Ес уæхæн хабæрттæ æма цаутæ, кæцити æхцæуæндзийнадæбæл бацийнæ кæнунцæ дзиллæ æнæгъæнæй дæр. Уæхæн зæрдæхцæуæндзийнадæ нин иссæй, æрæги нæ зундгонд финсæг æма æхсæнадон архайæг Скъодтати Бариси фурт Эльбрусæн Цæгат Иристони адæмон финсæги ном аккаггонд ке ’рцудæй, еци хабар. Зæрдиагæй ин арфæ кæнæн уой фæдбæл. Уой хæццæ ба ни федарæй æруагæс кæнуй, æ исфæлдистадон архайди ин никки фулдæр ке бантæсдзæнæй æма ма никки кадгиндæр хуæрзеугутæй хуарзæнхæгонд ке ’рцæудзæнæй, е.

Абони ба уæ зонгæ кæнæн Скъодтати Эльбруси финст нæуæг æмдзæвгити хæццæ.

*  *  *

Лæги паддзах – æ уод æй,

Хаир ин – дæ хуæрзтæ!

Куд æй бадарай, уотæ

Бафеддзæй дæ хæрзтæ.

Хеуон ци уа, е гъæуй

Мах, цума, нæ цæстæ.

Зæрдæн-дзæбæх – мæ гъæу æй,

Мæ сахар, мæ бæстæ.

Мудау ка фæууй адгин,

Ка нин æй хæдзарæ,

Уæхæн бæсти ун кадгин

Хуæздæр æй дзæвгарæ…

Седзæр кæми ’й, куд мадгин,

Ка соруй нæ бостæ,

Уæхæн зæнхи лæги зин

Нæ цæруй æностæ.

Нивгун ка кæнуй тухст уод.

Гъудигин – нæ хъæнзтæ,

Уæхæн рауæн мах зæронд

Нæ кæнунцæ æнзтæ…

Хумæтæг лæг, изæдау,

Кæми æй нимади,

Уæхæн бæсти сæрбæлтау

Лæг мæлуй æд кадæ…