Зундгонд цæцæйнаг хузæгæнæг Рустам Яхиханов Цæгат Иристони паддзахадон университети студенттæ-хузæгæнгутæн Дзæуæгигъæуи Наицон музейи равдистити зали амудта æ дæснийадæ аййевадон уадзимисти архайæг адæймæгути хузтæ кæнуни темæбæл.

Хузæкæнуйнади аййевади къабази студенттæ устур аргъ кæмæн искодтонцæ, хузæгæнæги уæхæн персоналон равдист «Дыхание жизни»-й кæронбæттæн бонтæй еуеми исаразтонцæ фембæлд. Аййевæдти факультети хундмæ гæсгæ, хузæгæнæг «Кавказский натюрморт»-и темæбæл исаразта практикон ахурадæ. Фембæлди архайгутæ æвзурстонцæ кавказаг адæмти цардбæл дзорæг композицитæ.

Хузæгæнæг студенттæн, сæ конд уадзимистæ син лæмбунæг равзаргæй, адæймаги хузæ кæнуни аййевади фæдбæл бæлвурд унаффитæ фегъосун кодта.

Студенттæ сæ зонундзийнæдтæ фæффулдæр кæнунбæл зæрдиагæй архайунцæ. Кавказаг адæмти цард æма се ’гъдæуттæ ирдæй æвдист цæмæй цæуонцæ, хузтæ кæнгæй, уомæ бæллун, – зæгъуй хузæгæнæг.

Цæцæни Республики адæмон хузæгæнæг, Уæрæсей хузæгæнгути Цæдеси иуонг Рустам Яхиханов косуй Санкт-Петербурги Илья Репини номбæл аййевæдти академий ахургæнæгæй. Æ исфæлдистадон кусти еудадзугдæр устур æргом æздахуй Кавкази адæмти æгъдæуттæмæ, æновудæй архайуй сæ аллибони цард син æ конд хузти равдесунбæл.

Цæгат Иристони паддзахадон университети пресс-службæ