Фольклорон ансамбль «Чепена». Рахесæрдигæй цуппæрæймаг ЗОЛОЙТИ Майрæн.

Устур Фидибæстон тугъд ку райдæдта, æма немуцаг фашистти æфсæдтæ нæ бæстæмæ ку ’рбампурстонцæ, уæд Дигоргомæй гулæригъæуккаг Золойти Габиц дæр рандæй райгурæн бæстæ гъæуай кæнунмæ. Æ рандæуни размæ изæрæй берæ зæрдиаг дзубандитæ фæккодта æ цардæмбал Даухани хæццæ, фæдзахста ин, хæдзари хабæрттæ куд хуæздæр кæнун гъæудзæнæй, сæйрагдæр е ’ргом цæмæ гъæуама раздаха, цæмæй бийнонтæ мацæмæй батухсонцæ, сæ цуппар хъæболи ирæзонцæ зæрдигъæлдзæг, æнæнезæй. Нифситæ æвардта æ бийнойнагæн, бафæразетæ, бабухсетæ, знаги тагъд фæссордзинан æма нæ фæстæмæ нæхемæ гъæуй, зæгъгæ. Уæдта авдæни рази æрлæудтæй, уоми адгин фунæй кодта æ кæстæр – æртæмæйдзуд Майрæн. Берæ имæ фæккастæй фидæ, уæдта арф ниууолæфтæй æма сабургай загъта: «Иннетæ хестæр æнцæ, сæхебæл фæххуæст æнцæ, фал мин аци минкъиймæ уæлдай устурдæр æргом раздахæ. Ку исæздæхон тугъдæй, уæд гъæуама иннети хæццæ мæ размæ раледза…»

Нæбал исæздахтæй Габиц, байзадæй тугъди будури, æ цард равардта Фидибæсти сæрбæлтау.

Даухан ба, куд Иристони, Уæрæсей мингай седзæргæс силгоймæгтæ, нæ байаурста æ хъауритæбæл, æхсæвæй-бонæй зæрдиаг куст кодта, цæмæй æ сабийтæ байрæзонцæ, сæ къæхтæбæл ислæууонцæ, царди аккаг бунат иссеронцæ.

ЗОЛОЙТИ Майрæн

Æнзтæ рацудæй, багъомбæл æнцæ Габиц æма Даухани цæуæт, сæ мадæн агъазгъон фæцæнцæ. Бийнонтæ ралигъдæнцæ Гулæрæй Заводи поселокмæ, исаразтонцæ уоми хæдзарæ, кæстæртæй алкедæр ахури надбæл æрлæудтæй, агурдтонцæ сæ зæрди фæндон дæснийадæ.

Майрæн сауæнгæ е ’взонг бæнттæй фæстæмæ берæ бауарзта бæгъатæрти адæмон зартæ. Æвзурста сæ æхуæдæг дæр зарунбæл, æма е ’мгæрттæ кудфæстæмæ феппайун райдæдтонцæ: хуæздæрæй-хуæздæр кодта æ зартæгæнæги æрмдзæф, киндзæхсæвæрти, кувдтити кенæ ба æрдзи гъæбеси сæ фæллад уадзгæй. Майрæн хъæбæр зæрдæмæдзæугæ ракæнидæ æ уарзон адæмон зартæ.

Уæдмæ ибæл æ цæстæ æрæвардта зундгонд композитор Цорионти Резван. Е еци æнзти исаразта фольклорон ансамбль «Чепена». Майрæни дæр имæ бакодтонцæ, æма си профессионалон зартæгæнæг иссæй. Ансамбли хæццæ хуарз зонгæ адтæнцæ айдагъ Иристони аййевадæуарзгутæ нæ, фал Уæрæсей алли къумти дæр, цалдæр хатти гастрольти рандæнцæ сауæнгæ фæсарæнтæмæ дæр – Болгаримæ, Чехословакимæ, æрбаздæхиуонцæ берæ хуæрзеугутæ æма лæвæртти хæццæ.

Майрæни репертуари адтæй дзæвгарæ аллихузон зартæ, фал уæлдай зæрдиагдæрæй кодта алли хатт дæр Хæмицати минкъий Хæмици зар. Ирон адæмон зартæ хуарз ка зонуй, еци адæймæгутæй берети гъудимæ гæсгæ, Хæмици зар рæсугъддæр æма аййевдæр ка кодта, уонæй еу адтæй Золойти Майрæн. Æхе зæрдæмæ дæр уæлдай хъæбæрдæр ке цудæй, уомæн ба æвдесæн æй еу хабар, ракодта мин æй Майрæни цардæмбал Теминæ. Аци анзи ноябри кæрони исæнхæст уодзæнæй дууæ анзи, Майрæн не ’хсæн кæдæй нæбал æй, уæдæй. Æма хъæбæр ку æрсæйгæ ’й, уæд æ хеуæнттæн балæдæрун кодта æ фæстаг фæндæ: куд райгъуса магнитофонбæл финстæй Хæмицати минкъий Хæмици туххæй æхе зар.

Хъæбæр берæ дзиллитæ æрæмбурд æй æ бониккон бони Золойти тургъи Майрæнæн фæстаг фæндараст зæгъунмæ. Куд не ’сæнхæст кодтайуонцæ хеуæнттæ сæ уарзон хестæри фæстаг фæндæ. Æма, саударæн митинги фæсте зари зæлтæ ку райгъустæнцæ, уæд тæккæ федарзæрдæдæр нæлгоймæгтæ сæ цæстисугтæ нæбал бауорæдтонцæ…

Идард кæддæр, сæдæгай æнзти размæ, равдиста æ лæгдзийнадæ, хъаурæ æма æхсарæ Хæмицати минкъий Хæмиц, зæгъæн ес, сабур доги царди уавæрти. Фал мæмæ уотæ кæсуй, æма нæ рагфидтæл, не ’рвадæ нæ рæстæги ку цардайдæ, аци змæнст æма тузмæг доги, уæддæр æгудзæгæй æхе нæ равдистайдæ æ Фидибæсти, æ адæми сæрбæлтау тох æма хабæртти.

ХÆМИЦАТИ Морис