Парти «Еугонд Уæ-рæсе»-й хъæппæресæй не ’стур Уæлахези 80 анзей кадæн хæстæгдæр мæйти æнхæстгонд цæудзæнæй номерæн, патриотон æма рохсадон мадзæлтти урух программæ. Нуриуæнгæ бал рапарахат æй архайд тугъдон мемориалти райарæзтбæл, музейти æма акци «Уæлахези диктант» бацæттæ кæнунбæл…

Бæрæгбонмæ цæттæдзийнади фарстабæл дзоргæй, «Еугонд Уæрæсе»-йи генералон совети секретарь Владимир Якушев куд бафеппайдта, уотемæй федералон цæттæгæнæг комитет «Нæ Уæлахез» бæлвурд нисантæбæл косуй, цæмæй Устур Фидибæстон тугъди цаутæ æма сæ ахсгиаг историон нисанеуæги туххæй рæстаг хабæрттæ урух мухургонд æма парахатгонд цæуонцæ.

– Е уæлдай вазуггиндæр æй Фидибæстæ гъæуайгæнæги анз æма Уæлахези 80 анзи юбилейи æууæлти архайгæй, – загъта секретарь. – Хæстæгдæр рæстæг райдайдзæнæй ахурадон косæндæнтти киунугути еугуруæрæсеуон конкурс «Знать, чтобы помнить». Фарæ уæхæн конкурси архайæг адтæнцæ 1400 скъолай æма уæлдæр ахургæнæндони музейтæ. Етæ конкурсмæ бавдистонцæ, Устур Фидибæстон тугъди хабæрттæ æма сæрмагонд æфсæддон операций архайгути туххæй ци равдиститæ бацæттæ кодтонцæ, уони фæдбæл æрмæгутæ. Конкурсон къамис хуæздæрбæл  банимадта алли уæрæсейаг регионти 90 музейи. Нæ зæрдæ дарæн, аци анзи ериси никки фулдæр ахурадон косæндæнттæ ке архайдзæнæнцæ, уобæл. Конкурси алли номинацити уæлахездзаутæн исаккаг кæндзæнæнцæ премитæ 200 мин сомемæй 500 мин сомей уæнгæ.

Апърели ба «Еугонд Уæрæсе» дуйней 80 бæстеми исараздзæнæй дзиллон акци «Уæлахези диктант». Акций архайæг уодзæнæнцæ федералон ведомствитæ æма æхсæнадон еугæндтæ. Уотæ, Владимир Якушеви дзубандимæ гæсгæ, Наукæ æма уæлдæр ахуради министрадæ диктант ниффинсунæн фæзуæттæ байгон кæндзæнæй еугур уæрæсейаг университетти æма сæ фæсарæйнаг филиалти. Фиццаг хатт «Уæлахези диктант»-йи архайгути исиуазæг кæндзæнæнцæ фонд «Фидибæстæ гъæуайгæнæг»-и регионалон дæлхайæдтæ дæр.

– Фарæ «Уæлахези диктант» ниффинстонцæ дууæ миллион адæймагемæй фулдæр (уонæн байгон кодтонцæ 30 мин сæрмагонд фæзуатей бæрцæ). Дуйнеуон акций архайгути нимæдзæ аци анз минкъийдæр нæ уодзæнæй, уобæл дузæрдуг нæ кæнун, – загъта секретарь.

Уæлахези 80 анзей кадæн гъуддæгути программи ес берæ æндæр мадзæлттæ дæр: «Историческая память», «Бессмертный полк онлайн», «Звонок ветерану», «Парад у дома ветерана» æма уотæ идарддæр.

Куд иннæ хæттити, уотæ нур дæр «Еугонд Уæрæсе»-й Цæгат Иристони регионалон хайадæ архайдзæнæй, Уæлахези бони кадæн парти ци акцитæ аразуй, уонæн сæ еугуреми дæр. «Историческая память», зæгъгæ, партион проекти регионалон координатор Фуад Кязымов уой фæдбæл уотæ æ радзубандий уотæ бæханхæ кодта:

– Ирæзгæ фæлтæрти патриотон гъомбæладæ, историон рæстдзийнадæ багъæуай кæнун – еци нисантæбæл зæрдиагæй куст цæуй æма идарддæр дæр парахаттæй-парахатдæр кæндзæнæй минæвæрттæ. Аци бæнтти бал райдæдтан «Уæлахези диктант»-мæ цæттæгæнæн архайд. Республики цæргутæ алкæддæр хъæбæр разæнгардæй фæййархайунцæ аци дзиллон акций, фарæ си архайдтонцæ æхсæз мин адæймагей бæрцæ. Аци анз аци мадзал никки дзиллдондæр ке уодзæнæй, уæдта нæ республики цæргутæ нæ Цитгин Уæлахези бæрæгбони кадæн иннæ мадзæлтти дæр разæнгардæй ке архайдзæнæнцæ, е ни федарæй æруагæс кæнуй.

Æ загъдмæ гæсгæ ма уой бафтауйнаг ан, æма арæзт берæ аллихузон мадзæлттæ ’рцæудзæнæй. Зæгъæн, нисангонд цæуй «Вахта памяти-2025», «Георгиевская лента», зæгъгæ, патриотон акцитæ, тугъдон зарти фестиваль-конкурс «Эхо военных лет». Уони апърели æма майи еумæйагæй исараздзæнæнцæ фæсевæди гъуддæгути Комитет æма æндæр фæсевæдон еугæндтæ. Еугур скъолати дæр рацæудзæнæнцæ «Уроки мужества», уæдта Устур Фидибæстон тугъди цаутæ æма хабæрттæ зонундзийнади викторинитæ, æфсæддон-спортивон гъæзтитæ «Победа» æма «Зарница»-йи кæронбæттæн еристæ.