Нæ бæсти Президент ци Указ бафинста, уомæ гæсгæ, «Мадæ-Бæгъатæр»-и кадгин номхæссæг силгоймæгтæн фист цæудзæнæй уæлæнхасæн социалон бафиститæ.

Уогæ социалон зæрдæдарæнтæбæл дзубанди ку цæуа, уæд «Мадæ-Бæгъатæр»-и номхæссæг силгоймæгти искодтонцæ æмбарæ Фæллойни Бæгъатæрти хæццæ.

*  *  *

Уæрæсей Федекраций разамонæги иннæ Указмæ гæсгæ, æ фиди рамардбæл 300 бони рацæуни фæсте ци сувæллон райгура, уомæн паддзахадæ феддзæнæй пенси.

*  *  *

Никки ма еу Указ – адæймаг æ цæрæн бунат ке раййивта, еци хабар æфсæддон комиссарадæн афойнадæбæл фегъосун кæнуни туххæй. Еци хабар æфсæддон комиссарадæн æртæ мæйей æмгъудмæ адæймаг ку нæ фегъосун кæна, уæд иваргонд æрцæудзæнæй 10 мин сомемæй 20 мин сомей уæнгæ.

*  *  *

Ниййерæги капиталбæл 1 февралæй бафтуйдзæнæй – фæффулдæр уодзæнæй 6,8 проценти. Аци нæуæгдзийнадæ хауй, нур ка есдзæнæй æ сертификат, еци бийнонтæмæ, уæдта раздæри сертификатæй æнхæстæй ка нæ испайда кодта, æма ма æ хигъди æхцатæ кæмæн байзадæй, уонæмæ.

*  *  *

Нæуæг анзæй фæстæмæ  фæккарздæр æнцæ Æнæмæнгæ медицинон фæдзæхстади полис мигранттæн дæттуни уагæвæрдтæ.

Кæронбæттæн паддзахадон аттестаци ка нæ рацæуа, еци 9-аг къласонтæн лæвар уодзæнæй ести фæллойнадон дæснийадæбæл исахур кæнуни барæ.

*  *  *

Сæрмагонд æфсæддон операций архайгутæ æма сæ бийнонтæн агъаз ка кæнуй, еци æнæкоммерцион организацитæ хаст æрцудæнцæ, паддзахадон агъаз кæмæн ес, социалон æгъдауæй ахсгиагдæр уæхæн организацити номхигъдмæ.

*  *  *

Сувæллæнттæ хуæдтолгити æнæ сæрмагонд бадæн бунæттæй ка ласа, еци шоферти ивар кæндзæнæнцæ никки карздæрæй: нур ивари бæрцæ иссæй 3 мин сомемæй 5 мин сомей уæнгæ, бæрнон адæймæгути ивар ба – 25 мин сомемæй 50 мин сомей уæнгæ.

*  *  *

 Е ’мгъуд кæмæн фæцæй, шофери уæхæн æвдесæндарæн еци æмгъуд идарддæр нæбал кæндзæнæнцæ. Айдагъдæр ма сæ тухи уодзæнæнцæ, е ’мгъуд 2025 анзи кæронмæ кæмæн æрхъæрттæй, уæхæн æвдесæндартæ, е дæр – æртæ анзей дæргъи, гъома, 2028 анзи кæронмæ.

*  *  *

Уæрæсей Хецауадæ Æнæнездзийнадæ гъæуайкæнуйнади министрадæн æ размæ исæвардта ихæс: 1 апърелмæ медицинон дæснийæдти номхигъди гъæуама фæззинна нæуæг дæснийадæ – æнæнез æма дæргъвæтийнæ цардбæл архайун æ куст кæмæн уодзæнæй, уæхæн дохтир.

*  *  *

Цæрæнуатон-коммуналон хæдзаради тарифтæ Цæгат Иристони анзи дæргъи фæффулдæр уодзæнæнцæ дууæ хатти: еу хатт фæффулдæр æнцæ, бæрæг куд æй, уотемæй – 1 январæй, дуккаг хатт ба – 1 октябрæй.

Январæй фæстæмæ тарифтæ фæффулдæр æнцæ еугур регионти еци-еухузон, рæстæмбес нимадæй – 1,7 проценти. 1 октябрæй ба тарифти ирæзт уодзæнæй фулдæр, уой хæццæ ба алли рауæн дæр аллихузон. Цæйбæрцæбæл фулдæр – е ба аразгæ уодзæнæй регионтæн сæхецæй.

