Азербайджани консерваторий студентти къуар. 1937 анз. Астæуæй – Гуржибегти Геуæрги, æ фарсмæ галеуæрдигæй – В. И. Айвазов, е 50-аг æнзти адтæй Цæгат Иристони филармоний симфонион оркестри концертмейстер, нæ республики адæмон артист.

«Иристони зин иссерæн æй Гуржибегти Геуæргий зарти хæццæ зонгæ ка нæй, уæхæн адæймаг, – финста æ уацтæй еуеми, зундгонд композитор æма музыканти берæкъабазгин исфæлдистадæ ’ртасгутæй еу Л. Левитская, – композитор æ уадзимисти низзардта Садони шахтертæбæл, коммунистти сæрустур зæрдæбæл, нæ уарзон сахарбæл. Ка нæ фегъуста композитори финст зартæ «Ирон вальс», «Мади зар» æма «Хуæнхти кизгæ». Цæйбæрцæ æма цæйбæрцæ æнкъарæнтæ æвдесунцæ æ иннæ лирикон зартæ «Мæ еунæг», «Терк», «Лирикон». Композитор цæбæлдæриддæр финста, – сæ еугур дæр æнгон баст адтæнцæ адæмон зари хуæздæр менеугути хæццæ».

Куд зонæн, уотемæй Гуржибегти Геуæргий исфæлдистадæ: æ ахедундзийнадæй рахизтæй Иристони арæнтæй дæр.  Синхаг республикити, бæсти, облæсти æма крайти аййевадæуарзгутæ се ’рдзæфæй еу æма дууæ хатти нæ арфæ кодтонцæ композиторæн æ зæрдæмæгъаргæ финст зарти туххæй. Беретæ си уæд финст æрцудæнцæ грампластинкитæбæл. Адæм сæ æлхæдтонцæ устур æхцæуæнæй. Иристойнаг композитори уадзимис «Райгурæн бæсти зар» нимад æрцудæй Еугурцæдесон радиой арæзт конкурси хуæздæрбæл, æма ’й разардтонцæ мæскуйаг радиобакаст «Нæ уарзон зартæ», зæгъгæ, уоми. Геуæргий аци зар райгъустæй Иристони гъæути æма сахарти. Зардтонцæ ’й скъоладзаутæ, фæсевæд, хестæртæ. Адæймаги исфæлдистадæ дзиллитæ уотæ хъæбæр ку бауарзонцæ, уæд ма уомæй амондгундæр гъуддаг ци уа!

Гуржибегти Геуæрги финд-дæс анзи бакуста аййевадон разамонæгæй зундгонд исфæл-дистадон коллектив, Цæгат Иристони зари æма кафти ансамбли. Аци коллективи райдæдтонцæ еу инней фæдбæл игурун композиторти зартæ. Еци æнзтæ Геуæргий царди ниууагътонцæ ирд фæд. Устур æма æнгон коллектив, æппæлæн дзурдтæбæл ахур ка нæма адтæй, е сувæллони хузæн цийнæ кодта æ алли æскъуæлхтдзийнадæбæл дæр. Ансамбли исфæлдистадон царди уæлдай амондгундæр адтæй 1957 анз. Е адтæй Еугуруæрæсеуон, уой фæсте ба фæсевæди æма студентти VI Еугурдуйнеуон Мæскуй фестивали  лауреат æма райста  дууæ æвзестæ майдани.

Еци анз ансамбль  рараст æй фиццаг фæсарæйнаг балций – Германий Демократон Республикæмæ. Е устур кадгин æма бæрнон гъуддаг адтæй. Балц хъæбæр хуарз рауадæй. Мæйи дæргъи ансамбль республики инсæй сахареми равардта фондз æма инсæй концерти. Берæ концерттæ фæууиуонцæ  тухгин æрдзæфи хæццæ. Фусунти зæрдæмæ арф багъардта Кавкази аййевадæ. Уæлдай устурдæр арфитæ æрхаудтæй зундгонд кафгутæ Торчинти Бексолтан, Сопойти Батæрбег æма Къесати Маринæмæ.

ГУРЖИБЕГТИ Геуæрги,

Еци уæлахездзийнадæ сæр нæ разелун кодта. Аййевадон разамонгути исфæлдистадон фæлварæнтæ адтæнцæ æнæнцойнæ æма нифсгун, фæндæ сæ адтæй кафти медес фæййарфдæр кæнун, зæрдæбæл хъæбæрдæр ка лæууа, уæхæн сорæт си исаразун. Геуæрги кæфтитæн æхуæдæг финста сценаритæ æма музыкæ, адтæй син æвæрæг дæр. Абони дæр ма адæми зæрдæбæл хуарз лæууй æ финст сценари «Будурти паддзах». Уоми зарти æма кæфтити æвдист цудæй зæнхкосгути агъазиау устур фæллойнæ нартихуари гъæздуг тиллæг æрзайун кæнунбæл.

