Хуæнхон аграрон университети æрæги æрцудæй зингæ цау – ами байгон æй æнæтæхæг авиаций Центр. Центр, еуемæй, исуодзæнæй студенттæн ахуртæ æма практикон фæлварæнти фæзуат, иннемæй ба, Цæгат Иристони агропромышленнон комплекси къабази аллихузон нисантæ æнхæст кæнуни фæрæзнæ.

Цæмæй центр æркоса æма æ хъаури бацæуа, уой туххæй рагацау, 2024 анзи сентябрæй нуриуæнгæ устур цæттæгæнæн куст æнхæстгонд æрцудæй. Фиццагидæр, Хуæнхон аграрон университети байгон кодтонцæ нæуæг дæлхайæдтæ – цæттæ си кæнунцæ æнæтæхæг уæлдæфон аппаратти хæццæ косæг специалистти. Зæгъæн, аграрон колледжи – «Æнæтæхæг авиацион системитæй пайда кæнун», инженерон факультути ба бакалавриати программæмæ гæсгæ – «Æнæтæхæг уæлдæфон аппараттæ – агропромышленнон комплекси».

Университети ахургæнгутæ Мæскуй сæ зонундзийнæдтæ фæффулдæр кодтонцæ, нур дæр си къуаремæй сæ квалификаци идарддæр бæрзонддæр кæнунцæ.

Уæрæсей гъæууон хæдзаради Министради агъазæй университет райста æнæтæхæг аппараттæ, цæмæй студенттæ æма косгутæ сæ хæццæ архайуонцæ æма сæбæл ахур кæнонцæ. Иннæ гъæугæ ефтонггæрзтæ ба ахурадон уагæдонæ æхуæдæг балхæдта.

– Абони гъæууон хæдзаради райрæзт æнгом баст æй раззагдæр технологити хæццæ, æнæтæхæг аппаратти хæццæ. Фиццагидæр бал райдайдзинан косун уони хæццæ, идарддæр ба архайдзинан робототехники хæццæ дæр. Æма ахсгиаг гъуддаг æй, центри ци зонундзийнæдтæ æма фæлтæрддзийнадæ райсонцæ студенттæ, уонæй сæ бон пайда кæнун  ке уодзæнæй айдагъ агропромышленнон комплекси нæ, фал экономики иннæ къабæзти дæр. Мах программитæбæл ахурадæ æй, аразгæ интеллектæй кæми пайда кæнунцæ, еци дæсниæдти бундор дæр. Æнæтæхæг авиацион центри студенттæ аппараттæй пайда кæнуни хæццæ ма базондзæнæнцæ,  уони цалцæг кæнун, проекттæ æма программитæ син аразун – зæгъуй Хуæнхон аграрон университети ректор Гогати Олег.

Центри ес сæрмагонд рауæн тæхунæн, цалцæггæнæн æрмадзæ, уæдта стимулятортæбæл ахур кæнунæн еугур гъæугæ техникæ. Разамунд ин дæттуй æригон, фал фæлтæрдгин специалист Бичегкути Дианæ.

ХЕКЪИЛАТИ Маринæ