Адæймагон æхсæнадæ ку равзурстæй, еци недзамантæй ардæмæ ци алли хъилматæй «фæссæйгитæ» æй, уонæн сæ цæрæццагдæртæй еу разиндтæй, мæнæ нур коррупци ке хонæн, еци бæлах. Ци нæ ин кæнунцæ, уæддæр ин искунæг уæн нæййес æма нæййес. Иссæй дуйней еугур паддзахæдти дæр хуæцгæ нези хузæн. Уомæ гæсгæ, æвæдзи, сæрмагондæй нисангонд æрцудæй æ нихмæ тох кæнуни Æхсæндуйнеуон бон – бæрæггонд цæуй 9 декабри.

Гъулæггагæн, еци незæй игъæстæгонд æнцæ Уæрæсей нæ абони цардарæзти еугур къабæзтæ дæр. Уой фæдбæл нæ дзиллон хабархæссæг фæрæзнити ахид райгъусуй аллихузон хабæрттæ. Зæгъæн, мæнæ куд фегъосун кодтонцæ, уотемæй Уæрæсей æдасдзийнади федералон служби цæгатиристойнаг управлений архайди фæрци æргомгонд æрцудæй паддзахадон косæндæнттæй еуей косгути æнæзакъон архайд. Уорæд æрцудæнцæ агропромышленнон комплекси продукций хуæрзгъæдæдзийнадæн аргъгæнæг федералон косæндони цæгаткавказаг хайади разамонгутæй еу æма специалист. Гурусхæгонд кæбæл æрцудæй, уони фудгин кæнунцæ, 400 мин сомей бæрцæ гæртан ке райстонцæ, уой туххæй.

Оперативон æрмæгутæмæ гæсгæ, фудгингонд ка ’рцудæй, етæ бадзубанди кодтонцæ республики фермерон хæдзарæдтæй еуей минæвари хæццæ, кæсалгдаруни кустадæ райдайуни нисани хæццæ ин ци зæнхи хай радех кодтонцæ, уой рекультиваций проект исаразунбæл. Уой хæццæ ма, федералон косæндони специалисттæ сæхемæ ихæс райстонцæ, проект фермери пайдайæн ке исараздзæнæнцæ (гъома, рекультиваций куститæн гъæугæ хæрзтæ гæгъæдибæл финстæй зингæ ке фæмминкъийдæр кæндзæнæнцæ), уомæй. Æма айдагъ е нæ. Фермерæн зæрдæ байвардтонцæ æ идарддæри амалгъонадон архайди дæр ин агъаз ке кæндзæнæнцæ, уомæй.

Амунд оперативон-агорæн æрмæгути бундорбæл Уæрæсей Федераций Слестгæнæг комитети Цæгат Иристони управлений косгутæ Уæрæсей Уголовон кодески 290-аг статьяй 5-аг хаййи («Гæртан райсуни цау») бундорбæл фудгингонди нихмæ исаразтонцæ уголовон гъуддаг.

Аци хабармæ гæсгæ, уой зæгъуйнаг ан, æма нæ цардарæзти хуæрзæгъдаудзийнадæ нин ихалæг ка ’й, еци фæззиндтитæ кунæггонд цæуонцæ, уой туххæй арæзт цæуй аллихузон мадзæлттæ. Зундгонд куд æй, уотемæй нæ республики архайуй коррупцийæн нихкъуæрддæттæг  куст рæстмæгæнæг Къамис. Æрæги ин адтæй æ кезуй æмбурд. Разамунд ин лæвардта Цæгат Иристони Сæргълæууæг Сергей Меняйло.

Бюджетон закъонæвæрунадæ æнхæст кæнуни гъуддаги анзи дæргъи ци æгъдауихæлдтитæ æргомгонд æрцудæй, уони фæдбæл адтæй æ дзубанди Цæгат Иристони Контролон-ревизион управлений разамонæг Дзугкойти Аланæн. Æ дзубандимæ гæсгæ, анзи райдайæнæй нурмæ бюджетон къабази ци æгъдауихæлдтитæ рартастонцæ, уонæн æхцайæй нимадæй  сæ еумæйаг бæрцæ аст æма цуппаринсæй миллион сомемæй фæффулдæр æй. Цæстдарæн архайди бæрæггæнæнти бундорбæл арæзт æрцудæй административон æгъдауихæлдтити туххæй суагъитæ. Уонæй нуриуæнгæ каст æрцудæй аст административон гъуддагемæ.

Æмбурди рæстæг къамиси иуонгтæ сæрмагонд æргом раздахтонцæ, республики аллихузон есбойнади косæндæнтти мизд федуни фарста куд æнхæстгонд цæуй, уомæ дæр.

– Лæмбунæг æркæсун гъæуй, региони организацитæ æма косæндæнтти мизд федуни туххæй закъонæвæрунадæ цæйбæрцæ лæмбунæг æнхæстгонд цæуй, уомæ, – байхæс кодта Сергей Меняйло. – Контролон оргæнтæн ихæс кæнун еци куст нæуæг анзи пъланмæ бахæссун.

Республики Сæргълæууæг ма æ радзубандий  куд фæббæрæг кодта, уотемæй, фиццаги-фиццагидæр, æргом æздахун гъæуй, нисанмæарæзт паддзахадон программитæ æма национ проектти уагæвæрдтæ æнхæст кæнунæн ци финансон фæрæзнитæ дехгонд цæуй, уони харз кæнуни гъуддагмæ дæр. Уæхæн лæмбунæг цæстдард, æ дзубандимæ гæсгæ, гъæуама уа паддзахадон æма муниципалон нисанеуæги æлхæнуйнæгтæ æма æндæр уæхæн бюджетон хæрзтæ кæнгæй дæр.

Бони фæтки фарстатæбæл докладтæ искодтонцæ Цæгат Иристони Сæргълæууæги размæ Коррупций нихмæ тохи фарстати фæдбæл управлений разамонæг Баскати Эльбрус, Кирови райони муниципалон исконди сæргълæууæг Нæкусати Барис æма иннетæ.

Æмбурди кæронбæттæни къамиси иуонгтæ исфедар кодтонцæ 2026 анзи кусти пълан.

… Нæ рагфидтæлтæй нин байзадæй уæхæн загъд: «Зудæ æма хæлæф кæнун дæр нез æй!..» Æма еци нез ба нин нæ еугур æхсæнадæ дæр тухсун кæнуй. Уомæ гæсгæ ба уомæй фæййервæзуни фæдбæл тох кæнун ба нæ еумæйаг ихæс æй.