Тарифтæ тæккæ фулдæр исирæздзæнæнцæ Стъараполи крайи – 22 проценти. Идарддæр цæунцæ: Дагестан – 19,7 проценти, Тамбови область – 17,5 проценти, Тюмени область – 17,2 проценти æма Республикæ Цæгат Иристон-Алани – 16,3 проценти.

*  *  *

Нæуæг уагæвæрдтæмæ гæсгæ хæдзари хецау дзуапп дæттуй айдагъ æ фатербæл нæ, фал еумæйагхæдзарадон коммуникацитæн сæ кæцидæр хайбæл, разамунддæттæг компани кенæ Цæрæнуæтти хецæутти æмбаладæ, еци коммуникацитæ цалцæг кæнунæй æхе еуварс ку ласа, уæд. Инженерон хизæгтæ нивæбæл уавæри даруни домæнтæ кæнунцæ карздæр.

*  *  *

Фатер конд ку некæбæл уа æма 12 мæйей дæргъи ревæдæй ку лæууа, гъома, коммуналон лæггæдтæй имæ ку неци хъæрта, уæд есбонбæл хъалон нимад цæудзæнæй æндæр хузи – 1,5 уæнгæ коэффициентмæ гæсгæ, æма уотемæй уодзæнæй фулдæр. Гъома, хецауади гъуди æй уæхæн: цæрæнуат дзæгъæл лæуд гъæуама ма кæна, фал къазнамæ хæсса æфтуйаг.

«Паспорт энергоэффективности», зæгъгæ, уæхæн гæгъæди фатерæн ку нæ уа, уæд ин рауæйæгæнæн кенæ байхуæрсæн нæ уодзæнæй. Еци æгъдауæй фатери уавæр исбæрæг кæнæн æма еци гæгъæди райсæн ес айдагъдæр сæрмагонд центрти.

*  *  *

Цæрæнуат бафæдзæхсун адæймагæн кæд æ барæ æхе  адтæй раздæр, уæд нурба еци гъуддаг æндæр хузхи иссæй. Бæлвурдæй кæбæлдæр фæдзæхст ка нæ уа, уæхæн цæрæнбунатæн нæдæр балхæнæн уодзæнæй, нæдæр ба рауæйæ кæнæн.

*  *  *

Еугур коммуналон фæрæзнитæбæл дæр – донбæл, артагбæл, электрон тухæбæл – гъæуама æвæрд æрцæуа нимайæн прибортæ. Къохæй финст бæрæггæнæнтæмæ гæсгæ коммуналон лæггæдтæн бафедæн нæбал уодзæнæй.

*  *  *

Уæрæсей Ахуради министрадæй куд райгъустæй, уотемæй нæуæг, 2026-2027 ахури анзæй райдайгæй, уæлдæр ахурадæ райсуни туххæй ахур кæнун багъæудзæнæй æхсæз анзи.

Раздæри хузæн ма цуппар анзи ахур кæнун гъæудзæнæй, «Туризм» æма «Иуазæгуарзондзийнадæ», зæгъгæ, аци дæснийæдтæ ка равзара, айдагъдæр уони. Фондз анзи рахæсдзæнæнцæ инженерон, педагогон æма медицинон программитæ, æхсæз анзи ба  берæвæрсуг æма вазуггин наукон дæснийадæ райсуни фæндæ ка искæна, уонæн.

Уотемæй, нуриуæнгæ ка адтæй æма цуппар анзи ка рахаста, еци ахурадæ, гъома, бакалавриат нæбал уодзæнæй, уæлдæр ахурадæ ба фæххæстæгдæр уодзæнæй, советон рæстæги ка адтæй, уæлдæр ахуради еци системæмæ.

*  *  *

Аци игъосункæнуйнаг ба хауй медицинон уæлдæр ахургæнæндæнтти студенттæмæ.

Нæуæг закъонмæ гæсгæ еугур бюджетон бунæттæ дæр ординатури нурæй фæстæмæ уодзæнæнцæ нисанмæарæзт. Медицинон институттæ æма академий рауагъдонтæ ба æнæмæнгæ гъæуама æртæ анзи бакосонцæ медицинон косæндæнтти.