Зундгонд куд æй, уотемæй нæ республики æнхæстгонд цæуй ахурадон программæ «Иристони æхсарæ». Уоми архайгути хæццæ æрæги фембалдæнцæ Цæгат Иристони Сæргълæууæг Сергей Меняйло, Парламенти Сæрдар Тускъати Таймораз, Хецауади Сæрдар Дзанайти Барис, республики Сæргълæууæг æма Хецауади Администраций разамонæг Гобети Ибрагим, хецаудзийнади къабæзти минæвæрттæ.

– Проекти архайунмæ уæ ку æвзурстан, уæд æрдзубанди кодтан, кæми æма циуавæр къабази уæ фæндуй косун, уобæл, – баханхæ кодта æ радзубандий Сергей Меняйло. – Æма гъæуама лæдæрайтæ, ци программæ уин бацæттæ кодтан, е, æнæмæнгæ, ахсгиаг ке æй нæ республикæ æма нæ бæстæн дæр.

Зундгонд куд æй, уотемæй федералон проект «Бæгъатæрти рæстæг» æнхæстгонд цæуй нæ бæсти алли региони дæр. Фал айдагъдæр нæ республики проект дæттуй уойбæрцæ равгитæ архайгутæн.

Проекти архайгутæн райарфæ кодта Тускъати Таймораз дæр æма загъта:

– Боз æма сæрустур ан сумах, проекти архайгути бæгъатæрдзийнадæ æма лæгдзийнадæй. Уомæн æма гъуддæгутæй тугъди будури равдистайтæ Фидибæстæбæл æновуддзийнадæ æма æ сæрбæлтау тохунмæ цæттæдзийнади дæнцæ. Нур уæ царди ралæудтæй æндæр рæстæг –  профессионалон ирæзти къæпхæн. Æма ми æруагæс кæнуй, куд тугъди будурти, уотæ сабур царди дæр сæрæндзийнадæй ке æскъуæлхдзинайтæ. Уæ фæндитæ  æнтæстгинæй исæнхæст кæнун уин бантæсæд!..