Дзæуæгигъæуи 1-аг поликлиники бундорбæл байгон æй онкологион сæйгитæн амбулаторон агъази Центр. Раздæр уæхæн агъаз кодтонцæ еунæг къæбинети, нур уавæртæ фæппарахатдæр æнцæ: ес си процедуритæ кæнæн, гъæдгинтæ бæттæн къæбинеттæ æма бонигон стационар.

Уони фæрци сæйгитæ дæр æвзарунцæ уодæнцойнæдзийнадæ, дохтиртæ дæр сæ архайди ахедундзийнадæ æнкъарунцæ. Хайадæ байгон кæнунмæ ’рбацудæнцæ Республикæ Цæгат Иристон-Аланий æнæнездзийнадæ гъæуайкæнуйнади министр Тебиати Сослан, Æнæмæнгæ медицинон фæдзæхстади фонди разамонæг Дзæгъойти Алан.

Министр куд радзурдта, уотемæй сæйгитæ æма дохтирти нуриккон фадуæттæ зингæ фæххуæздæр кæндзæнæнцæ дзæбæхгæнæн мадзæлттæ, сæйгитæ сæхе хуæздæр æнкъардзæнæнцæ. «Национ проекттæ царди уадзунæн е ахсгиаг къахдзæф æй, республики онкологион агъаз раттуни равналæнтæ дæр зингæ фæххузæдæр æнцæ», – загъта Тебиай-фурт.

Раздæр сæйгæ адæм химиотерапи кодтонцæ хирургон сæйгæдони иннæ сæйгити хæццæ еумæ, нур сæ бон æй хецæн хайади, кезуй нæ лæугæй, медицинон агъаз райсунæн. Дзæбæх кæнуни мадзæлттæ фадуатгиндæр ке кæнунцæ, е бæрæг æй, 1-аг поликлиники сæйраг дохтир Мецъати Зæлинæ куд зæгъуй, уотемæй фиццаг медико-санитарон агъаз кæнунцæ, ардæмæ дзæбæхгæнæн мадзæлттæ райсунмæ цæунцæ Дзæуæгигъæуи рахес фарси цæргутæ.

– Национ проектти сæйраг бæрæггæнæнтæ æнхæст кæнæн, гъома, сæ нисантæ æма ихæстæ. Аци анзæй бавналдтан национ проект «Дæргъвæтийнæ æма сæрæн цард» æнхæст кæнунмæ. Уой фæрци нæмæ фæззиндтæй аци нæуæг хайадæ – онкологион сæйгитæн медицинон агъази Центр. Ами сæйрагдæр æй нез афойнадæбæл рартасун, сæйгитæ гъæуама унгæг, тухст уавæртæ ма ’взаронцæ, – фæббæрæг кодта сæйраг дохтир.

Аци национ проект фæззиндтæй Уæрæсей Президент Владимир Путини амунддзийнади фæрци.

ДЖИХАТИ Стэллæ, æнæнездзийнадæ гъæуайкæнуйнади министради пресс-службæ