Уæрæсей æнæнездзийнадæ гъæуайкæнуйнади Министрадæ æрæги унаффæ ци хъæппæреси фæдбæл рахаста, уомæ гæсгæ медицинон уæлдæр ахургæнæндонæ æма колледж  фæууни фæсте  рауагъдон æнæмæнгæ гъæуама  бæлвурд рæстæг бакоса паддзахадон сæйгæдони. Советон доги уотæ бæргæ адтæй, фал еци ахсгиаг гъуддаг сæ фудзундæй фехалдтонцæ, Советон Цæдеси фæткитæ кæрæй-кæронмæ кунæг кæнун ка байдæдта, еци «реформатортæ». Хуарз æма ’й уæддæр нур балæдæрдтæнцæ, еци гъуддаг цæйбæрцæбæл пайдахæссæг адтæй.

Федералон министади хъæппæреси туххæй дзоргæй, нæ республики æнæнездзийнадæ гъæуайкæнуйнади министрадæ æма «Роспотребнадзор»-и раздæри разамонæг, медицинон академий гигиенæ æма эпидемиологий кафедри сæргълæууæг Бутати Таймураз куд баханхæ кодта, уотемæй æ хæццæ арази æй:.

– Мах рæстæги уотæ адтæй, æма  ’й зудтан, куддæр ахур фæууæн, уотæ нæ æрветдзæнæнцæ кустмæ бæлвурд рауæнтæмæ. Нæ размæ нин рахæссиуонцæ бæсти регионти, республикити, крайти хигъд, уоми бæрæг адтæнцæ кусти бунæттæ дæр. Кæд æма студент бюджети бундорбæл цæуй ахурмæ, уæд гъæуама зона, лæвар исахур кæнуни фæсте æртæ анзи косдзæнæй, кумæ ’й рарветонцæ, уоми.

Бутай-фурт ма куд баханхæ кодта, уотемæй медицинон уæлдæр ахургæнæндæнтти рауагъдонтæн се ’ртиккаг хаййи уайтæккæ сæйгæдæнти хебарæй косунмæ бауадзæн нæййес. Уомæ цæттæ нæ фæуунцæ.

– Медицинон ахургæнæндони ка ахур кæнуй, гъома, исонибони дохтиртæ гъæуама бацæуонцæ сæйгæдонæмæ санитартæй, медицинон хуæртæй, æнсувæртæй. Къахдзæфгай гъæуама алцидæр уоми базононцæ.

Уæрæсей æнæнездзийнадæ гъæуайкæнуйнади Министрадæ æрæги ци фæндæ рахаста, уомæ гæсгæ медицинон ахургæнæндæнтти бюджети бундорбæл ка ахур кæнуй, еци рауагъдон-медиктæ æнæмæнгæ сæйгæдæнтти, поликлиникити бакосонцæ бæлвурд рæстæг. Уотемæй сæ багъæудзæнæй фæсахур æртæ анзи (колледжти рауагъдонти ба дууæ анзи) бакосун медицинон косæндæнтти. Кенæ ба гъæуама еугур бюджетон хæрзтæ дæр дууæ хатти фулдæремæй фæстæмæ раздахонцæ паддзахади къазнамæ.

Нæ уацхæссæг.