Тæбæхсæути Балой туххæй æ имисуйнæгти нæ номдзуд актер, Цæгат Иристони аййевæдти æскъуæлхт архайæг Къумæллæгкати Мурат уотæ баханхæ кодта: «Бало æй нæ сæрустурдзийнадæ. Æ ном хуарз зундгонд æй айдагъ Иристони нæ, айдагъ Уæрæсей нæ, фал æнæгъæнæ дуйней дæр.

Æз фæххайгин дæн агъазиау амондæй – æ хæццæ архайдтон æхсæз спектаклеми. Кусти хъæбæр еудзурдон æма карз адтæй. Хуцау ма зæгъæд, æма репетиций рæстæг актертæй кæмæйдæр уотид бæгæний тæф кæла… Уотемæй ба адтæй алæмæти кæдзос, уогъуллу, æууæндагæ адæймаг. Некæд неке зæрдихудти бацудæй, некæд неке бафхуардта… Алæмæти устур сувæллон…»

Некæд неке зæрдихудти бацудæй… Мах ба, æнгъæлдæн, еуцæйбæрцæдæр æ зæрдихудти бацудан. Кæд кедæр æнæргъудидзийнади фудæй уотæ рауадæй, уæддæр уомæй нæ еугур дæр азунгин ан. Цæветтонгæ, Советон Цæдеси адæмон артист, УСФСР-и Паддзахадон премий, Хетæгкати Къостай æма Константин Станиславскийи номбæл премити лауреат Тæбæхсæути
Василийи фурт Владимири (адæм æй уарзонæй Бало худтонцæ) райгурдбæл хуæрзæрæги, 2 июли исæнхæст æй финддæс æма фондзинсæй анзи (1910-1981). Æма аци ахсгиаг цауи фæдбæл ести номерæн мадзæлттæ арæзт æрцудæй? Гъулæггагæн, неци…

Гъуддæгутæ кæмæй аразгæ ’нцæ, уони загъдмæ гæсгæ цидæртæ арæзт æрцæудзæнæй фæззæги, театралон сезон ку райдайа, уæд. Æма уæд е куд æй – еци сезонмæ нæ бангъæлмæ кæсгæй, Вахтангови кадæн фестиваль ку рацъапп кодтонцæ.

Уогæ уой фæдбæл хецæн дзубанди гъæуй, æма ’й абони нæ кæндзинан, уомæн фæстæдæр равгæ иссердзинан. Абони ба нæ рохсзæрдæ Балой рохс ном имисгæй нæ нæ фæндуй усхъæз дзурдæй ин æ уодæнцойнæ гъигæдарун. Æцæг ма уой зæгъуйнаг ан, æма абони кадæртæ кедæрти исдессаг кæнунмæ ци тухимисæ мадзæлттæй архайунцæ, етæ, баруагæс уи уæд, исонибони фæццидæр уодзæнæнцæ. Тæбæхсæути Бало ба нæ адæмæн æностæмæ рæстуодæй цитгийнаг уодзæнæй!..