Нæуæг анзи бæрæгбони хуæдразмæ арæзт аллихузон мадзæлттæн сæ цæмæдессагдæртæй еу иссæй Дзæуæгигъæуи  «Рагацау профессионалон æгъдауæй цæттæ кæнуни Центр»-и æригæнтти ’хсæн арæзт видеороликти конкурс «Хестæртæй байзайгæ искурдиæдтæ».

Æ райдайæни æ архайгутæн æма сæ ниййергутæн зæрдиаг арфитæ ракодта Центри сæргълæууæг Кучити Батрадз. Æ радзубандий куд баханхæ кодта, уотемæй си федарæй æруагæс кæнуй, нæ æригон фæлтæрæн сæ хестæртæй, сæ мадтæлтæ æма фидтæлтæй, сæ бабатæ æма нанатæй ци исфæлдистадон цæхæр, ци искурдиади лæвæрттæ ес сæ тоги, уони идарддæр дæр рæсугъдæй ке хъæртун кæндзæнæнцæ, ниххуссун  кæнун сæ  ке нæ бауадздзæнæнцæ, нæ адæми зæрдитæмæ си æхцæуæндзийнадæ ке хæсдзæнæнцæ, Иристони культурæ æма аййевади исонибони сæ агъаззаг хай дæр ке уодзæнæй.

Уой фæсте конкурси архайгутæ равдистонцæ сæ видеороликтæ, дзурдтонцæ, ка ’нцæ сæ архайгутæ, куд хæстæг син æнцæ, ке æма цæй фæрци райдæдтонцæ сæхуæдтæ архайун, цæмæй син бафæнзонцæ, урухдæр кæнонцæ сæ искурдиæдти æстъæлфæнтæ, адæми рæнгъæмæ сæ рæсугъдæй хæссонцæ.

Кæронбæттæни  исбæрæг кодтонцæ конкурси бæрæггæнæнтæ. 1-4-аг кълæсти ахуркæнуйнæгти ’хсæн хуæздæрбæл банимадтонцæ Будайти Александри (Дигорай 2-аг астæуккаг скъола) ролик, 5-8-аг кълæсти ахурдзаутæй ба фæууæлахез æй Мамиати Арслани (Алагири 3-аг астæуккаг скъола) ролик, 9-10-аг кълæсти ахуркæнуйнæгти арæзт роликтæй ба фиццаг бунат аккаггонд æрцудæй Лейлæ Тотразовай кустæн (Хъизлари 1-аг астæуккаг скъола).

Зали ци адæм адтæй, уони фæндæмæ гæсгæ ба сæрмагонд призæй исхуарзæнхгин кодтонцæ Дзæуæгигъæуи 2-аг астæуккаг скъолай 5-аг къласи ахурдзау Чивити Владислави.

Конкурс исаразгути гъудимæ гæсгæ, уæхæн мадзæлттæ агъаз кæнунцæ фæлтæртæ кæрæдзебæл бæттунæн, фæсевæдæн амонунцæ раст нæдтæ, исонибони дæснийадæ æвзаргæй.

ХÆМИЦАТИ Морис