Еугуруæрæсеуон æхсæнадæ «Зонадæ» фегъосун кодта, бæсти регионти ахедгæдæр рохситауæн проекттæбæл ка бакуста, еци авторон къуæрттæ æма хецæн адæймæгути номхигъд. Хуæздæрти номхигъди æнцæ Цæгат Иристони минæвæрттæ дæр.

Жюрий унаффæй хуæрзеуæг «Зонадæ. Преми» æма кадгин ном «Республикæ Цæгат Иристон-Аланий хуæздæр рохситауæг» лæвæрд æрцæудзæнæй физикон-математикон Республикон лицей-интернати уæлæнхасæн ахуради педагог Годжицати Анжелæн.

Ахургæнæг урух æма ахедгæ куст кæнуй ирæзгæ фæлтæри хæццæ, скъоладзаути æмхец кæнуй матемтикæмæ, амонуй син æндæр наукити сосæгдзийнæдтæ. Æрæги Анжели хъæппæресæй арæзт æрцудæй республикон фестиваль «ИнфоФест». Еци рохситауæн-ахурадон проекти архайæг иссæнцæ 200 ахурдзауемæй фулдæр. Еци фæсевæдæн ахургæнæг бацæттæ кодта мастер-класстæ æма лекцитæ математикæ æма нимæдзон технологити тематикæбæл. Годжицати Анжелæ æ аллибони педагогон æма рохситауæн кусти урух пайда кæнуй нуриккон ахурадон методикитæй, косуй хуæдбундор авторон проекттæбæл, æ гъомбæлкæнуйнæгти размæ хæссуй раззагдæр нимæдзон технологитæ…

Хуæздæр рохситауæн проектти номхигъдмæ ба федералон жюри  Цæгат Иристонæй бахаста Уæрæсей æригон дирижерти форум. Еци агъазиау исфæлдистадон проектбæл бакуста музыкалон аййевади райрæзтæн агъазгæнæг фонд «Культурон столицæ» (æ разамонæг – Хъарданти Зæлинæ). Фонди хъæппæресæй дзæуæгигъæуккаг форуммæ уæрæсейаг регионтæй æрæмбурд æнцæ 115 æригон дирижери. Цалдæр боней дæргъи син зундгонд æма фæлтæрдгин музыканттæ, æндæр специалисттæ аразтонцæ мастер-класстæ æма профессион дæснидзийнади ахуртæ. Форуми архайгутæн адтæй концерттæ дæр зартæгæнгути æма симфонион оркестри концерттæ дæр.

Æхсæнадæ «Зонадæ»-йи пресс-секретарь Цæгат Кавкази федералон зилди Мария Теплинская куд радзурдта, уотемæй федералон жюрий унаффи «Зонадæ. Преми»-й уæлахездзаутæбæл нимад æрцудæнцæ æртæсæдемæй фулдæр рохситауæг æма рохситауæн проекти еугур уæрæсейаг регионтæй.