Номдзуд французаг финсæг Дени Дидро (1713-1784) кæддæр уотæ ратаус кодта: «А дуйнебæл еунæг уæхæн загъд дæр нæййес, куд загъд адтæй, уотемæй ке балæдæрдтæнцæ, уæдта еунæг уæхæн гъуддаг дæр нæййес, куд конд æрцудæй, уотемæй ке райстонцæ…»

Ка ’й зонуй, æ загъд кæд цæмæйдæрти раст æй, уæддæр æнхæстæй ба æ хæццæ исарази уæн, æвæдзи, нæййес. Зæгъуйнаг ка фæззæгъуй, е уомæн æхецæн лæдæрд фæууй – æ раст си кенæ æцæгæй феруагæс кæнуй, кенæ ба æхе уæхæн лæдæрунгъонæй февдесуй. Иннетæ ’й ке нæ балæдæрунцæ, е ба уой фудæй фæууй, æма, æвæдзи, секкаг син фæууй æ «хуæрзагадæ».

Цæмæ гæсгæ ’й нæ аци дзубанди? Цæветтонгæ, политикон парти «Еугонд Уæрæсе»-й иристойнаг хайади пресс-службæ куд игъосун кæнуй, уотемæй æрæги райдæдта «Гъæуккаг постхæссæг-2026», зæгъгæ, ка хуннуй, еци Еугуруæрæсеуон конкурсмæ архайгутæ æвзаруни хай. Мадзал арæзт цæуй «Акционерон æхсæнадæ «Уæрæсей пост»-и, бæсти бастдзийнади косгути профессион цæдеси, уæдта гъæууон хæдзарадæ æма нимæцон райрæзти министрадти агъазæй æма политикон парти «Еугонд Уæрæсе»-й федералон проект «Уæрæсейаг гъæу»-и фадуатти фæрци.

Конкурси архайуни равгæ ес, дæс æма дууинсæй мин адæймагей уæнгæ кæми цæруй, уæхæн цæрæн бунæтти косæг специалисттæн (аци адæймæгутæ пости хайади гъæуама бакосонцæ тæккæ минкъийдæр анзи дæргъи).

Аци мадзали нисанеуæг æма ахедундзийнади фæдбæл политикон парти «Еугонд Уæрæсе»-й Генералон совети нимæрдар Владимир Якушев уотæ зæгъуй:

– Гъæуккаг постхæсгутæ гъæути æнхæст кæнунцæ ахсгиаг куст. Уони фæрци фулдæр хæттити гъæути цæрæг адæмæн иннæ цæрæн бунæтти хæццæ фæууй бастдзийнади еунæг фадуат. Нæ конкурси  ихæс æй постхæссæги дæсниадæ фæццитгиндæр кæнун, æ ахедундзийнадæн  ин аккаг аргъ кæнун, æма гъæути косунмæ æригон специалистти исразæнгард кæнун, нæ адæми æгъдæуттæ æма еудзийнадæ багъæуай кæнгæй…

Конкурс дехгонд æй æртæ хаййебæл. 2 апърели уæнгæ ка цæудзæнæй, конкурси еци фиццаг хаййи рæстæг æ архайгутæ конкурсæн фадуæттæ исаразæги сайт https\\земский-почтальон.рф.-мæ барветдзæнæнцæ онлайн курдиæдтæ. 3-24 апърели ка цæудзæнæй, конкурси еци дуккаг хаййи рæстæги ба регионалон экспертон къамистæ курдиæдтæн аргъ искæндзæнæнцæ, уæдта кæронбæттæни æркасти архайгути равзардзæнæнцæ. Кæронбæттæн мадзал  рацæудзæнæй 26 майи Мæскуй.

Регионалон къамистæ ке равзаронцæ, еци курдиæдти ’хсæн аци анзи 4-25 майи социалон хизæ «ВКонтакте»-йи фарс https\\vk.com\russianpost-и рацæудзæнæй сæрмагонд номинаци «Адæмон постхæссæг»-и æхсæнадон гъæлæскæнуйнадæ.

Фарæ конкурси ке æрæмбурд кодта, еци æртæ мин курдиадемæй экспертон жюри равзурста бæсти 86 регионемæй æрбафтуйæг кæронбæттæни 60 архайæги. Конкурси кæронбæттæн хай рацудæй фарæ 5-6 июни Мæскуй национ центр «Россия»-йи арæзт гъæууон фæллойнæгæнгути Еугуруæрæсеуон фембæлди рæстæг. Цæгат Иристонæй кæронбæттæни архайдта конкурси регионалон хаййи  уæлахезон – Дигори райони Хъарман-Синдзигъæуи постхæссæг Æбити Ритæ.

