Адæймаги бауæрæн донæй æфсес ун цæйбæрцæбæл ахсгиаг æй, уой исбæрæг кæнуни фæдбæл Саудоваг Аравий ахургæндтæ исаразтонцæ сæрмагонд зонадон фæлварæн. Архайдтонцæ си фондз æма дууинсæй адæймаги. Уонæй финддæс æма инсæй Рамадани цитгин мæйи рæстæги дардтонцæ уораза æма уонæмæ уæлдай цæстдард адтæй: бонæ фондз хатти æвзурст цудæй, сæ бауæргъæдæ донæй куд æнхæст æй, уой бæрæггæнæнтæ. Иннæ дæс адæймаги ба адтæнцæ спортсментæ æма уони ба бæрæг кодтонцæ тренировкити размæ дæр  æма сæ фæсте дæр.

Куд рабæрæг æй, уотемæй адæймаги бауæргъæдæ минкъийдæр дон гъæуагæ ку фæууй, уæд æ энерги æрхауй 20-30 процентей уæнгæ. Проект «Æнæнездзийнади культурæ»-йи архайгутæ  исбæрæг кодтонцæ, кутемæй æнгъезуй бони дæргъи адæймаги бауæргъæдæ донæй æфсес кæнун.

■ Дон дарун гъæуй дæ къохи буни. Дони авгæ кенæ къос дарун гъæуй стъолбæл, дæ цæстингаси куд уа. Уотемæй æй гъуди кæндзæнæ, дон ниуазгæ дин ке æй, уой. Дон дарунæн ба равзарæ зæрдæмæдзæугæ, дæ косæн стъолæбæл еумæйаг бакасти ка исфедауа, уæхæн дзаумау, уой уингæй ди нæ иронх кæндзæнæй, дон ниуазун дæ ке гъæуй, е.

■ Дæ къофи баййевæ донæй. Къофий алли дуккаг къос дæр æййевæ дони агувзæй. Уотемæй дин тæссаг нæ уодзæнæй тæнгъæди исæфтæй (обезвоживание) кофеинæй æма ервæзт уодзæнæ «энергетикон къуæхцитæй».

■ Хумæтæг донæй бауæгæ дæ æма дин зин ниуазæн æй? Дæ донбæл бафтауæ лимони, хуæргæнаси кæрститæ, бетъина кенæ ести гагарæзæ. Уæхæн дон агъаз æй тæнгъæдтæн, æма си адæймагмæ фæззиннуй косуни хъаурæ дæр æма æхе хуарз æнкъарундзийнадæ дæр фæббæрзонддæр уй.

■ Дæхецæн балхæнæ нимæдзитæ бæрæггонд кæбæл фæуунцæ, уæхæн авгæ. Æма дæхе хæццæ еристæ исаразæ. Зæгъæн, гъæуама баниуазай литæри æрдæг дууадæс сахаттемæ. Уотемæй дин дон ниуазуни гъуддаг цæмæдесаг ериси хузæн исуодзæнæй.

■ Бони дæргъи гъæуама хуæрай, дон берæ кæми ес, уæхæн рæзæ: хуæргæнасæ (96%), харбуз (92%), сельдерей (95%). Ауæхæн рæзæ хуæргæй, адæймаги бауæргъæдæ райсуй,  æнæмæнгæ ’й ци витаминтæ гъæунцæ, уони, уæдта ма донæй æфсесади гъуддаг дæр æнхæст кæнунцæ.