Аци анзæй фæстæмæ Уæрæсей еугур скъолати дæр æнæмæнгæ фæззиндзæнæй æнхæст кæнуйнаг фæткæ – ахурдзаутæн хуæруйнаг дæттуни нæуæг домæнтæ. Етæ конд æрцудæнцæ паддзахадон нормитæ æма скъоладзаутæн, сæ зæрдитæ ци хуæруйнæгтæ агорунцæ, уой нимайгæй. Сувæллæнтти хуæлцади комбинат Дзæуæгигъæуи æхе еци æййивддзийнæдтæмæ цæттæ кæнуй.

Комбинати коммерцион директор Бестаути Руслан куд радзурдта, уотемæй гъæуама скъолати сайттæбæл æнæмæнгæ фæззинна нæуæггонд меню. Уой фæдбæл уотæ загъта:

– Мах ци меню бацæттæ кæнæн,  уой нин исфедар кæнуй «Роспотребнадзор», конд фæууй инсæй боней æмгъудмæ. Уотемæй хизт фæууæн еу хуæлцадæй, хуæруйнаги  колоритæ нæ исафæн. Хуæруйнаг цæттæ кæнгæй, пайда кæнæн айдагъдæр ауæрдгæ хузтæй, уой фæрци хуæруйнаги пайдайаг æууæлтæ гъæуайгонд æрцæунцæ. Содзагæ, æндæр уæхæн гъæцæнтæй нæ кусти нæ пайда кæндзинан.

Куд ма баханхæ кодта, уотемæй еци гъуддæгутæ конд цæудзæнæнцæ сувæллæнтти хуайраги æдасдзийнадæ фæббæрзонддæр, се ’нæнездзийнади уавæр син фæххуæздæр кæнунæн, сæ сабийдоги ирæзтæн фадуæттæ искæнунæн. Нормити æййивддзийнæдтæй фæстæмæ, куст цæуй менюбæл, уоми фæззиндзæнæнцæ, сувæллæнттæ сæхуæдтæ фулдæр ци хуæруйнаг уарзунцæ æма син медицинон амунддзийнæдтæмæ гæсгæ пайдадæр ка ’й, уæхæн хуæруйнæгтæ..

Меню гъæздуг уодзæнæй аллихузон хуæруйнæгтæй, сувæллæнтти хинцдзæнæнцæ, зæгъæн, æстори фидæй конд  «голубцы»-тæй, «шоколадный» сойнæй æма æндæр нæуæгдзийнæдтæй. Уотæ зæгъæн ес, æма етæ меню искæндзæнæнцæ никки æнæнездæр, сувæллæнттæ сæбæл æхцæуæнæй исæмбæлдзæнæнцæ.

Скъоладзаути менюмæ фунх губæрттæ æма пельменьтæ ке бахастонцæ, е дæр дзуапп дæттуй санитарон нормитæн. Айдагъ анæбæл нæ цæуй дзубанди, ес ма си æндæр хуæрзадæ хуæруйнæгтæ дæр. Уотæ зæгъæн ес, æма нур скъоладзаути тæбæгъти æрдæгхуæрд хуæруйнаг нæбал байзайдзæнæй. Е сæйрагдæр æй.