КЪЕРЕЙ УÆЛЕ – ЦЪОПП

Амонуй равдесуни фæдбæл кæнгæ миуæ. Дзурдбаст равзурдæй царди æцæгдзийнадæй, Устур Фидибæстон тугъди фæсте

æнзти мæгур рæстæги. Еци дзамани будуйраг адæм фулдæр цардæнцæ нартихуари кæрдзин æма хуæрунæн бæзгæ кæрдæгутæй. Ефстагмæ адтæй фид, уорсаг, мæнæуи инсад. Фал адæм уæддæр кодтонцæ сæ бæрæгбæнттæ, кувдтитæ, киндзæхсæвæртæ. Уæд кувдтитæ æма киндзæхсæвæртæн хеуæнттæ, синхбæстæ, гъæубæстæ æхца нæ хастонцæ, фал æртæ уæлвицки, карк (кенæ æйкитæ) æма графин арахъ. Цихтгунтæн цихт нæ фагæ кодта, æма къеретæ цæмæй гахгундæр æма аййевдæр адтайуонцæ, уой туххæй син æфсинттæ пеци байвæруни размæ сæ тæккæ астæу цихти цъопп æвардтонцæ.

ГЪÆДДЗАУИ ХУÆРД БАКОДТА

Зудæй берæ ка бахуæруй, уомæй фæззæгъунцæ уотæ. Нури доги æрдзон газ бахъæрттæй рæбуйнаг гъæутæмæ дæр. Æма уомæй пайда кæнунцæ хуæруйнаг кæнгæй. Раздæр ба сахарти æма гъæути цæргути каст адтæй гъæдæмæ. Адæм галтæбæл æма бæхтæбæл цудæнцæ согмæ. Сæумæраги галти кенæ бæхти исефтиндзæ æма ку æрдæгæфсæстæй, ку æстонгæй – сæумæраги хуаллаг алке зæрдæ нæ агоруй, уотемæй даргъ надбæл гъæдæмæ ранæхстæр уисæ. Уоми брички дзаг сог ракалун гъæуй фæрæтæй, бахсæдун æма исамайун. Дæ хедæйдзаг хæдонæ дæ фæсонтæбæл ниссор æй, уотемæй изæрæй согти сæрбæл исбадтæ æма ранæхæстæр дæ гъæумæ. Уомæй айдагъ дæхецæн нæ ласис сог, фал кезугай колхозонтæй алли хæдзарæн дæр. Гъæддзауи куст уæззау фудæбон ке адтæй, уой зудта алкедæр æма ин е ’рцудмæ, кæмæн куд æ бон адтæй, уæхæн хуæруйнаг æрцæттæ кæнидæ. Берæ бийнонтæ син сог бричкæй раревæд кæнун дæр нæбал бауадзиуонцæ, сæхуæдтæ ’й раревæд кæниуонцæ æма хуаллаг æрæвæриуонцæ хъадиртæн дæр.

Гъæддзау æхе ку æрфестæг кæнидæ, æ хедæйдзаг цæсгонбæл дон ку искалидæ æма фингæбæл еци стонгæй ку æрбадидæ, уомæй ма еу арахъ ку раниуазидæ, уæд уомæ бакæсæ – хуæрдæй æй ка æфсаста. Æфсес ба стонги нæ лæдæруй. Æма ибæл æгæр тагъд æма берæ хуæраги ном исбадтæй.