* * *

Мæ гъудити косартæн растъегъдзæн æ цар,

Ра ин уадздзæн æ тог,

Ра ин тондзæн æ зæрдæ,

Бацæйтондзæн амонди æвæрæнти дуар.

 

Ис дзи есдзæн уæд сог,

Зинги бæсти – мæ бæлдæ,

Ниффæлсодздзæн цийнæ…

Баниуазæ æмдзæвгæ.

 

ГИБИЗТИ ОСКАРÆН

Цæбæл зарис, биццеу, цæбæл зарис,

Сау нимæти ма тохæ ду хор,

Æмдзæвги рæнгъитæй цæмæн фасис

Ду нæ царди дзиккоти цæлхдор?

 

Де ’взонг сагъæсти дорин куройнæ

Цийни тунтæ раинсуй æваст.

Ескæд уодзæй дæ зурнæ буройнæ,

Амонд дин ниййауаздзæй дæ маст.

 

* * *

Думги зармæ бериндзуй бæласæ,

Цъеути зар тургъæбæл ивулуй,

Дидингути сагъæси халасæ

Зæнхи горцъе хъуритæ кæнуй.

 

Налат думгæ уозуй зæнхи ростæ,

Сатæг дон къæл-къæл кæнуй бунæй.

Арви дзиппæй хорæй ’дзаг тæрхъостæ

Цийни тунтæ калунцæ зудæй.

 

* * *

Никкодтон мæ гъæбеси нæ гъоги

’Ма кæугæй исбадтæн æ рæбун.

Æ цæстити саури зæрди ходи

Е мæнæн ниггæлста æд æрхун.

 

Айдагъ е мин кæнуй тæрегъæд,

Айдагъ е ку лæдæруй мæ зин.

Е мæбæл макæддæр исæййевæд,

Ба мин дарæд æ касти кæрдзин…

 

ИЗÆР

Синæр цæгъдуй зæронд уæрдундонæ,

Дуари хъист цæгиндзæй æууелгæй.

Дуари бæхбæл нур цæги идонæ

Мæ нана бакодта фæлладæй.

 

Ба мæ хондзæй нуртæккæ æ уатмæ,

’Ма, аргъæутти авдæни рæхцгæй,

Игъосдзæн æдзинæг думги зармæ,

Гъуди ’й дзосæй мæ зæрдæ гъæцгæй…

 

УОДИ ЦЪÆХАХСТ

Ниммæ уагътæ!..

Корун уи!..

Алцидæр уин фæууæд хатирæй,

Æрмæст мин мæ æмдзæвги

Рæнгъити хулуй гъæмпæбæл

Рист зæрди æстъæлфагæ къæбиси

Уе ’взæгти гулдзуг ливзæ къохтæй

Уæддæр къохæвдулд ма кæнетæ,

Корун уи!..

 

* * *

Некæд уарзтон адæми,

Раздæрти уарзинæ мæхе.

Фал нура мæхе дæр нæбал уарзун.

Фуддæр ма ци фæууй:

мæ цæсгони денгиз – къæйнаг еx,

Ходæзмоли хæрæг еци ехбæл

истун нæ фæразуй.

Фуддæр ма ци фæууй:

реуи арми хæссун нимæхстæй,

Фæрскъити æнгулдзитæй хуæцун

фуд зæрди уæззау дорбæл.

Фуддæр ма ци фæууй;

æмдзæвги рæнгъитæй бид æхсæй

Тогфедуд бакæнун мæ рист уоди.

 

* * *

Нæ гъæун мæ Дигори,

Мæн дæр нæ гъæуй мæ Дигорæ…

Нæ уарзгæй мæ адæми,

Се ’хсæн æргъæвст уодæй цæрун…

Нæ гъудтæн мæ Дигори,

Мæн ба куд гъудæй мæ Дигорæ!..

Нæ астæу – бæрзонд горен,

Амад æй цæстисуги дорæй.

Еци дор нæ арæнмæ

Ластон мæ рист зæрди уæрдуни.

