… Кæддæр, дан, еу лæхъуæн исфæндæ кодта æ гъуддæгути фæдбæл балций рандæ ун. Æма æ ранæхстæри размæ æ мади бафарста:

– Фæндаггагæн мæ хæццæ ци хæссон?

– Дæ фиди ном, дæ фиди фарнæ, – адтæй мади дзуапп.

Æма лæхъуæн балций æ фиди номи, æ фиди фарни хæццæ рараст æй. Уой фæрци æй алкæми дæр зæрдиагæй исиуазæг кæниуонцæ – уоййасæбæл нимади адтæй æ фидæ…

Аци таурæхъи кой ма кæддæр дæр кодтан, фал æй уæддæр нæуæгæй æримиста. Уомæн бæлвурд равгæ дæр ес. Зундгонд куд æй, уотемæй аци анз Уæрæсей нимад цæуй Фидибæстæ гъæуайгæнæги Анзбæл. Лæдæрд æй, фулдæр æргом æздæхт ке цæудзæнæй, Фидибæсти сæрбæлтау тугъдон гъуддæгути æскъуæлхтдзийнæдти хабæрттæмæ. Махмæ гæсгæ ба, раст уодзæнæй, уомæй уæлдай ма царди иннæ къабæзти хъазауатонæй ка архайдта æма архайуй, уони дæр цитгин кæнун. Æма, куд нури уæнгæ, уотæ идарддæр дæр архайдзинан еци ихæс æнхæст кæнунбæл, мухур кæндзинан уой фæдбæл æрмæгутæ.

Абони ба имисæн нæ дууæ номдзуд адæймагей, зундгонд дæр уин ке ’нцæ, е ни æруагæс дæр кæнуй. Гарданти Хъайтухъи фурт Михал, нæ разагъди рохситаугутæй еу, берæ хуæрзти бацудæй нæ дзиллæн, уодуæлдаййæй фæхъхъиамæт кодта нæ адæмон исфæлдистади хæзнатæ бамбурд æма багъæуай кæнунбæл.

Цæголти Македони фурт Ким, нæ номдзуд æфсæддон раздзæуæг æма æхсæнадон архайæг дæр берæ агъазиау лæгдзийнæдтæй фескъуæлхтæй Райгурæн бæсти сæрбæлтау.

Имисгæ ба сæ бæлвурдæй уомæ гæсгæ кæнæн, æма Гарданти Михали райгурдбæл æнхæст кæнуй финддæс æма авдинсæй анзи (1870-1962), Цæголти Кими райгурдбæл ба исæнхæст æй финддæс æма цуппаринсæй анзи (1930-2015). Уой фæдбæл æрмæгутæ мухур кæнæн нæ газети абони номери.