Уæрæсей Федераций, Республикæ Цæгат Иристон-Аланий гъæууон хæдзаради министрадтæ æма «Россельхозбанк»-и хъæппæресæй бундор æвæрд æрцудæй фермерти скъолайæн. Ес ин устур ахедундзийнадæ агропромышленнон комплекси ирæзтæн, гъæууон хæдзаради къабазæ æхемæ ка æлвасуй, фонс æма зæнхи куст ка уарзуй, уони фадуæттæ æма гæнæнтæ урухдæр кæнунæн.

Фермерти скъола фæззиндтæй фарæ, ахурмæ анз дууæ хатти есуй, уалдзæг æма фæззæги, фал си ахур кæнун ке фæндуй, уæхæн гъæууон хæдзарадæ уарзагæ фæсевæди нимæдзæ ба нæ республики фулдæрæй-фулдæр кæнуй. Æртиккаг къуар æмбурдгонд æрцудæй, е ба уобæл дзорæг æй, æма Цæгат Иристони гъæууон хæдзарадæмæ устур æргом æздæхт ке цæуй, æнæмæнгæ гъæугæ къабазæ ке ’й æма си алли кари адæм дæр зæрдиагæй ке архайунцæ.

Цалдæр боней размæ æртиккаг хатт байгон кодта æ дуæрттæ ахур кæнунмæ 30 адæймагемæн. Уонæй еуæндæс æнцæ сæрмагонд æфсæддон операций архайгутæ. Институти ректори æндагон æма æхсæнадон бастдзийнæдти фæдбæл агъазгæнæг Махъоти Мæдинæ куд радзурдта, уотемæй нæуæг проект бавдиста, куд ахсгиаг æма гъæугæ ’й, уой.

Фæсевæд нæмæ зæрдиагæй тундзунцæ, фæндуй сæ бæлвурддæр æма арфдæр базонун зæнхæ æма фонси куст. Нур ба ма нæмæ бафтудæй кæсалгдарунади хæдзарадæ дæр. Аци хатт ахуртæ дæр сæрмагондæй уодзæнæнцæ кæсалгдарунади къабази. Цæмæдесаг кæсунцæ фæсевæдмæ нуриккон уавæртæ, ес сæмæ бæллецтæ, нисантæ, æма сæ равзурст надбæл нифсгунæй цæунцæ. Ахуртæ ’нцæ лæвар, конкурсон бундорбæл, айдагъ сæрмагонд æфсæддон операций архайгутæмæ еци конкурсон ихæстæ нæ хаунцæ. Æригон специалисттæ базондзæнæнцæ фермерон хæдзаради лæмбунæг гъуддæгутæ æма сæ продукцибæл бакосуни биотехнологон фарстатæ. Фермерти скъолай ахурдзаутæ ’нцæ алли дæснийæдтæбæл хуæст адæймæгутæ, фал фæндæ кæнунцæ идарддæр Гъæууон аграрон университетмæ ахур кæнунмæ бацæун, цæмæй сæхе «иссеронцæ» агропромышленнон комплекси архайди, – загъта Махъоти Мæдинæ.

Мадзал райдæдта традицион ирон æгъдауæй. Æртæ къерей æма бæгæний къосæй Цитгин Хуцаумæ искувта Республикæ Цæгат Иристон-Аланий гъæууон хæдзаради министри хуæдæййевæг Къадзати Игорь. Бафæдзахста Дуйнескæнæгбæл нæ республики цæргути, фæсевæди æма, нæуæг проекти нисантæ æнтæстгинæй цæмæй цæуонцæ, уони. Нæуæг скъолай ахурдзаутæн арфитæ ракодта ректор Гогати Олег.

– Мæнæн хъæбæр æхцæуæн æй, фæсевæди нимæдзæ гъæууон хæдзаради архайунмæ фулдæр ке кæнуй. Нифс мæ ес, кæддæри хузæн нæ республики аци къабазæ æ тухи ке бацæудзæнæй æма бабæй нæ будурти тиллæг æма фермитæ гъæздуг продукци фæлхас ке кæндзæнæнцæ, уомæй. Аци сезони æртиккаг проект æй нур, зæгъæн ес, æма агропромышленнон комплекси ирæзтмæ не ’ртиккаг байвæрæн. Еумæ базондзинан нæ бæсти фæлхасадон фарстатæ балæмбунæг кæнун æма паддзахади нисантæ ’нхæст кæнун. Хуæнхон аграрон университет ба хъæбæр хуарз бундор æй, хуæрзгъæдæ специалисттæ цæттæ кæнунæн, – загъта Гогати Олег.

«Россельхозбанк»-и цæгатиристойнаг филиали директор Мзокти Олег дæр  райарфæ кодта мадзали архайгутæн æма фæннисан кодта, нæ бæсти фæлхасади хузæнондзийнадæ айдагъ агъазиау кустуæттæй аразгæ ке нæй, аци къабазæмæ сæхе æвæрæн ке хæссунцæ минкъий æма рæстæмбес бизнеси хæдзарæдтæ дæр.

– Нæ республики фермертæ архайунцæ сæ кусти бæрæггæнæнтæ бæрзонддæр кæнунбæл, мах ба син уавæртæ аразæн. Зæгъун ма мæ фæндуй уой, æма аци хатт фермерти скъолай ахур кæндзæнæнцæ сæрмагонд æфсæддон операций архайгутæ æма сæ бийнонтæ – еуæндæс адæймаги. Е агъазиау хуасæ ’й сæ социалон уагæвæрдæн, фæндуй сæ гъæууон хæдзаради архайун, æма син еци фадуæттæ ес, – загъта Мзоки-фурт.

Фермерти скъолай ахуртæ цæудзæнæнцæ дууæ мæйи æма æрдæг. Æртæ сезоней рауагъдонтæ сæ продукций хузтæ мадзали архайгути размæ рахастонцæ. Ка цæбæл исахур æй, ци базудта, еци хуæруйнæгтæ равардта сæрмагонд равдисти. Аци рауæн фæууинæн адтæй дзоли алли хузтæ, халсартæй конд хуæруйнæгтæ. Фæсевæд гитари зæлтæмæ иссугътонцæ сæ традицион символикон арти зинг дæр, уæдта рандæнцæ аудиторитæмæ сæ ахури лекцимæ.

ХЕКЪИЛАТИ Маринæ