Пусулмæнтти табугонд китаб Хъурани куд загъд ес, уотемæй нæ Цитгин Исфæлдесæги бафæдзæхститæй еу æй рæстадæ, æма нæ уомæй ихæсгин кæнуй хуарздзийнæдтæ кæнун иннетæн æма син хеуæнтти хузæн агъаз кæнун, уой хæццæ ба нин фæдзæхсуй æнæфсармæ миутæй, æргом фудимелæй æма закъонти сæрти хезундзийнадæй хе гъæуай кæнун.

Аци фæдзæхст айдагъ хецæн адæймæгутæмæ нæ хауй, фал еугур æхсæнадæмæ дæр. Æма е æнæгъæнæй дæр æнхæстгонд цæудзæнæй, дзиллæ æмхузонæй ку тундзонцæ рæстзæрдæй, кæрæдзей нимайгæй æма кæрæдземæн агъазгæнгæй сæ цардиуагæ аразунмæ. Цæмæй уотæ уа, уой туххæй ба берæ аллихузон ахедгæ мадзæлттæ аразуй нæ республики пусулмæнтти Уодварнон управлени, муфтий Гуæцæлти Хаджиморати разамундæй. Еци мадзæлттæн сæ ахсгиагдæртæй еу æй спортивон-аййевадон спартакиадæ «Сабурдзийнадæ æма æнсувæрдзийнади эстафетæ». Арæзт цæуй берæ æнзти дæргъи, уой дæр кезугай Цæгат Иристони гъæути. Аци анз æвзурст æрцудæй Хæзнидон (аци мадзал ма си арæзт æрцудæй цалдæр анзей размæ, гъæуи мæзгити нæуæг азгъунст си игонгонд ку æрцудæй, уæд).

Нуртæкки аллихузон хæлхъойти фудæй æзмæнст рæстæги аци берæнацион дзиллон мадзалæн ес æгæрон, агъазиау ахедундзийнадæ  аллихузон адæмихæттити ’хсæн хæлардзийнади æма кæрæдзей рæстуодæй нимайундзийнади рахастдзийнæдтæ зæрдæмæдзæугæдæр кæнуни гъуддаги. Уомæн æвдесæн – алли анз дæр уоми архайунмæ æрæмбурд унцæ айдагъ Цæгат Иристони фæсевæд нæ, фал Хонсар Иристони, синхаг республикити минæвæрттæ дæр.

Мадзал арæзт æрцудæй нæ республики пусулмæнтти Уодварнон управлений, пусулмон дини культури Фонд, наукæ æма ахуради министради Цæгат Иристони Сæргълæууæги, Хецауади Администраций агъазæй. Зæгъун гъæуй уой дæр, æма арæзт ба æрцудæй паддзахадон программæ «Спорт России» фæлгæти.

ГОБЕТИ Ибрагим (галеуæрдигæй), ТУСКЪАТИ Таймораз æма ГУÆЦÆЛТИ Хаджиморат.

Спартакиади архайгутæн зæрдиагæй райарфæ кодтонцæ Цæгат Иристони Парламенти Сæрдар Тускъати Таймораз, нæ республики Сæргълæууæги æма Хецауади Администраций разамонæг Гобети Ибрагим, нæ республики муфтий Гуæцæлти Хаджиморат, Уæрæсей Сæйраг федералон инспектор Цæгат Иристони Сергей Гончаров, республики ветеранти Совети сæрдар Фриати Хъазбег, сæрмагонд æфсæддон операций ветеранти Совети сæрдар Магкæти Олег. Етæ еугурæйдæр сæ радзубандити баханхæ кодтонцæ, мадзалæн цæйбæрцæбæл устур ахедундзийнадæ ес фæсевæдон политикæ федар кæнуни гъуддаги, уой.

Æхцæуæн æй, еристи архайунмæ сæ минæвæрттæ ка æрбарветуй, еци регионти нимæдзæ куд ирæзуй æма спартакиадæ регионалонæй ба еугуруæрæсеуон æмвæзадæмæ куд хезгæ цæуй, е.

Спортивон еристæ цудæнцæ цалдæр фæлхæнемæй:  армрестлингæй, уæззау  гиритæ есунæй, бæттæн ивазунæй, догъи уайунæй.

Ерисгæнгутæй кæмæн куд бантæстæй, уотемæй фиццаг бунат байахæстонцæ Кирови, дуккаг – Горæтгæрон, æртиккаг – Ирæфи районти спортивон къуæрттæ.

Уæлахезонтæн – хуæрзеугутæ.

Уогæ еристи бæрæггæнæнтæ кæд ахсгиаг адтæнцæ, уæддæр уонæй сæйрагдæр ба адтæй архайгути ’хсæн хæлар рахастдзийнæдтæ ке исæвзурдæй, еци гъуддаг. Бæрæгбони уавæр бæрæг адтæй аллирауæн дæр. Уой фæсте еугур архайгутæн дæр фæххинцуни фингитæ æвæрд æрцудæй æма иуазгутæ, фусунтæ кæрæдзей никки хуæздæр бафæсмардтонцæ, нæуæг лимæнтæ дæр син фæззиндтæй.

…Спартакиадæ фæййевгъудæй, фал нæ райевгъуйдзæнæй, ка си адтæй, уонæн е ци алæмæти зæрдрохсдзийнадæ æрхаста, е.

– Æхцæуæн мин æй, абони бæрæгбони архайунмæ фæсевæд алли рауæнтæй ке æрæмбурд æнцæ, е, – загъта Гобети Ибрагим.  Æхцæуæн мин æй сауæнгæ номдзуд цæугæдон Волги билгæрæнттæй, Саратови облæстæй дæр нæмæ иуазгутæ ке иссудæй, е. Æхцæуæн мин æй нæхе фæсевæди æма нæ иуазгути цардгъон æма нифсхаст цæсгæнттæ уинун. Уæлдай æхцæуæндæр ба мин æй, аци еристи сæрмагонд тугъдон операций архайгутæй минæвæрттæ дæр ке ес, уой уинун.

Цæгат Кавкази хуæнхон-металлургон институти ректор Хъамболти Дзамболат уой фæдбæл уотæ загъта:

– Ами нуртæккæ цидæриддæр мадзæлттæ арæзт цæуй, уонæн ес айдагъдæр еу ахсгиаг нисан – фæсевæди идарддæр ирæзун кæнун. Еристи гъæуй нифс æма уодуæлдай хъаурæбайвæрд. Айдагъдæр уони фæрци нæ фæсевæди бон бауодзæнæй зин фæлварæнти сæрти рахезун, айдагъ спорти нæ, фал царди иннæ къабæзтæ æма фæззелæнтæбæл дæр фæууæлахез ун.

*  *  *

Аци еристæ айдагъ тухгиндæрти не ’сбæрæг кодтонцæ, фал ма аллихузи адæмихæттити минæвæртти дæр кæрæдзебæл исбастонцæ. Е ба нуртæкки доги хъæбæр ахсгиаг гъуддаг æй.

ГÆТИЙТИ Светланæ