МАМАТИ Анджелæ.

Зундгонд куд æй, уотемæй нуртæккæ куст цæуй Цæгат Иристони бунæттон цæргути социалон картæй исефтонг кæнунбæл. Пайда ба си гъæуама кæнонцæ, нæ республики ка цæруй, уонæй социалон уæлæнхасæн лæггæдтæ кæмæн æнгъезуй, етæ – пенсиесгутæ, инвалидтæ, тугъди архайгутæ æма иннетæ.

Уотемæй адæмæн æнцондæр уодзæнæй паддзахадон æма республикон лæггæдтæ есун: æхсæнадон транспорти лæвар цæуни барæ, музейтæмæ, театртæмæ, концерттæмæ бацæунæн. Уомæ гæсгæ фæллойнæ æма социалон ирæзти министрадæн ихæсгонд æй, уæхæн картитæй æнтæстгинæй кæми пайда кæнунцæ, еци регионти фæлтæрддзийнадæмæ лæмбунæгæй æркæсун æма си бафæнзуйнагæй ци ес, уомæй испайда кæнун. Сæйраг æй, цæмæй, картæй ка пайда кæна, уонæн равгæ уа æнцонтæй архайунæн æма син пайда хæсса.

Аци нæуæгдзийнади аллихузон фарстати туххæй æрæги журналистти хæццæ фембæлди рæстæг радзурдта нæ республики фæллойнæ æма социалон ирæзти министри хуæдæййевæг Мамати Анджелæ. Дзубанди цудæй сæрмагонд æфсæддон операций архайгутæ æма сæ бийнонтæн социалон агъази, гранттæй агъази æма социалон карти туххæй.

– Æвæстеуатæй бавналдтан нæ размæ æвæрд ихæстæ ’нхæст кæнунмæ, – загъта Мамати Анджелæ. – Сæрмагонд æфсæддон операций архайгутæ æма сæ бийнонтæн республики ес дæс æма инсæйæй фулдæр аллихузон реабилитацион æма социалон лæггæдтæ, æхцайæй агъаз, сæ сувæллæнттæн ахурадон косæндæнтти ес уæлæнхасæн лæггæдтæ. Фиццагкезуй агъаз еци бийнонти кæстæртæ райсунцæ. Зæгъæн, равгитæ син фæууй куд нæхе, уотæ æндæр регионти фæлладуадзæн бунæттæмæ фæццæунæн.

Министри хуæдæййевæги гъудимæ гæсгæ, социалон карти исарæзт гъæугæ æма хуарз гъуддаг æй:

– Лæмбунæг ахур кæнæн Мæску æма Мæскуй облæсти, Ленингради облæсти æма Сахалини, уæдта Ямали фæлтæрддзийнадæ.

Нуриуæнгæ нæмæ ес, нæхе региони хуæздæр ка исфедаудзæнæй, уæхæн гъудитæ. Социалон картæ «Мир»-æй пайда кæнгæй, уордæмæ бахæсдзинан компенсацион феддонтæ, субсидитæ, материалон агъази фæрæзнитæ, уæдта уæлæнхасæн лæггæдтæ кæмæн нисангонд æрцæуа, еци адæймæгутæн транспорти лæвар цæуни барæ. Нæ проектбæл косæн хецаудзийнади къабæзти хæццæ. Алли гъуддагæн дæр æ райдайæн æнцон нæ фæууй, фал архайæн, агъаз нин æй феддонти национ системæ «Мир».

Картæй пайда ка кæндзæнæй, еци номхигъди уодзæнæнцæ уæлæнхасæн лæггæдтæ кæмæн æмбæлуй, еци граждæнтæ. Устур базарадон организацити дæр си пайда кæнун æнгъездзæнæй.

Нæ министрадæ æнæсцохæй косуй, цæмæй агъазгъæуагæ адæмæн, уой хæццæ – сæрмагонд æфсæддон операций архайгутæн, фадуат уа хе хæдзарадæ исаразун æма си пайда исесун. 2024 анзи уæхæн социалон контракттæ æфсæддонти хæццæ инсæйемæй фулдæр бафинстан, аци анз ба нерæнгæ бал æхсæз социалон контракти.