Нæуæгарæзт фæсевæдон æзмæлд «Топаз»-и волонтертæ сæрмагонд æфсæддон операций ветерантæ æма сæ бийнонтæй еудадзугдæр есунцæ сæ сагъæссаг фарстати фæдбæл курдиæдтæ. Æзмæлд исаразгутæ æнцæ Валерий Васильев, Кæркусати Иракли æма Годжицати Сослан, сæрмагонд æфсæддон операций ветерантæ, æма си алкæмæн дæр  ес æхе уæззау тугъдон ирисхъæ.

Валерийбæл цæуй авд æма инсæй анзи, Рязани уæлдæр уæлдæфон-десантон училищей рауагъдон, фиццаг бæнттæй адтæй тугъди цæхæри. Æригон командир е ‘мбæлтти къуари хæццæ авдемæй байахæстонцæ æнцайæн пункт Харькови облæсти, хуарзæнхæгонд æрцудæй Суворови майданæй, 2022 анзи октябри фæцæй уæззау цæф, ку исдзæбæх æй, уæд демобилизаций фæсте исæздахтæй Иристонмæ, Иракли æма Сослани хæццæ сæ хъауритæ æрбаеу кодтонцæ, æма æновудæй бавналдтонцæ иннæ ветерантæн æма сæ бийнонтæн сæ цардиуаги сагъæсти агъаз кæнуни туххæй косунмæ.

– Æрхæсдзинан уæхæн дæнцæ: ветерани седзæргæсæн æ хæдзари сæр тæдзуй, мах уой ку базудтан æ курдиадæй, уæд нæ волонтертæ æркастæнцæ уавæрмæ, еумæ банимадтан хæрзти бæрцæ, уæдта гæгъæдитæ балæвардтан республики хецауадæмæ. Фæрæзнитæ радех кодтонцæ, æма силгоймаги цæрæнуатмæ волонтертæ базилдæнцæ, – зæгъуй Валерий Васильев.

– Мæхецæн мин куд фæййагъаз кодтонцæ «Фидибæстæ гъæуайгæнгутæ»-йи фонди иуонгтæ, уотæ гъæуама агъаз кæнон æз дæр, сæрмагонд æфсæддон операций архайгæй ка фæммард æй, уони ниййергутæ, бийнойнæгтæ, уæдта сæ сабийтæн, – зæгъуй Кæркусати Иракли.

Лæхъуæн æй, бархеуонтæй Харьков райсунбæл тугъдтити 2022 анзи феврали фиццæгти  æмрæнгъæ ка архайдта, уонæй. Уой фæсте арæзт æрцудæй «Аланий батальон», æма тох кодта Запорожьей облæсти.

Сæрмагонд æфсæддон операций ветеран Годжицати Сослан адтæй еугуруæрæсеуон конкурс «Памяти героев верны!»-йи архайæг. Финсуй æмдзæвгитæ, заруй, цæгъдуй гитарæбæл, уарзуй спорт. Батальон «Сармат»-и службæ кодта 2022 анзи октябри мæйæй фæстæмæ, декабри мæйи ба ибæл фехалдæй фестæг æфсади нихмæ минæ… Аци æртæ лæхъуæни æнцæ хецæн агъазиау æрмæгутæ кенæ киунугутæ сæбæл ниффинсуни аккаг, зиндзийнæдти сæрти рахезгæй, нур тундзунцæ сæхе хузæнттæн, уæдта, æ цард æрдæгбæл кæмæн раскъудæй, уони бийнонтæн агъаз кæнунмæ. Сæ есæнбунат æрбунат кодта Дзæуæгигъæуи «Фидибæстæ гъæуайгæнгути»-й хæдзари, Дзанай-фурти гъæунги 69-аг номери. Фарстатæ бæлвурд базонуни фæдбæл ма ес бацæуæн сахари Интернационалон гъæунги 93-аг номери «Æхсæнадон организацити хæдзарæмæ». Бастдзийнади телефон 8-(8672)-54-88-89.

Аци фарси æрмæгутæ бацæттæ кодта БИЧИЛТИ Алетæ.