка исарæхсуй, еци бийнонтæ фæрнæйдзаг дæр фæуунцæ, уæдта гъæубæсти ’хсæн дæр сæ фæннимайунцæ. Бийнонти цæрунгъондзийнадæ цæйбæрцæбæл ахсгиаг æй, айдагъ уонæн сæхецæн нæ, фал æхсæнадæн æнæгъæнæйдæр, уой хуарз æма балæдæрдтæнцæ нæ нури хецауеуæггæнгутæ дæр. Æма цидæртæ арæзт цæуй бийнонтæбæл хуæрзауодунæн. Зæгъæн, нæ республики Сæргълæууæг Сергей Меняйлой хъæппæресæй, еумæйагæй бæлвурд рæстæгутæ ка фæццардæй, еци бийнонтæ хуарзæнхæгонд цæудзæнæнцæ æхцай фæрæзнитæй. Аци æгъдау куд гъæуама æнхæстгонд цæуа, уобæл дзубанди цудæй, нæ республики Хецауади сæрдар Дзанайти
Бариси разамундæй ци кезуй æмбурд адтæй, уоми.

Нæ республики фæллойнæ æма социалон ирæзти министри ихæстæ рæстæгмæ æнхæстгæнæг Мамати Анджелæ уотæ фегъосун кодта:

– Еумæйаг бийнонтæй 25, 50, 60 æма 70 анзи ци нæлгоймаг æма силгоймаг фæццардæнцæ, уонæн аци анз ратдзæнæнцæ сæ еумæйаг царди æнзти æмбæрцæ æхцай фæрæзнитæ. Аци гъуддаг æнхæстгонд цæудзæнæй еугур районти дæр.

Аци хъæппæрес хуарз кæд æй, уæддæр, махмæ гæсгæ бустæги æнхæст ба нæй. Нæ зонæн, еци бæрци æнзтæ цæмæ гæсгæ æвзурст æрцудæнцæ, уой, фал, зæгъæн, æндæр юбилейтæ ци хæларæй цæрæг бийнонтæбæл æнхæст кæнуй, еумæйагæй ка фæццардæй, уони ба исцитгин кæнун цæмæннæ æнгъезуй? Æхсæнадон ахедундзийнадæ кæмæн ес, еци гъуддаги æгириддæр ма уа къæмæ, æнæгъæнæйдæр дзиллæн æхцæуæн уа. Уæдта, баруагæс уи уæд, барæвдауни аккаг бийнонтæ куд цитгингонд æрцæуонцæ, уотæ разæнгарддæр уодзæнæнцæ æхсæнадон царди арфиагдæрæй архайунмæ. Нæ зæрдæ дарæн, æма нин нæ загъд  игъосæг фæууодзæнæй…

Мамати Анджелæ ма фегъосун кодта еума социалон мадзали туххæй дæр – Федералон проект «Хестæр фæлтæр» æма республикон проект «Бийнонтæ»-йи бундорбæл 356 адæймаги, уони хæццæ – фæккæсунгъæуагæбæл ке банимадтонцæ, уæхæн сæйгитæ, æнæкустгъон, сæрмагонд æфсæддон операций архайгутæ дæргъвæтийнæ агъаз есдзæнæнцæ. Æййивддзийнæдтæ бахæсдзæнæнцæ, 2022 анзи февралæй сæрмагонд æфсæддон операций ка архайдта æма ка фæммард æй, уони бийнонтæн еухаттон агъази туххæй Хецауади унаффæмæ.

Æмбурди ма дзубанди цудæй, нæ республики социалон-экономики ирæзтæн ахсгиаг ка ’й, уæхæн фарстати фæдбæл дæр. Æма уони фæдбæл ба хецæнæй бундорон æрмæгутæ мухур кæндзинан нæ газети идарддæри номерти.