Цæгат Иристони культури косгути республикон профцæдесон организацийæн æрæги адтæй 26-аг дзуаппон-æвзарæн конференций. Уоми хатдзæгтæгонд æрцудæй евгъуд фондз анзей дæргъи архайдæн, иснисан кондтонцæ, идарддæр ци фарстатæ æнхæсткæнуйнаг æнцæ, уони.

Конференций республикон организаций сæрдарæй фондз анзей æмгъудæй нæуæгæй æвзурст æрцудæй Годжиати Хасани кизгæ Еленæ.

Еленæ каст фæцæй Астрахани паддзахадон консерватори æма Мæскуй Фæллойнæ æма социалон рахастдзийнæдти академи. 2005 анзæй 2020 анзей уæнгæ куста Культури косгути еугуруæрæсеуон профцæдести цæгатиристойнаг республикон организаций сæрдари хуæдæййевæгæй. 2020 анзæй нуриуæнгæ адтæй æ сæрдар, æма бабæй нур нæуæгæй æвзурст æрцудæй еци бунатмæ.

Зундгонд куд æй, уотемæй газет «Дигорæ»-йи редакций косгутæ дæр æнцæ аци профцæдеси иуонгтæ. Берæ æнзти дæргъи еумæйагæй æмгуст кæнæн. Уæлдай боз ан Годжиати Еленæй, еудадзуг нæбæл æновуд ке æй, уой туххæй. Уомæ гæсгæ ба ин уæлдай æхцæуæнæй арфæ кæнæн, нæуæгæй бабæй нæ профцæдеси разамонæгæй æвзурст ке ’рцудæй, уой фæдбæл. Нæ зæрдæ ин зæгъуй, цæмæй ин æ ахсгиаг кусти никки фулдæр бантæса, мах ба ин уоми агъазгæнæг уодзинан, уомæн æма нæ еумæйаг ихæс æй адæми хуарздзийнадæбæл архайун.

БИЧИЛТИ Алетæ