Цæгат Иристони бархеуонти къуар агъаз кæндзæнæнцæ, е ’нæнездзийнадæ гъигæдард кæмæн æй, еци сувæллæнттæн.

Гъулæггагæн, нуртæккæ республики скъолати ахур кæнуй,  е ’нæнездзийнадæмæ гæсгæ æ гæнæнтæ цубур кæмæн æнцæ, уæхæн æртæ мин кизги æма биццеуи, рæвдауæндæнтти ба – дууæ минемæй фулдæр.

Цæмæй се ’нгæртти ’хсæн дæлдæр ма уонцæ, сæ рæстæг игъæлдзæгæй æма пайдагунæй æрветонцæ, уой туххæй сæмæ фулдæр æргом раздахун гъæуй. Уæхæн фæсевæдон къуар студенттæй исæразун кæнун бафæдзахста, августи конференций ахургæнгути рази дзоргæй, республики Сæргълæууæг Сергей Меняйло.

Ахури, хеерхæфсуйнадæ æма æхсæнадон царди архайунмæ кæстæрти раздахун, алливæрсуг агъаз син кæнуни ихæс æвæрд уодзæнæй хъæппæресгун фæсевæдбæл.

– Хумæтæг сувæллæнттæ ке нæ ’нцæ, уомæ гæсгæ сæ уавæртæ дæр гъæуама æндæрхузон уонцæ. Ауодундзийнадæ, хуарз цæстингас цæмæй банкъаронцæ – уæхæн курдиадæ мæмæ ес Педагогон колледж æма проект «Навигаторы детства»-мæ. Уомæй уæлдай, идарддæр косдзинан ахурадæ æма кустуæтти еумæйаг системæ исаразунбæл, цæмæй нæ рауагъдонтæй е ’нæнездзийнадæ гъигæдард кæмæн æй, уонæн федæни фадуат уа зæрдæмæдзæугæ кусти бунат иссерунæн, – бафеппайдта Сергей Меняйло.

Æ фæдзæхстмæ гæсгæ, сæрмагонд программæ бацæттæ кæндзæнæнцæ сæйгæ сувæллæнтти ниййергутæн агъазæн.

Уомæй уæлдай, идæрддзæгмæ ахури практикæй дæр гъæуй пайда кæнун, гъæугæ дæснийадæ райсунæн æ гæнæнтæ цубур кæмæн æнцæ, еци ахурдзау фæсевæдæн.