Æнæсцохæй глюкозæртасæн ефтонггæрзти хуæрзгъæдæдзийнади фæдбæл гъæститæ æгæр ке исахид æнцæ, уомæ гæсгæ нæ республики æнæнездзийнадæ гъæуайкæнуйнади министр Митцити Астан æрæги сæрмагондæй фембалдæй сæкæрнезæй сæйгæ сувæллæнтти ниййергути хæццæ. Ниййергути загъдмæ гæсгæ, раст бæрæггæнæнтæ ка не ’вдесуй, еци ефтонггæрзти фудæй сувæллæнтти бауæр гъигæдард баййафуй.

Уомæ гæсгæ ба министр  республики эндокринологон диспансерæн байихæс кодта, цæмæй ниййергути аци фарстай фæдбæл алли гъаст дæр «Росздравнадзор»-и косгути хæццæ еумæ хецæнæй уайтæккæдæр æвзурст цæуа, уæдта ефтонггæрзти хай æнæмæнгæ æрвист куд æрцæуа федералон экспертон центрмæ рартасунмæ. Митций-фурти загъдмæ гæсгæ, ефтонггæрзтæ стандартти аккаг кæд нæ ’нцæ, уæд министрадæ цубур рæстæгмæ сувæллæнттæн исамал кæндзæнæй æндæр, æнхæстæй ка бæззуй, уæхæн ефтонггæрзтæ.

Æнæнездзийнадæ гъæуайкæнуйнади министради пресс-службæ ма нин аци хабар фегъосун кæнгæй, уой дæр баханхæ кодта æма ведомстви разамонæг зæрдæ байвардта, аци фарстамæ комкоммæ æхуæдæг æ цæстæ ке дардзæнæй, уомæй. Куд баханхæ кодта, уотемæй сувæллæнтти æнæнездзийнадæ нæмæ гъæуама нимад цæуа нæ ахсгиагдæр ихæстæн сæ сæйрагдæрбæл.