Дзубанди дæр ибæл нæййес, профессион еристæ ахсгиаг æнцæ уæлдайдæр ба абони косгутæ уæлдай хъæбæрдæр кæми нæ фагæ кæнуй, еци къабæзти фæллойнæгæнгути ’хсæн. Арази ан уобæл дæр æма хуæздæр специалистти цитгин кæнун дæр ахсгиаг æй, кæдимайди ба сæ фæнзиуонцæ æригæнттæ, нерæнгæ æ карни надбæл ка нæхстæр кæнуй, етæ дæр.

Фал, махмæ гæсгæ, постхæссæги дæсниадæ дæр зæрдæмæдзæугæдæр æма цитгиндæр кæнунæн ба сæйрагдæр æй, уонæн сæ кусти уæзæ нимайгæй, аккаг мизд син федун, æновудæй имæ куд бæллонцæ, уотæ сæ материалон æгъдауæй разæнгард кæнун. Уой куддæр искæнай, уотæ «Уæрæсей пост»-и  разамунд уайтæккæ сæхе æрбамæгуртæ кæнунцæ: «Æхца нæййес…» Кæд æцæгæйдæр уотæ ’й, уæд мадта сæхецæн ба кутемæй иснисан кæнунцæ алæмæтæй-алæмæтдæр бæрзонд улупатæ?!  Сæ цæсгон куд хуæцуй, уой сæхецæн аккаг кæнун, кæд æма фæстаг рæстæгути «Уæрæсей пост»-и экономикон уавæр, æцæгæйдæр, исæгудзæггомау æй–  зæгъæн, фарæ фараст мæйемæ  æ кæдзос зæран рауадæй… фараст миллиард соми… Æма, уавæр кæд фæххуæздæр уидæ, зæгъгæ, пости косæндæнттæй хæдзарадон товартæ уæйæгæнæнтæ рауайун кодтонцæ. Хуæздæр нæ уидæ, еци разамунди арæхстгиндæртæй раййевун? Кæдмимайди ба, е хуæздæрæрдæмæ фæббæрæг уидæ постхæсгути кусти хуæрзгъæдæдзийнадæбæл дæр. Нерæнгæ ба е хъæбæр дзурдтаг æй. Уой нæхебæл бæлвурдæй æвзарæн мах дæр, мухури фæрæзнити косгутæ. Адæм газеттæ æма журналтæ рафинсунцæ, фал сæмæ сæ хъæртунгæнæг ба нæййес, нæ, дан, фагæ кæнуй постхæсгутæ. Пости разамундæй уотæ ка рæуæнттæ кæнуй, уони бафæрсуйнаг ан: «Мухури фæрæзнитæ рафинсуни æргътæн сæ зингæдæр хай райсунмæ ку арæхсетæ, уæд уæ комкоммæ ихæс – рафинст газеттæ æма журналтæ сæ рафинсгутæмæ хъæртун кæнунмæ ба цæмæннæ арæхсетæ?..»

Адæм си бæргæ гъаст кæнунцæ, фал сæ игъосæг ба нæййес. Æма си беретæ еци тингунæй фæззæгъунцæ, нецибал рафинсдзинан, уомæн æма уæддæр нæмæ нæ хæссунцæ нæ рафинст мухур.

Нæкæси, аци хабар зундгонд æй политикон парти «Еугонд Уæрæсе»-йæн дæр. Фал… Æвæдзи, конкурстæ аразун æнцондæр æй, сæ фæрци хе раимонаутæ кæнун дæр. Гъуддаг бæлвурдæй фæррæстмæ кæнунбæл байархайун ба зингомаудæр æй…

Цидæр æй уæддæр, мæнæ ци конкурси койæй райдæдтан нæ дзубанди, уой фæдбæл ба ма уой зæгъуйнаг ан, æма нæ хъæбæр зæрдиагæй фæндуй, нæ республикæй си ка архайдзæнæй, етæ уæлахезонтæ куд исуонцæ. Хъæбæр æхцæуæн нин уодзæнæй се ’нтæстдзийнадæ.