Мæ бæллецти уорс кауæ?

Кæддæр æррадæнтти байзадæй,

Дохтиртæ ’й се ’взæгути сиутæй

Фæлластонцæ уесгай.

Исбийон нæуæгæй?.. Mе ’взонгади циртбæл

Бæлди таутæ не ’рзадæй…

Гъеуæхæн дессаг!..

Нæ гъæун мæ Дигори,

Мæн дæр нæ гъæуис, мæ Дигорæ…

Ци ми кæни мæнæй?

Ци ми кори?..

 

САЛД ЗÆРБАТУГ

Цæбæл кæуис, мæ зæрди бундор?

Куд талингæ ’й мæ гъудий хæдзарæ…

Мæ æмдзæвгæ иссæй мæгургор,

Нæй мæ бон дзурдти согæй ниндзарун.

 

Мæ сагъæси тикис æй мæллæг,

Хуæдмæл дзурди æгасей не ’ртасуй.

Æй мæ уарзти кæркдонæ ниллæг.

Мæ амонди уасæнгæ нæ уасуй.

 

Цъæх изгæ мин бахуардта мæ дзурд.

Мæ зарæг æрихгæд æй халасæй.

Салд зæрбатуг абони бæлвурд

Æрхаудтæй мæ цийнити бæласæй.

 

* * *

Мæ сæри хæдзарæбæл уаруй

сос дзубанди ’й зуст мет:

Сау федис уорс гъости гъосинтæбæл

æндзæр æрæнцадæй.

Фест уæнги донуайæнбæл рæхги

рауадздзæн карди хед:

Цæстити къæрæзгитæ ниууиндзæнцæ сæхе

тæвдæ тоги цъифцади.

Аци фæнди аууон

сонт зунди тар авари хуссуй,

Е ’ригъалæй тæрсгæй,

æзмæлун нæ уадзун мæ ристади.

Уорс роси тъæригъосбæл тæлфуй

цæстисуги сау фус…

Æрæгиау богъ-богъ кудт

æвзаги хуссæнæй исистадæй.

 

МÆ ЦÆСГОНИ КОЛДУАР

Мæ цæсгони колдуар…

Цæстити æрттевагæ ’вдозæнтæ

Берæ ’нзти, бонæй-бонмæ

Исæрст цæстисуги сойнæй.

Мæ цæсгони колдуар…

Фæллад сæри уæлмæрдти уорсзæнгæ –

Бæлдитæн циртдзæвæнтæ –

Уорс гъунтæмæ колдуар игон æй.

 

Мæ цæсгони колдуар…

Адæмæн е æхгæд некæд адтæй,

Цæстити æвдозæнтæбæл, цит,

Æнæмæтæй кодта елхъина…

Рæстæгутæ цудæй.

Æрæги йбæл бæзгин ниууардта

Кедæрти соцъа ’нгасти сау мет.

Æма ма дин, мæгур, ци кæна?

 

Нæбал комуй игон:

Мети уæзæй нæййес æзмæлæнтæ,

Æрмæстдæр ма сæри уæлмæрдтæмæ

Фæууй бацæуæн.

Æз имæ айдæни цадæбæл банайун…

Кæдæй бæллун мæлæтмæ,

Кæдæй ковун адзалмæ…

Мæ бон ку нæбал æй… цæрун!

 

МАДÆМÆ

Рагæй дæр æнгъæлдзауæй цæрун дæ адзалмæ,

Ку рамæлай – æз дæр дæ фæсте рамæлдзæн.

Уæлæбæл адæми ’хсæн мæ цард ци уазал æй,

Сæ бугъзур цæстæнгас – мæ уодæн нивæрзæн.

Цæй, цæуæн дууемæй дæр мæрдтæмæ. Æууæндæ:

Циртмæ нæбæл федиси сау мет нæ уардзæй…

О, мæ ном, ме ’знæгти æвзæгти

ливзæ къохти уомæн дæ?

О, мæ цард, ци ди зонун хуарзæй?!