Гуржибегти Геуæрги адтæй хъæбæр арæхстгин разамонæг, – дзурдта дзенети бадуйнаг, Уæрæсей Федераций адæмон артисткæ, ансамбль «Алан»-и раздæри аййевадон разамонæг Байти Альбинæ. – Нæ  коллективи  хæлеу кодта исфæлдистадон цæхæр. Геуæрги махæн алкæддæр устур æхцæуæнæй æвдиста æ зартæ, фæндæ ’й адтæй нæ фæндæ базонун. Е адтæй цæстуарзон æма домагæ разамонæг.

Ансамбль æма æ разамонæг Гуржибегти Геуæргий цард кæрæдзебæл æнгон баст адтæнцæ. Геуæрги еци æнзти цардæй ансамбли хæццæ, ансамбль ба – уой искурдиадæ æма зунди хæццæ.

Нæ культури ирæзти устур æскъуæлхтдзийнæдтæ ке равдиста, уой туххæй Гуржибегти Геуæргийæн лæвæрд æрцудæй нæ республики аййевæдти æскъуæлхт архайæги æма Уæрæсей Федераций аййевæдти æскъуæлхт архайæги нæмттæ, хуарзæнхæгонд æрцудæй Фæллойни Сурх Турусай орденæй. Устур Фидибæстон тугъдæн æ райдайæнæй æ кæрони уæнгæ Геуæрги адтæй тохæг æфсади.

Гуржибегти Геуæрги не ’хсæн кæдæй нæбал æй, уæдæй рæстæг махæй кæнуй  идардæй-идарддæр. Фал æй абони дæр нæ иронх кæнунцæ, ка ’й зудта, еци адæм, ке хæццæ куста, еци артисттæ. Уони зæрдити е байзадæй куд искурдиадæгин музыкант, композитор æма арæхстгин  аййевадон разамонæг, куд хæларзæрдæ адæймаг. Ка нæй зудта, уонæн ба цæргæй байзадæй æ зарти.

*  *  *

Гуржибегти Геуæргий исфæлдистадон над куд райдæдта, зæгъгæ, уæд æримисун гъæуй уой, æма музыкæ æ царди сæйраг гъуддагæн равзаргæй, æхсæрдæсанздзудæй (райгурдæй 1910 анзи 2 мартъий) исфæндæ кодта Бакуй музыкалон училищемæ ахур кæнунмæ бацæун. Уоми фæлварæнти рæстæг ин æ арæхстдзийнадæбæл нæ бадес кодтонцæ, фал æй балæдæрдтæнцæ, ес имæ, ирдæй гъæуама ка раргом уа, уæхæн искурдиади игурæнтæ.

Уотæ æнæнгъæлти Геуæрги иссæй музыкалон училищей ахуркæнуйнаг. Фæстæдæр ба Бакуй консерваторий студент.  Ескæд æхуæдæг зартæ финсдзæнæй, е æ гъудий дæр некæд адтæй. Консерватори каст ку фæцæй, уæд косун райдæдта Бакуй паддзахадон симфонион оркестри. Цагъта альтæбæл. Еци-еу рæстæги куста дирижерæй Æригонти театри. Æ репертуари адтæнцæ, сувæллонæй æ зæрдæмæ ке райста, еци уарзон композитортæ Чайковский, Сен-Санс æма иннети уадзимистæ.

Цалдæр анзей фæсте Геуæрги раздахтæй Цæгат Иристонмæ. Æ фæллойнадон киунуги фæззиндтæй нæуæг косæндонæ: Цæгат Иристони аййевæдти управлени.

Еу рæстæги нæ кæфтити æма заргути ансамбль  цæбæлдæр батухстæй: гъудæй, къуар ке разардтайдæ, уæхæн музыкалон уадзимис. Нæ хуæнхти хузæн бæрзонд, нæ дæнтти хузæн азæлгæ, æнæхийнæ фæллойнæгæнгути сорæт ка æвдистайдæ, уæхæн зар.

Еци тухст багъардта Геуæргий зæрдæмæ дæр. Уотæ имæ кастæй, цума зартæ фагæ ке нæййес, уоми фудгин æй. Сагъæсти бахаудтæй. Фæскуст бабæй æрбадтæй рояли уæлгъос. Æнахур мелоди игурдæй  зæлгай, уомæй зар рауайдзæнæй, уобæл æ зæрдæ дæр нæ дардта. Уæдта зар ниффинсуни гъудитæй æхуæдæг куддæр тарстæй. Бонæй-бонмæ мелоди æхсистæй, кæдзос кодта. Фæстагмæ, мæнæ  хонхи фахсæй ци кæдзос æртæхтæ фæххауй, уомæй мæскъи дæнттæ куд рауайуй, уотæ изæлун райдæдта нæуæг зар.

