Нæ Фидибæсти сæрбæлтау тохи æ цард ка иснивонд кодта, уони рохс нæмттæ нæ адæми ’рдигæй фæлтæрæй-фæлтæрмæ цитгингонд цудæнцæ, уæлдайдæр ба сæ райгурæн рауæнти. Еци табуйаг æгъдау абони дæр кадгинæй æнхæстгонд цæуй – сæрмагонд æфсæддон операций архайгæй æма се ’фсæддон ихæс æнхæст кæнгæй, æхсаргинæй ка фæммард æй, уони рохс нæмттæ æносонгонд цæунцæ сæ райгурæн сахартæ æма гъæути, ахургæнæндæнтти æма æндæр уиндгун рауæнти.

Æрæги Æхсæрисæри гъæууон астæуккаг скъолай медæгæ игонгонд æрцудæнцæ номерæн мраморон фæйнæгутæ се ’мгъæуккæгтæ Джимити Ибрагимæн æма Анатолий Умновæн – етæ архайдтонцæ сæрмагонд æфсæддон операций æма æхсаргинæй фæммард æнцæ се ’фсæддон ихæс æнхæст кæнгæй. Раздæр ма аци скъолæй уæхæн номерæн фæйнæг æвæрд æрцудæй æ рауагъдон Хадати Нодарæн – сæрмагонд æфсæддон операций архайгæй, е фæммард æй 2023 анзи.

Джимити Ибрагимæн æма Анатолий Умновæн номерæн фæйнæгутæ исаразун æма сæ ниввæруни гъуддаги фæййагъаз кодта Ирæфи райони администраци. Сæ игон кæнуни фæдбæл цитгин мадзали архайдтонцæ дууæ бæгъатæрей хеуæнттæ, гъæубæсти дзиллæ, Ирæфи райони разамунди минæвæрттæ, тугъди æма фæллойни ветеранти Совети иуонгтæ, ахургæнгутæ æма ахурдзаутæ.

Джимити Ибрагим службæ кодта нæ республики медгъуддæгути оргæнти кинологæй. Служби ихæстæ æнæлазæй æнхæст кæнуни туххæй цалдæр хатти хуарзæнхæгонд æрцудæй сæрмагонд хуæрзеугутæй. Сæрмагонд æфсæддон операций архайгæй, Ибрагим æхе равдиста нифсхаст, æхсаргин æфсæддонæй. Тугъдон архæйдтитæй еуей рæстæги, гъулæггагæн, фæммард æй знаги æхст дзармадзани æрхъезтæй. Æ фæммарди фæсте ин аккаггонд æрцудæй майдан «Æхсардзийнади туххæй».

Анатолий Умнов ба фарæ сентябри бафинста службæ кæнуни туххæй бадзурд æма уотемæй е ’фсæддон ихæстæ æнхæст кæнуни фæдбæл æрвист æрцудæй Курски облæстмæ. Тугъдон мадзæлтти архайгæй, не ’мзæнхон равдиста сæрæндзийнадæ æма нифсхастдзийнадæ. Гъулæггагæн, æгæр цубур рауадæй е ’фсæддон ирисхъæ – фарæ фæззæги Курски облæсти гъæу Зеленый Шляхи алфамбулай тугъдтити рæстæг бæгъатæрæй фæммард æй. Æ фæсмæрдæ ин исаккаг кодтонцæ Лæгдзийнади орден.

Номерæн мадзали ка радзубанди кодта, уонæн сæ зæгъуйнæгти еумæйаг гъуди адтæй: «Нæ бæгъатæрти рохс нæмттæ фæлтæрæй-фæлтæрмæ кадгинæй имисдзинан…»

ХЕКЪИЛАТИ Маринæ