БИТАРТИ Заурбег

Алли рæстæгути дæр Иристон æ сæр бæрзæндти кæмæй хаста, æ арфиаг фæллæнттæй ин кадæ ка искодта, уæхæн адæймæгутæй мæгур некæд адтæй. Уонæй æй зундгонд кафæг, хореограф æма балетмейстер, алæмæти цæмæдесаг «Хъæмати хæццæ кафт» ка исæвардта æма ’й тæккæ фиццаг ка ракафта, еци адæймаг – Битарти Заурбег дæр. Гъулæггагæн, æ цардвæндаг æгæр цубур рауадæй, æ тæккæ лæги кари куд бацудæй, æ берæ фæндитæ æма нисантæ сæ еугур æ къохи ку нæма бафтудæнцæ, уотемæй. Фал ин нæ Исфæлдесæг ци ирд искурдиадæ балæвар кодта, е ба æностæмæ нæ аййевадон хæзнадони æрттевдзæнæй. Æма Заурбеги рохс ном иронх ке нæй, уомæн æвдесæн æй, æ кадæн ци фестиваль арæзт æрцæудзæнæй рæхги, е дæр.

Битарти Заурбег адтæй зундгонд ирон кафæг, педагог, хореограф, балетмейстер. Æ ном æ рæстæги райгъустæй кæддæри устур Советон Цæдеси берæ республикитæбæл. Адæмон кæфтити ансамбльтæн программæ исæвæруни туххæй æй фæххониуонцæ Хонсар Иристонмæ, Грознамæ, Элистамæ, Челябинскмæ, Астæуккаг Азимæ, нæ бæсти берæ æндæр сахартæмæ…

Зундгонд балетмейстер, ССР Цæдеси адæмон артист Игорь Моисеев разамонæг кæмæн адтæй, еци игъустгонд ансамбли е ’сфæлдистадон над ке райдæдта, е дæр фагæ ’й, Битарти Заурбег ци устур искурдиади хецау адтæй, уой балæдæрунæн.

«Хъæмати хæццæ кафт»-æй уæлдай Битарти Заурбег, ансамбль «Терки» косгæй, исæвардта, аййевадæуарзгути зæрдæмæ хъæбæр ка фæццудæй æма абони дæр ма ансамбль «Алан»-и репертуари ка ’й, еци кæфтитæ – «Къахифийтæбæл кафт», «Дууæуæладзугон кафт», «Кизгутти кафт», «Ирон вальс», «Акушинаг кафт» æма берæ æндæртæ.

Æрдхуарддзийнадæбæл æновуд ун нæ кæстæртæн фæдзæхсун æй нæ адæми ахсгиагдæр æгъдæуттæй еу.

«Алан»-æн бацæттæ кодта ансамбль кæмæй исфедудта æма æ астæуккаг цæгиндзæ ка иссæй, ирон дæснидæр кафгути уæхæн къуар, се ’хсæн: Козати Зелимхан, Калоти Земфирæ, Плити Нодар, Булацати Таймураз, Карсанати Мæхæмæт, Зассети Валентинæ, Джиккайти Тотрадз, Æбити Виктор… Уæхæн ахуркæнуйнæгти бацæттæ кæнæ, е æхуæдæг кæбæлти æй!

Куд иннетæй, уотæ Къодзати Зелимханæй абони дæр иронх нæй æ искурдиадæгин æма курухон ахургæнæг. Æ ном арф æвæрд æй æ зæрди, æма ’й исæносон кæнуни фæндæ Зелимханмæ рагæй адтæй. Уотемæй имæ ’рцудæй хуарз гъуди – Битарти Заурбеги номбæл дуйнеуон фестиваль-конкурс исаразун. Æ фарсмæ балæудтæнцæ, æ фæндæ ахсгиагбæл ка банимадта, уæхæн хъæппæресгун адæймæгутæ, æма гъуддаг исирæзтæй.

Фестиваль арæзт æрцæудзæнæй аци анз 17 июни. Цæмæй си байархайонцæ, уой туххæй нæ республикæмæ ’рцæудзæнæнцæ иуазгутæ Цæгат Кавкази 12 регионемæй – Абхазæй, Хонсар Иристонæй, Кæсæг-Балхъарæй, Дагестанæй, æма æндæр рауæнтæй. Сæ минæвæрттæ, национ кафти ансамбльти архайгутæ, равдесдзæнæнцæ хъæмати хæццæ кафти сæ дæснидзийнадæ. Аргъгæнæг син уодзæнæй сæрмагонд жюри, æ сæргъи – Уæрæсей адæмон артист Козати Зелимхан, уотемæй. Фиццаг, дуккаг æма æртиккаг бунат  байахæсгутæн балæвар кæндзæнæнцæ фестивали сæрмагонд лæвæрттæ æма æхцай премитæ. Битарти Заурбеги номбæл фестиваль-конкурс арæзт цæуй фиццаг хатт. Фал æ исаразгутæ фæндæ кæнунцæ, нурæй фæстæмæ æй алли анз дæр аразун, цæмæй хъæмати хæццæ кафти дæснидæртæ сæ аййевадæ æвдесонцæ æма кæрæдзей сæ фæлтæрддзийнади хæццæ зонгæ кæнонцæ.

Гъуддаг цæмæй исирæза, уомæн зæрдиагæй байагъаз кодта Битарти Вячеслав, æма ин æ исаразгутæ зæрдибунæй арфæ кæнунцæ.