Зундгонд куд æй, уотемæй æрæги бæрæггонд цудæй Уораза-байрам, пусулмон комуадзæн. Аци цитгин бæрæгбон кæд пусулмон бæрæгбонбæл нимад цæуй, уæддæр æй Комуадзæни кадæн ци берæ аллихузон цитгингæнæн мадзæлттæ арæзт æрцудæй, уонæн сæ ахсгиагдæртæй еуебæл банимайун æнгъезуй уой, æма комкоммæ еци бæнттæй еуеми  сæрмагонд æфсæддон операций архайгути кæстæртæн сæ ниййергути хæццæ театр «Саби»-ий сæрмагондæй равдистонцæ спектакль – «Алæмæттаг зæрбатукк». Æма театри кæсæн зали, куд фæззæгъунцæ, адæмæй къох бакæнæн дæр нæ адтæй – дæс æма авдинсæй театрдзауемæн фæцæй спектаклмæ бакæсуни равгæ. Зæрдæхцæуæнæй цийнæ кодтонцæ сабийтæ дæр æма сæ ниййергутæ дæр.

Уонæн зæрдиагæй райарфæ кодта Цæгат Иристони пусулмæнтти уодварни управлений сæрдар Гуæцæлти
Хаджиморат. Æма куд фегъосун кодта, уотемæй аци хуæрзауодæн мадзал еумæйагæй арæзт æрцудæй сæрмагонд æфсæддон операций ветеранти Советти хæццæ.

– Нæ бæрæгбон мах бæрæг кæнæн еугур республики дзилли хæццæ. Æма е æхцæуæн гъуддаг æй, уæлдай æхцæуæндæр ба уомæй æй, æма ’й нæхе цæститæй уинæн, сабийтæ куд зæрдиагæй цийнæ кæнунцæ, æма мах, хестæртæ, дæр устур уодæнцойнæдзийнадæ есæн, уонæмæ кæсгæй. Федарæй ми æруагæс кæнуй, æма «аразæ хуарздзийнæдтæ», зæгъгæ, ку фæззæгъæн, уæд нин е уотид сæнттади хузи загъд ке нæ уодзæнæй, фал нин ке исуодзæнæй нæ цардиуаги еудадзугон фæткæ, æма ’й куд лæдæрæн, хуарздзийнæдтæ аразун гъæуй аллибон дæр, алли минут дæр, цæмæй ни алке ирисхъæ дæр бæрæг дара пайдахæссæг гъуддæгутæ аразунæй. Е ахсгиаг цард куд æвдесуй, уотемæй кæстæр фæлтæр уæлдай хъæбæрдæр лæдæрунцæ, хуарздзийнæдтæ аразæн æви нæ, уой æма кæд уомæ бæллæн, цæмæй нæ кæстæртæ байлæгъ кæнонцæ хуæрзæгъдаугинæй, цæмæй боз æма сæрустур уæн сæ цардиуаги хабæрттæ æма гъуддæгутæй, уæд син гъæуама дæнцæ уæн хуæрзагадæй. Æма мах, баунаффæ кодтан, ка ци дин хæссуй, ка ци адæмихаттæй æй, уомæ нæ кæсгæй, ирæзгæ фæлтæрæн æхцæуæндзийнадæ исаразун, уомæн æма мах еу дзиллæ ан, еу дуйнебæл цæрæн, – баханхæ кодта муфтий.

Уой дæр ма зæгъун гъæуй, æма еци мадзалæй театр «Саби» исбæрæг кодта еума бæрæгбон, еци-еу бон исбæрæг кодта –  куклатæй архайæги Бон.

Спектакли фæсте æригон  театрдзаути исбоц кодтонцæ зæрдæбæлдарæн лæвæрттæй.

Аци мадзалмæ хунд ка ’рцудæй, етæ кæстæрæй-хестæрæй хъæбæр боз адтæнцæ, æгайтима син уæхæн алæмæти дессаг бæрæгбон исаразтонцæ. Сæ номæй райарфæ кодта сæрмагонд æфсæддон операций архайæг Хъусати Эдуард:

– Нæхемæ нæ кизги хæццæ ку ’рбаздахтан, уæд æ дестæн кæрон нæбал адтæй, хъæбæр зæрдæхцæуæнæй фæццийнæ кодта æ æнай-æнойти лæварбæл. Æма ми никки хъæбæрдæр баруагæс æй, ауæхæн культурон мадзæлттæ цæйбæрцæбæл ахсгиаг æнцæ, цæйбæрцæбæл агъазиау æй сæ ахедундзийнадæ нæ кæстæртæн, сæ зундирахаст æма уодиконд рæстмæ гъомбæл кæнунæн, ауæхæн рауæнти фембæлгæй, кæрæдзебæл æхцулдæр æма æновуддæр кæнунцæ.