Поэт Хачирти Сергейи хæццæ ибæл косун райдæдтонцæ.

Мæ фосы дзугтæ

бæрзæндтыл хизут

Æмæ уын зарын, гъей.

Мæ уадындзæй уæ

сойджын сæрвæтты

Буцæй рæвдауын, гъей.

– Ниццæлхъ кодта Цæгат Иристони паддзахадон ансамбли зарти къуар Гуржибегти Геуæргий фиццаг уадзимис «Фиййауи зар». Уомæй æй райстонцæ хехъæппæресадон къуæрттæ æма рахæлеу æй Иристонбæл. Зар адæми зæрдæмæ фæццудæй æ берæ менеугутæй, фиццагидæр, æ музыкалондзийнадæй, æ цæстуарзон мелодийæй. Уомæ игъосгæй, адæймаги цæститæбæл бæлвурдæй уадæй колхозон фиййауи сорæт, бæрзонд  рауæн, цъæх-цъæхид хезæнтæ æ берæ фонси дзогтæ хезгæй.

Управлений куст æ зæрдæ нæ иста. Геуæргий фæндадтæй, еудадзугдæр исфæлдистадон æнкъарæнтæ кæми зелдох кæнунцæ, цардæгас музыки хæццæ,  зарти хæццæ баст кæми адтайдæ, уæхæн рауæн ун. Уомæ гæсгæ, косун райдæдта Цæгат Иристони зартæ æма кæфтити паддзахадон ансамбли. Ами æ гъос æрдардта ансамбли репертуармæ, ци ин нæ фагæ кæнуй, заргути къуари фадуæттæ, равналæнтæ сæмæ цæйбæрцæ ес, уомæ. Гъудæй нæуæг, рæстæги домæнтæмæ гæсгæ адæми фæллойнæ, цард æма цийнæ ка ’вдистайдæ, уæхæн уадзимистæ. Еци тематикæмæ ба цæмæдæр гæсгæ композитортæ се ’ргом фагæ не ’здахтонцæ.

Райдайгæ композитор Геуæрги уæд базонгæ ‘й поэт Цæгæрати Гигой хæццæ. Геуæргий фæндадтæй, æ зæрди ци цийнæдзийнади æнкъарæнтæ фæззиндтæй, уони зари иснивæндун. Уобæл адтæй æ дзубанди поэти хæццæ дæр. Композиторæн æ цæститæбæл уадæй æмбохгæ дони зар. Æрмæст уой æнгæстæ гъæуама уа мелоди дæр. Æма бабæй Геуæрги цох нæбал кодта æ роялæй. Райгурдæй, берæ фудæбæнтти фæсте нæуæг зар. Е адтæй «Цийни зар».

Уадз, зарæг

скъæфæд дард

Терчы уылæнты хъазт…

Æма бабæй аци хатт дæр композитори нæуæг музыкалон уадзимис над иссирдта адæми зæрдæмæ.

Еу сæрдигон сæумæ адæм æрæмбурд æнцæ сахаргæрон, Цъæх театр ке худтонцæ, уордæмæ. Агъазиау сценæбæл аййев хъæппæлти цалдæр  рæнгъемæй лæудтæнцæ цардбæллец кизгуттæ æма лæхъуæнтæ. Дирижери амундæй уæлдæфи  райвулдæнцæ:

Дидинæг калы нæ бæстæ

Рай, зæрдæ, рай æмæ рай.

Афтæ йæ чи скодта уагæр

Дзыллæты фарнæй домбай?..

Гуржибегти Геуæрги æ кизгæ, зундгонд поэтессæ Ирини хæццæ берæ зартæ ниффинстонцæ – «Горæт Орджоникидзебæл», «Уарзони зар», «Кизгутти зар», «Балладæ Къостабæл», «Коммунистти марш», «Ирон вальс».

Гуржибегти Геуæрги аййевади æновудæй берæ æнзти ке фæккуста, уомæн аккаг аргъ искодта Хецауадæ. Лæвæрд ин æрцудæй берæ хуæрзеугутæ, уони хæццæ – Уæрæсей Федераций аййевæдти æскъуæлхт архайæги ном æма Фæллойни Сурх турусай орден.

Æрмæг бацæттæ кодта ЧЕРЧЕСТИ Хъасболат